ကၞေဟ်အမတ

ကဗျအနာဂတ်မန်ညးတၠချူနာဲအးဘယ်ရာမည။

အ္စာကၞေဟ် ရုပ်ၜိုန်ရပၠိုတ်၊ နာမ်ၜိုန်ရချိုတ်လေပ် ချိုတ်၊ ပၠိုတ်ဟွံမွဲ တၟးမံၚ်တ္ၚဲ ဗတမ် ညးဟီုဟွံကလၚ် ညးထ္ၜၚ်ဟွံယိုက် ညးဇိုတ်ဟွံအး တပ်တးယျဵုလဂူ ဗဂူမံၚ်ဗြဲ အရံၚ်သာ်သြန်လၟိုန်ဂှ် မအက္ခဝ်မၜံၚ်တိတ်နူကၞေဟ်ညးတအ်ရ။

ဒှ်တုဲ ဒးလီု ဂျိုၚ်တုဲ ချိုတ်ပၠန် တၟိ ဆက်တန်ဒှ် လၟေၚ်ပရေၚ်ဘဝမၞိဟ် ဗိုန်ဗတ်ဟွံမွဲ ဂြုဲစှေ်မံၚ်ကဵုသဘဴအနိစ္စဂှ် ဟွံဗျု ဟွံယဲ ဟွံချိုတ် ဂျိုၚ်ဒၟံၚ်ထာဝရ မွဲကရောမ် မွဲစွံကဵုတၞောဝ်ဝၚ်မၞိဟ်တအ်ဂှ် ဍောၚ်ပ္ကဴမရောၚ်မောဝ်တိက်နူကၞေဟ်ညးတအ်ရ။

ယွံ... ဒေံထေရ်အာနန် အဲကျာ်ဟွံမွဲတုဲ ပိဋကတ်ပိ ပါဠိပါၚ်အဲကျာ်မွဲမွဲအက္ခဝ် တုပ်ကဵုအဲကျာ်မွဲမွဲဇကု နွံတဴမံၚ်ဏီသာ်ဝွံ ကျာ်ဟီုကီုလေဝ် က္ဍဟ်မန်တအ် စိုက်ကွဳယေန်သၞာၚ် စပ်ကဵုသာသနာဒၠောံဗတောန်ကျာ် စဵုကဵုတ္ၚဲဏအ်ဂှ် ဟဳဇွောဝ်ကၠုၚ် နူကဵုၜဳကြုၚ်ဇၞော်၊ ဂၠံၚ်ဇၞော်ကၞေဟ်တၟာဂလိုၚ်ရ။

ကေၚ်ကေတ်ကၠုၚ်ဒၞာဲ အဃောကေတ်မံၚ်ဒၞာဲ ကြက်ဆက်ကေတ်အာဒၞာဲ အပ္ဍဲက္ဍဟ်က္ဍိုပ်သကိုပ်ပရေၚ်ဍုၚ်ကွာန်တအ် ခေတ်အဆက်ဆက်ဂွံဂှ် ကၠုၚ်နူဒဒန်ဆက်စၠောံဇၞော်ကၞေဟ်ရ။ ဆဂး သတိဒးစွံဒၞာဲဏအ်မွဲသာ်တုန် ဖျုန်ပၞာၚ်လေၚ်မှ ပၟတ်တၟးဟွံသေၚ် တ္ၚဲလဵု ပၟတ်ဟွံတၟးရ။

ပသှေ်စွံလဝ်ကောန်ကၟအ်ညး အပ္ဍဲရုပ်ကသူတုဲ စဴအာဘဝပရလိုက် အ္စာပုတ်ဂၠတ် ရောဒေန် ဗ္ဂၚ်စွံဏာလညာတ်သမ္တီညး အပ္ဍဲရုပ်ပုတ်ဂၠတ်တုဲ ပြံၚ်ဆုဲအာဘဝမွဲသအာၚ် နာဲညးမအံက်လိက်ပတ်မန် မဟာထေရ်ဗုဒ္ဓဃောသ သှ်ပတဴလဝ်ဓဝ်မေတ္တာညး အပ္ဍဲဗျည်မန် ၃၅တုဲ ဟွံလဇုဲ ဟွံပြဟ် ဒှ်လုပ်အာ နိဗ္ဗာန်အမြိုတ်ရ။