ဂကူဇကု ဇကုဒးဆာန်
ဝေါဟာရဆာန်ဏံ ပံက်အဓိပ္ပဲါမ္ဂး ဒးဒုၚ်ဂိရ၊ ဆာန်ကဝေၚ် ဟရိုၚ်ဇကုမ္ဂး ဗီုဍေံဟီု၊ ဗီုဍေံသ္ပဒးဒုၚ်မာန်ရ၊ ဆာန်ဂကူမ္ဂး ဒးဒုၚ်ဂိ သွက်ဂကူဇကုမာန်ရ၊ ဆာန်ဇြိုဟ်မ္ဂးဒုၚ်ဂိဇြိုဟ်ရ၊ ဂကူဂှ်သၠာဲကဵုလမျီု ဆီပဠက်ခန္ဓကာယအွဲဇိုၚ်တဲဇကုမာန်ရ၊ ဂကူမန်ဂှ် ဒှ်ဂကူကျာ်တြဲ ပတှ်ေဗ္အပ်လဝ်ကဵုသာသနာ ဒှ်ဂဂကူသၟိၚ်အိန်ဒးသိုၚ်ခၞံကဵုနန်ထဝ် ပ္တန်ကဵု ဍုၚ်သုဓမ္မဝတဳ အတိက်မွဲအခိၚ်တေံ ဂကူမန်ဂှ် ဒှ်ဂကူပရဲ။
ဆာန်ဂကူမ္ဂး ဒးလ္ၚတ်ဗှ်ဝၚ်ဂကူဇကု ပရူဝၚ်ဂကူဒးကၠိုဟ် ဒးတီ၊ ဒှ်ဂကူမၞုံကဵုကၟိန်ဍုၚ်နန်ထဝ် ဆဂးဂကူမန်ပစ္စုပ္ပန်ဏံ ကၟိန်ဍုၚ်နန်ထဝ်ဟွံမွဲရ၊ ဂကူမန်လေဝ် ကၠက်မံၚ်သိုက်က် ရိုဟ်တ္ၚဲရိုဟ်သၞာံရ၊ ဟိုတ်ဂှ်ရ သွက်မန်ဂွံမံက်ဂတဝ်ဒးဒုၚ်ဂိမာန်ဏောၚ်။
ဆာန်ဂကူဟီုဂှ် ဒၟါနူဇကုမွဲတုဲ ညံၚ်ဂကူညးတၞဟ် ဂွံဟီုထိုၚ်သး ကၠုၚ်ဂကူဇကု မၞိဟ်မွဲမွဲဂွံဒုၚ်ထိုၚ်သးကုညးတၞဟ်မာန် အသဝ်စရာဲ ဂုဏ်မွဲမွဲသာ် ဒးနွံလဝ်ရောၚ်၊ သၟတ်ဂကူမန် ဒ္ဂေတ်ပဋ္ဋိပတ်ခိုဟ် လေပ်ပညာစုၚ်လေၚ်လေပ်လဝ်ကွတ်နာနာ အသဝ်မပ္တံသာ်ဝွံ ဒးနွံလဝ်ပ္ဍဲဇကုဏောၚ် သၟတ်ဏံ ဒ္ဂေတ်ပဋ္ဋိပတ်ခိုဟ်ကွေံကွေံ မုဂကူရော ဂကူမန်ရောၚ်ဟေံ သ္ပဟိုတ်နူဒ္ဂေတ်ပဋ္ဋိပတ်ဇကုခိုဟ် ဂကူမန်ဇကုလေဝ် ယၟုမံက်ကၠုၚ်ကီုရ။
‘‘သၟတ်မန်တံ လေပ်ပညာဂၠိုၚ်မ္ဂး ဂကူမန်မံက်ဂတဝ်ရ ’’ သ္ပဟိုတ်နူပညာဇကုလေပ်လဝ်တၟေၚ်တုဲ ဂကူညးတၞဟ်တီကၠုၚ်ဂကူမန်ဂှ် ဒှ်ညးဆာန်ဂကူမွဲကီုရ၊ လေပ်ပညာတုဲ ဒုၚ်ယၟုမန်ညိ၊ ဟီုမံၚ်အရေဝ်မန် လၟိုန် ဟွံဝိုတ်တၠိၚ်ဂကူဂှ် ဒှ်ညးဆာန်ဂကူမွဲရ။
မန်ကဵုမန် ပံၚ်ကၠောန်ကမၠောန်ဂှ် ဒှ်မန်ဆာန်ဂကူရ၊ ဟီုအရေဝ်မန် ဗ္တောန်လိခ်မန်ဂှ် ဒှ်မန်ဆာန်ဂကူရ တီအဓိပ္ပဲါဆာန်ဂကူမ္ဂး၊ဆာန်ဂကူဒှ်ကၠုၚ်ရ၊ ကောံဍိုက်ကွဳစက်တၠမန် ကဵုဇြဟတ် ဆေၚ်ပုၚ်တၠမန်ဂှ် ဒှ်မန်ဆာန်ဂကူရ။
သၟတ်မန်တံ ဗ္တောန်မံၚ်ပညာမ္ဂး ညံၚ်ဂွံစောန် ဗီုသၟတ်ဂကူညးတၞဟ်ကီုတုဲ ပညာကွတ်မွဲမွဲ အစောန်စရာဲဍာ်ဒကေဝ်ကေက်သ္ကာမ္ဂး သၟတ်တံမုဂကူရော ညးတၞဟ်သၟာန် ဂၠုက်ဂၠဲါတုဲ ယၟုဂကူမန် မံက်ဂတဝ်ကၠုၚ်ရ။
ညံၚ်ဂကူညးတၞဟ် ဂွံသ္ပအဲပရဲရှ်ေသှ်ေ သၟတ်မန်တံဒ္ဂေတ် ပဋ္ဋိပတ်ဍိုက်ပေၚ်မ္ဂး ဒှ်ညးဆာန်ဂကူမန်ရ မန်ကဵုမန်သ္ပမ္ၚဵုထပ်တဲ မန်ကဵုမန်ပံၚ်ကၠောန်ကမၠောန် ပံက်ကမ္မဏဳ မန်ကဵုဇြဟတ်ကဵု ဂကောံမန်ဂှ် ဒှ်မန်ဆာန်ဂကူရ။
ဒၟါနူဇကု စရာဲဂကူ လ္ပကဵုပရေံအာ ကမၠောန်ကၠတ်ဂၠံက်လီစၞာဲ ဗ္တိုက်ပၠံၚ်ၜးဒြပ်ညးသ္အာၚ် ယဝ်ကၠောန်မ္ဂး ဒှ်မၞိဟ် ဍဵုဍိုက်ဂကူရ၊ ဂကူမန်ဂှ် ဒှ်ဂကူပတှ်ေ ပ္ဍဲဓရ်ဍာံ ဓရ်သဘာဝတုဲ ဒ္ဂေတ်ပဋ္ဋိပတ်ညးသပ္ပုရိုဟ် ဒ္ဂေတ်မံၚ်ကဵုမာန်မ္ဂး ဒှ်ဆာန်ဂကူမန်ရ။
ဆဵုညာတ်သၟတ်မန် ဒိုက်ဝါတ်ထံက်ပၚ် ကဵုပညာပတဝ်ဂၠံၚ် သၠုၚ်ကဵုဘဝ သၟတ်ဂကူမန်တံမာန်မ္ဂး ဒှ်မန်ဆာန်ဂကူရ ခေတ်ကၠာတေံ ဒုၚ်ယၟုမန်ဂှ် ဒးဖေက်ညး ခေတ်လၟုဟ် မန်ဒုၚ်ယၟုမန် ဒှ်မန်ဆာန်ဂကူ သာတုဲ ဂကူညးတၞဟ်ယွံသွံကၠုၚ်ဇကုရ။
သေဌဳမန်တံ စိုတ်ဓါတ်ဆာန်ဂကူ မံက်ကၠုၚ်တုဲ လၟုဟ်ပံက်လဝ်ကုမ္မဏဳတၠမန် ကုမ္မဏဳဝိသာခါ ကွာ်တၟုဲ အပ္ဍဲဍုၚ်မ္ၚးဍုၚ် ဂကောံဟံသာအေန်ဂျေန်နဳယျာမန် ပံက်ကၠုၚ်ဂှ် ဒှ်ပရေၚ်ယိုက်ဒိုက်ထံက်ပၚ် ဆာန်ဂကူမန်ဍာံဖ္အိုတ်ရ။
စိုတ်ဓါတ်ဆာန်ဂကူ မံက်မ္ဂး စိုတ်ဓါတ်ဍိက်ပၠက် အိုတ်ရ၊ပ္ဍဲဂကူမန် ပိုန်ဒြပ်နွံမံၚ်ဏောၚ် ပိုၚ်ပြဳလဝ် တိဍာ်ပိုန်ဒြပ်ဂၠိုၚ် ဆဂးဟိုတ်နူစိုတ်ဓါတ်ပံၚ်ကောံ ညးသ္ကံဟွံမွဲတုဲ ဘဝသဝ်ဒှ်ဍိက်ဝါတ်မံၚ်ရ။
ပိုန်ဒြပ်မန် ကောံမံၚ်ပ္ဍဲဂကူမန်မ္ဂး ဂကူမန် မံက်ဂတဝ် ပ္ဍဲဂၠးတိ ဇၞော်ဏံရ၊ ဟိုတ်ဂှ်ရ မန်ဆာန်မန်အိုတ်ညိ၊ ပံၚ်ကၠောန်ကဵုဂကူမန်အိုတ်ညိ။
✍ကျာ်ဇၞော်အ္စာမဟာထေရ်ပါလိတ
