ဂကောံလိက်ပတ်ယေန်သၞာၚ်
[ဂကောံလိက်ပတ်ယေန်သၞာၚ်]
အဲဂှ်မဒှ်ကောန်မန်မွဲရ။ မိအဲ အပါအဲသီုဝါတၠဂှ် ဟိုတ်နူကၠိဂွံလဝ်အာဲကၟာဲနူမိမညးတံသီုၜါလပါ်တုဲ ဒှ်ညးတၠတိဗ္ၚ တၠစက်ဗုတ်သ္ၚုမွဲမကီုရ။အဲဂွံအခေါၚ်မၚ်ဘာ အလဵုအသဳ အံၚ်ဇၞးကေတ်တန်ဒဿမနဘာကွာန်တုဲ ဂွံအခေါၚ်တိုန်ဘာတက္ကသိုလ် ဍုၚ်မတ်မလီုရ။ အဲဂှ်လေပ်စလိက်ညိည ဗ္ဒါဲကဵုပိုန်ဒြပ်မိမတုဲ စိုတ်သၠုၚ်လောန် ၜိုန်ဒှ်ကောန်မန်မံၚ်ဘာကွာန်မန် စသုၚ်ပုၚ်သွမန်ကီုလေဝ် ဟွံဟီုအရေဝ်မန် ဟွံဗှ်လိက်မန် ဟွံသုၚ်စောဲယေန်သၞာၚ်အခိုက်ကၞာမန်လးလးဂှ် ပ္ဍဲဂၠမ်စိုတ်ယောၚ်ညံၚ် "ညး" ဗက်ရံၚ်သ္ၚိမံၚ်နကဵုမတ်ကရုဏာဏောၚ်ထေၚ်။ စုကပ်တက္ကသိုလ်ဗက်ဆဵုဂဗစုတ် "ညး" ပၠန်ရ။ အဲပၠောပ်လဝ်စိုတ်ဂှ် စိုပ်ဘာတက္ကသိုလ်မ္ဂး ဂကူဟွံဒးရုဲ ဂွံဂၠာဲမိတ်ဒါန် ဂွံဆဵုပြဲဇွာဂၠိုၚ်ဏောၚ် ဂွံအဆပူဂဵု ကၠောန်ပရေၚ်ပိုန်ဒြပ်ဏောၚ် ပံၚ်ကဵုဂကူသ္အာၚ်တုဲ ဂွံနဲကဲပတိတ်ပရဲ လ္တူညးကောန်ကွာန်ဏောၚ် ဍေန်လိက်ဗှ်လိက်ညိညတုဲ ညံၚ်ဂွံအံၚ်လိက် ကဆံၚ်သၠုၚ်သၠုၚ်ဂှ် ထပက်လာဘ်ဗဇဴကဵုညးတၠအဝဵု စပ်ကဵုပရေၚ်ပညာဏောၚ် ရန်တၟံအဲဂှ် ဆၜိုတ်ဏညိကွေံ။ လၟုဟ်ဟွံမိက်ဆဵုရ ပဲါကၠုၚ်နူကွာန်စိုပ်ဌာန်ဍုၚ်ဇၞော် ဂဗစုတ် "ညး"ပၠန်သွံ။ ဍောၚ်ကွေံရဏး "ညး" ဗက်စန်ဒက်မံၚ် ကွးဘာမန် တိုန်မံၚ်တက္ကသိုလ် သွက်ဂွံဗတောန်အရေဝ်မန်၊ လိက်မန်ရ။ သွက်ဂွံပတိတ်လိက်ကၞပ် စပ်ကဵုပရေၚ်ဂကူဂွံဇၞော်မောဝ်ရ။ "ညး" ဗက်စရၚ်ဇာတိဍုၚ်ကွာန်တုဲ ဒဒှ်ရ အဲလေဝ်ကောန်မန်မွဲကီုဂှ် "ညး" တီစုတ်ရ အပါအဲဂှ် စပ်ကဵုပရေၚ်ပိုန်ဒြပ် ဒက်မိတ်ပရဲ ကဵုဂကူမပ္တံကြုက်ဂလာတံဂၠိုၚ်၊ ပ္ဍဲသ္ၚိလေဝ် ဟွံဟီုအရေဝ်မန်တုဲ အလုံမွဲသ္ၚိပိုဲ ဟီုအရေဝ်မန် ဟွံချိုတ်ပၠိုတ်ဂှ် လအ်မံၚ်ကွေံကွေံရ အဲလေဝ်အထေၚ်ဇၞော်ကဵုအရေဝ်ဂကူသ္အာၚ်တုဲ နူဒစိတ်တန်တေံ ဟွံဟီုကၠုၚ်လဝ်အရေဝ်မန် လၟုဟ်မှဗီုလဵုဂွံပံၚ်ကဵု "ညး" မာန်မံၚ်ဏီရော "ညး" ဖအောဝ်အဲကဵုတိုန် တန်ဟီုအရေဝ်မန် အဲပါဲဟွံဒဴဟွံလောဲ ဒးတိုန်တန်ဟီုအရေဝ်မန် အကြာကွးဘာကြုက်ဂလာတံရ၊ မွဲလှ်ေပၠန် "ညး" ထဴကဵုတိုန်တန်ဗ္တောန်လိက်မန်ပၠန်ရ၊ ပဲါဂၠံၚ်ကွိုက် ဒးဂၠံၚ်ကေတ် ပဲါဂၠံၚ်ကေက် ဒးဂၠံၚ်ကွိုတ်ရသွံ ရန်ကဵုဂကူ ကရေၚ် ချေၚ်အဟိန်ဍေံတံတိုန်လိက်ဘာတက္ကသိုလ်ပရေၚ်ဂကူညးကဵုညး ဍေံတံလုပ်ကၠောန် သီုစိုတ်မိပ်မြဟ်ဂှ် ဂွံဆဵုတုဲ ချပ်ဂၠိၚ်သ္ၚောဲ သီုကဵုစိုတ်စေတနာဟၟဲလးလး ဒးကလၚ်စဂလာန် "ညး" ပၠတရဴတုဲ အဲဂွံအခေါၚ်တိုန်စၚ်သ္ဘၚ်တ္ၚဲကောန်ဂကူမန် ဂွံအခေါၚ်လှ်ေဒယှ်ေလ္တူစၚ်သၠုၚ်တ္ၚဲကၟိန်ဍုၚ် ဂွံအခေါၚ်တိုန်စၚ်တ္ၚဲတွဵုရးမန်ဍုၚ်မန်
လ္ၚတ်လိက်ဝၚ်မန်လေဝ်လေပ်ကၠုၚ် နူအာဒိကိုပ်ကၠာတေံဟေၚ် ဒဒှ်ရဂကူမန် နွံကၠုၚ်ကဵုတိဍာ်နန်ထဝ် ဂွံကၠုၚ်လိက်ပတ် သာသနာ ကၠာအိုတ်ဂှ်လေဝ် ဂွံတီကၠုၚ်ဂှ် ဟိုတ်နူဂုဏ် "ညး" ဏောၚ်။
လၟုဟ်ဂွံတဆိပ်ကြာသိပ္ပံ ဒှ်ကွးအံၚ်ပညာတက္ကသဵုတုဲ ကလေၚ်စဴကွာန် ကာလအပါသၟာန် နကဵုအရေဝ်ဂကူလဵု ဂွံသွဟ်ကြိုက်ရော အဲဗ္တောန်နကဵုပညာတက္ကသဵုဂှ် သွက်ပတိတ်ပရဲ လ္တူကောန်ကွာန်သွက်မိမကောဒေံအဲမွဲသ္ၚိဓဝ် ဂွံစသုၚ်ဖဲလဲရဟာ၊ သွက်မန်ဂွံဇၞော်မောဝ် အဲလေဝ်တာလျိုၚ် မၚ်မွဲဂကူ နွံမံၚ်ဏောၚ်လေဝ်။
မွဲအခိၚ်တေံ "ညး" ပၠတရဴဟၟဲ အဲတၠိၚ်ပရေၚ်ဂကူလဝ်ကဵုဒှ်ကၠာရ။ လၟုဟ်ဟိုတ်နူ “ညး" ပၠတရဴခိုဟ် အဲကၠိုဟ်တိုန်ဣယျ။ လ္တူနူအာဲမိမအဲ ပြးမံၚ်မွဲကၠအ်၊ အာဲကၟာဲမန်ပြးမံၚ်ပေၚ်တိဂှ် ၜိုတ်အစောန်အဲနွံအဲဒးမၚ်မွဲကီုဏောၚ် ကာလစၟဳစၟတ်ရံၚ်မှ ဒၞဲါကောန်ဂကူမန်နွံ ရဲ“ညး" နွံမံၚ်သီုဖအိုတ်ဏောၚ်ဟေအ် “ညး" ကဵု “ရဲညး" ဂှ် ဒေသရတၟေၚ် ရန်တၟံတိုၚ်ပ္ကဴ တုပ်ဟေၚ်ဏောၚ်။
ဝၚ်ပရေံညံၚ်ဟွံဂွံဒးဒုၚ်ချိုတ် “ညး"ဘိုၚ်ဖတိုက်ဖအောဝ် ထ္ၜးလဝ်ကဵုဂၠံၚ် အဲဂွံဒှ်ကၠုၚ်ယေန်သၞာၚ်မန် နွံကဵုမ္ၚဵု “ညး" ဏောၚ်လဟဵုပလေဝ်လဝ်၊ အဲအပ်လမျီုတုဲ ပံၚ်အာကဵု “ညး”ဏောၚ်။ “ညး” ဂှ်ညးဂှ်ရော၊ “ဂကောံလိက်ပတ်ယေန်သၞာၚ်မန် ”ရောၚ်။
✍တၠဂုဏ်ပဏ္ဍိတ (ကၟာဝက်)