တ္ၚဲဂကောံကၟိန်ဍုၚ်

ကောန်ဍုၚ်အရၚ်တအ် ညဳသာသၟဟ်န် ထပက်စၟတ်တဲ ပ္ဍဲလိက်ကသုက်ပေန်ဠုၚ်၊ ပ္ဍဲဂိတုဖေဖဝ်ဝါရဳ ၁၂ - တ္ၚဲဂှ် တ္ၚဲဂကောံကၟိန်ဍုၚ် သာ်ဝွံ ပိုၚ်ခြာလဝ် တ္ၚဲပရဲရ။ဂကောံကၟိန်ဍုၚ်ဗၟာဝွံ ပ္ဍဲဂိတုဂျာန်ဏာဝါရဳ ၄ တ္ၚဲဂှ် ကလိဂွံဗၠးၜးတုဲ တ္ၚဲဂှ်ဒှ်တ္ၚဲဗၠးၜး၊ ဗိုလ်အံၚ်ဆာန်မွဲဟာန် ကေုာံ က္ဍိုပ်သ္ကိုပ် ပရေၚ်ဍုၚ်ကွာန်ဂမၠိုၚ်စုတိအာပ္ဍဲ ဂိတုဂျူလာၚ် ၁၉ - တ္ၚဲဂှ် ဒှ်တ္ၚဲအာဇနဲ၊ ဂိတုမာတ် ၂ တ္ၚဲဂှ် အလဵုအသဳ စၞေဟ်ပလန် သဳကေတ်အာဏာဂှ် ပ္ဍဲတ္ၚဲဂှ် တ္ၚဲသၟာဗ္ၚ မပ္တံသာ်ဝွံ စၟတ်ပိုၚ်ခြာလဝ် တ္ၚဲပရဲနွံတဴရ။ ဍုၚ်ပေန်ဠုၚ်ဂှ် ဒှ်ဍုၚ်သၟတ်မွဲရ။ နွံပ္ဍဲဇိုၚ်ဍုၚ် လောဲဠာန် ပ္ဍဲခန်လွာဍုၚ်သေံ လ္ပာ်သၟဝ်ကျာရ။ ရးဍုၚ်ဗၟာဂှ် ဒှ်ဒၟံၚ်ဘဝဍိက် သၟဝ်တဲအၚ်္ဂလိက်တုဲ ပ္ဍဲသက္ကရာဇ်ခရေတ် ၁၉၄၇ သၞာံဂှ် သွက်ဂွံ၊ ဂွံဗၠးၜး ဗိုလ်အံၚ်ဆာန် သ္ပက္ဍိုပ်တုဲ ကောန်ဍုၚ်အရၚ်တအ် လုပ်ဒၟံၚ်ပေဲါဗ္တိုက်ဂှ် အလဵုအသဳဗျိတိယှ သီုစိုတ်မထတ်ရ။ ပ္ဍဲကာလဂှ် ရးဍုၚ်ဗၟာဝွံ ဒးကဵုဗၠးၜးရောၚ်၊ ဟွံကဵုမံၚ်ဟွံဂွံ စိုပ်တဴသဇိုၚ်ဒၟံၚ်ဂှ် အလဵုအသဳဗျိတိယှတံ တီလဝ်တုဲတုဲရ။ ၜိုန်ဂှ်လေဝ် ကာလကဵုဗၠးၜးရးဍုၚ်ဗၟာဂှ် ပွိုၚ်ဒေသဒဵုရေၚ်တအ်ဂှ် ညံၚ်ဟွံပါလုပ်အာဂှ် ပါ်ပရးထကးဆီ နာနာသာ်ရ။ ဆ္ဂး ကောန်ဍုၚ်အရၚ်တအ် ဆီကောံညဳသာဒၟံၚ်တုဲ ၜိုတ်သ္ကေဝ်လဵု ပါ်ဆီပါ်ဆီ ပါ်ပရးဆီ ထကးအာဟွံမာန်ရ။ က္ဍိုပ်သ္ကိုပ်ဗၟာ ဗိုလ်အံၚ်ဆာန်ကီု၊ က္ဍိုပ်သ္ကိုပ်ကောန်ဂကူညး မမံၚ်ပ္ဍဲဒဵုရေၚ်တအ်ဂှ် ဂဗးဆဵုက္ဍိုပ်ဂကောံ သ္ပသဘၚ်သဳကၠဳ ပ္ဍဲဍုၚ်ပေန်ဠုၚ် ပ္ဍဲသက္ကရာဇ်ခရေတ် ၁၉၄၇ သၞာံ ဂိတုဖေဖဝ်ဝါရဳ ၁၂ - တ္ၚဲဂှ် ထပက်စၟတ်တဲ ပ္ဍဲလိက်ကသုက်ပေန်ဠုၚ်ရ။ ဖျေံကၞက်ကၞက်ဍိုတ် ဂကောံကၟိန်ဍုၚ်ရ။ ဟိုတ်ဂှ်ရ ဖေဖဝ်ဝါရဳ ၁၂ တ္ၚဲဂှ် စၟတ်ပိုၚ်ခြာလဝ် တ္ၚဲဂကောံကၟိန်ဍုၚ်ရ။ ရိုဟ်စိုပ်တ္ၚဲ ဂကောံကၟိန်ဍုၚ် အလုံရးဍုၚ်ဗၟာမွဲ စိုတ်ဓာတ်ဆီဂကောံညဳသာပေန်ဠုၚ် ဂွံဇၞးလဝ်ရဲသၠဲတိဂှ် မကြံၚ်ဍုဟ် ခိုၚ်ဗိုန်အာ ရန်တၟံသာ်ဝွံတုဲ သ္ပသဘၚ်အသေအဟာန် တ္ၚဲဂကောံကၟိန်ဍုၚ် ဂြုဂြုဂြီုဂြီုရ။