တ္ၚဲပိုဲက္တဵုဒှ်မၞိဟ်ဂှ်ဒှ်တ္ၚဲမိယာဲချိုတ်မွဲတ္ၚဲ
(တ္ၚဲပိုဲဏံက္တဵုဒှ်မၞိဟ်ဂှ်ဒှ်တ္ၚဲမိယာဲချိုတ်မွဲတ္ၚဲကီုရ၊)
ပိုဲမၞိဟ်တအ်သီုညးဖအိုတ်လေဝ်နွံကၠုၚ်ကဵုမိယာဲတုဲမှဂွံကတဵုဒှ်ကၠုၚ်မၞိဟ်ပ္ဍဲကဵုတ္ၚဲဏံကီုရ၊ ဟိုတ်ဒှ်သာ်ဂှ်တုဲ ပ္ဍဲကဵုအခိၚ်မိယာဲပိုဲသၠးပဋိသိန္ဓိၜံၚ်ပ္တိတ်ပိုဲတ္ၚဲကၠာအိုတ်ဂှ် ယဝ်ရမိယာဲပိုဲချိုတ်အာဏောၚ်တှ်ေ တ္ၚဲဏံပေၚ်အာအာယုက်ပိုဲကောန်တံကီုရ၊ ပ္ဍဲကဵုတ္ၚဲဏံလေဝ်ဇၟာပ်ညးအဲစိုပ်ကၠုၚ်အခိၚ်အာယုက်ပေၚ်လၟေၚ်သၞာံဏောၚ်တှ်ေကၠောန်ဗဒှ်တ္ၚဲကတဵုဒှ်မၞိဟ်မိပ်ဇြိပ်တဴအိုတ်ဗီုညးကဵုညးရ။
တ္ၚဲဏံဇၟာပ်ညးအဲသ္ပတ္ၚဲဒှ်မၞိဟ်ပေၚ်အာယုက်လၟေၚ်သၞာံအိုတ်တုဲ ပကောံဂွံသ္ကံရဲမိပ်ဇြိပ်တဴဗွဲမလောန်ရ၊ တ္ၚဲဏံပိုဲကောန်တံပေၚ်အာယုက်မူစိသၞာံဏံဂှ်ညးဂှ်လဵုမွဲဂံၚ်သၠးလဝ်လမျီုသွက်ပိုဲဂှ်လေဝ်ဝိုတ်တၠိၚ်ထောံအိုတ်တုဲ ဗက်အခေတ်ဗက်အလိုက်လောကမိပ်ပေၚ်ပြးအာဟွံကူချပ်လပါ်မိယာဲမွဲဂံၚ်သၠးလဝ်လမျီုလ္တူပိုဲကောန်တံၜိုတ်လဵုဂှ်အိုတ်ရ။
တ္ၚဲက္တဵုဒှ်မၞိဟ်ဏံ ပ္ဍဲကဵုအခေတ်တ္ၚဲဏံလေဝ် သီုလကျာ်သီုခရှ်ကၠောန်သ္ပမိပ်တဴဒှ်အာအခိုက်ကၞာပြဝေဏီမွဲကီုတုဲ ယဝ်ရပိုဲကၠိုဟ်ဗီုကောန်ဗုဒ္ဓဘာသာထေက်ကဵုဒးကၠိုဟ်ဏောၚ်တှ်ေ တ္ၚဲက္တဵုဒှ်မၞိဟ်ပိုဲဏံဂှ်ဒှ်တ္ၚဲမိယာဲမွဲကြပ်ချိုတ်လေဝ်ဟီုဂွံတုဲ တ္ၚဲဏံဟေၚ်ရဇၟာပ်ညးအဲပ္ဍဲအခိၚ်အာယုက်ပေၚ်မူစိသၞာံဏံဂှ်တှ်ေ ထေက်ကြိုက်ပိုဲကောန်တံဒးကၠောန်သ္ပပေါဲမ္ၚဵုကာတၟေၚ်တၟေၚ်ကလအ်မိယာဲဏောၚ်တှ်ေနွံကဵုၚုဟ်မးကွေံရ၊ တ္ၚဲဏံဟေၚ်ရဒှ်တ္ၚဲဂုဏ်ပြဲလ္တူမိယာဲမွဲသၠးကၠုၚ်လဝ်လမျီုလ္တူကောန်တံဂွံပေၚ်အာယုက်မူစိသၞာံတ္ၚဲဏံအိုတ်တုဲ ဒးတၚ်ဂုဏ်ကဵုမိယာဲမွဲသက်ပတောံၜိုတ်ဟွံမွယ်ရတုဲပိုဲတံဂွံကတဵုဒှ်ကၠုၚ်မၞိဟ်ပ္ဍဲတ္ၚဲဏံ။
ဟိုတ်နူပိုဲတံဒးကၠောန်သ္ပတ္ၚဲဒှ်မၞိဟ်ဍေၚ်ပၞာၚ်ကွာၚ်ကဠောံမၞိဟ်ကောံဂေတ်ဝိုၚ်လဝ်တံဂှ်တုဲ တ္ၚဲဏံအာယုက်ပိုဲပေၚ်မူစိသၞာံဂှ်တှ်ေ ကော်နၚ်မိယာဲပိုဲသ္ပစၟတ်သမ္တီတ္ၚဲဏံမိယာဲမွဲသၠးလဝ်လမျီုလ္တူကောန်ပေၚ်အာယုက်ပ္ဍဲတ္ၚဲဏံဂှ်တုဲနွံကဵုၚုဟ်မးဇၞော်ကဵုဒြဟတ်ရ၊ ယဝ်ပိုဲတံကၠောန်သ္ပသာ်ဏံဏောၚ်တှ်ေ ၚုဟ်မးသက်ဟီုဟွံမွယ်တုဲ ဣဏံလေဝ်ကော်စဂၠံၚ်ဍာန်ဗုဒ္ဓဘာသာမွဲတၞုၚ်ထေက်ကဵုပိုဲကောန်တံဒးကၠောန်လ္တူမၞိဟ်ဗြဴမွဲကော်စမိယာဲသၠးလဝ်လမျီုလ္တူကောန်တံဏောၚ်တှ်ေ ဣဏံရပိုဲတံဗက်အခေတ်ဂတာပ်အခေတ်နကဵုဂၠံၚ်ဍာန်ဗုဒ္ဓဘာသာမွဲတၞုၚ်ရ၊ သာ်ဏံဟွံသေၚ်တှ်ေ ညးတၞဟ်ကၠောန်သ္ပတ္ၚဲက္တဵုဒှ်မၞိဟ်လေဝ် ဗီုညးဗီုအဲကၠောန်ဗက်ပေၚ်ဍုၚ်ပေၚ်ကွာန်သီုလကျာ်သီုခရှ်ရှ်သာပ္ဍဲကမၠောန်နွံအောန်တဴအိုတ်တုဲ သီုအခိၚ်အိုတ်သီုမသြန်လေဝ်အိုတ်ဖဵုလေဝ်မုဟွံမွယ်တုဲ ၚုဟ်မးမိယာဲမွဲမၚ်ဒၟံၚ်ကဵုကောန်တံကၠိုဟ်ကေတ်သာ်ဏံဂှ်လေဝ်ဆက်မၚ်အာပၠန်ရဟာ။
ဟိုတ်ဒှ်သာ်ဏံတုဲ ယဝ်ရဇၟာပ်ညးအဲကၠိုဟ်ကေတ်ဗီုအဲကၠိုဟ်ဏံဏောၚ်တှ်ေ တ္ၚဲကတဵုဒှ်မၞိဟ်ပိုဲဂှ် သ္ပထောံတ္ၚဲကြပ်ချိုတ်မိယာဲပိုဲတုဲ ကလအ်ဂ္ဇံဖျေံပ္ဍဲဂၠးဂတာဇိုၚ်မိယာဲမွဲနကဵုမအရေဝ်တၚ်ဂုဏ်ကဵုမိယာဲပိုဲကဵုညးဂွံမိၚ်တုဲပဳတိမ္ဂးတှ်ေ ဣဏံရမိယာဲမွဲနွံဗၟိက်မိက်သ္ဂောံကဵုကောန်တံကၠောန်အိုတ်ရ၊ သွက်ညးမိယာဲဟွံမွယ်ချိုတ်အာတံဂှ်လေဝ် တ္ၚဲဏံပိုဲကောန်တံထေက်ကဵုဒးဗှ်ဗၞုဟ်တ္ၚဲဏံမိယာဲပိုဲချိုတ်ပေၚ်အာမူစိသၞာံတုဲ သ္ပကုသဵုကဵုဒါန်စၞးဒးသ္ပတ္ၚဲက္တဵုဒှ်မၞိဟ်ပိုဲဏံမ္ဂးတှ်ေ ဣဏံဝွံၚုဟ်မးပြဲတဴဗွဲမလောန်နဒဒှ်ဂၠံၚ်ဍာန်ကောန်ဗုဒ္ဓဘာသာမွဲတၞုၚ်ပေၚ်ပေၚ်ရ။
အုပ်နိဂီုရအဴ ။
နိဿဲ
ပလေဝ်ဒါန်နူပရေၚ်ဆဵုဂဗဗဟုသုတပူဂဵု ။