နိဒါနကထာ တြာဲပါရာဇိကဏ် (မူ-ဗ္ဂေါ)
နိဒါနကထာ
"ဇယတု သဗ္ဗမၚ်္ဂလံ" မ္ၚဵုအိုတ်သီုဂှ် ကဵုဂွံအံၚ်ဇၞးမာန်ညိ။
"စိရံတိဋ္ဌတု သဒ္ဓမ္မော" သာသနာတၠဳမၞုံပိုန်ကျာ်တြဲ ကဵုဂွံတန်တဴလုကဴကာလ မလံညိ။ ဓရ်ညးသပ္ပရိုဟ်လေဝ် ကဵုတန်တဴ လုကဴကာလ မလံညိ။
ဂမ္ဘဳရသာသနာ၊ တၠဳမၞုံကုပိုန်ကျာ်တြဲ တွံစွံပ္တန်လဝ် ဒေသနာပိတန်မတွံဂး ပရိယတ္တိသာသနာ၊ ပဋိပတ္တိသာသနာ၊ ပဋိဝေဓသာသနာ မဒှ်ရ။ ပၞောဝ်ကဵု သာသနာပိတန်ဂှ် ပရိယတ္တိသာသနာဂှ် ဒှ်ရိုဟ်တၞံမူလ ဒှ်မဗဳဇသာသနာ တၠဳပိုန်ကျာ်တြဲရ။
ပရိယတ္တိသာသနာဂှ် ဒှ်ပဓာန်အဓိကသာသနာၜါတန်တံဂှ်ရ။ ပရိယတ္တိသာသနာဟွံမွဲမ္ဂး (ဝါ) ပရိယတ္တိသာသနာကၠေံဗ္ဒန်အာမ္ဂး သာသနာၜါတန်ဂှ်လေဝ် အလဵုအလဵုကၠေံဗ္ဒန်အာရ။ ဟိုတ်ဂှ်ရ သာသနာတၠဳပိုန်ကျာ်တြဲပိုဲဂှ် ပရိယတ္တိသာသနာဂှ် ဒှ်ဟိုတ်ရိုဟ်တၞံမူလမဗဳဇ ဗုဒ္ဓသာသနာရောၚ် ရဴဝွံမ္ဒးဟီုစမာန်ရ။
ရန်ကဵု ဂကူ ဘာသာ သာသနာ ဂကူရာမညတအ်ဂွံဇၞော်မောဝ် တဴတက်အာ အဓာန်အနာဂတ်ဂတ လ္တူနူမဇၞော်မောဝ်တဴတက်တအ်ဂှ်တုဲကီု၊ အခိၚ်လၟုဟ်ဂွံဆဵုညာတ်ကေတ် ကောန်ဂကူရာမညတအ် ဖောံဗြဳတဴတက်တိုန်ကၠုၚ်ဒၟံၚ်ရိုဟ်ရိုဟ်တ္ၚဲ ရိုဟ်ဟ်သၞာံဂှ်ကီု၊ ပိုဲဍိုက်တအ်မိပ်မြဟ်အိုဟ်တၟိုဟ် ပံက်သြိုဟ်ကဵုကောန်ဂကူရာမညတအ်တုဲ ကဵုသာဓုကာ ကုကောန်ဂကူရာမညတအ်ရောၚ်။
ယွံကောန်သောတုဇန ရာမညတအ်ညးဂမၠိုၚ်ကီု၊ သီုအ္စာလိခ် မၞုံပိုန်ဂကူရာမညတအ်ညးဂမၠိုၚ်ကျာ် ညံၚ် ဂကူ ဘာသာ သာသနာ ပိုဲသ္ဂောံဇၞော်မောဝ်တဴတက်တိုန်အာ အနာဂတ်ဂတမာန်ဂှ် သြဝ်ပ္တိတ်ဇြဟတ်လွဳပရာအိုတ်ညိကျာ်။ ရဴဝွံ မိက်ဂွံဗတိုက်ဖအောဝ်ဏာ ဗွဲမရှ်ေသှ်ေရဴဂဴရကျာ် (ဂန္ထကာရက)။
ပိုဲဍိုက် (ဘဒ္ဒန္တ သဳလာစာရ) လေဝ် သ္ဂောံဆဵုညာတ်ကေတ် ကောန်သောတုဇကု ဂကူရာမညတအ် တိုန်စိုပ်ကၠုၚ်က္ဆံၚ်သၠုၚ် ပရိယတ္တိကောဝိဒ မတွံဂးတန်ဓမ္မာစရိယဝွံ မွဲသၞာံကဵု မွဲသၞာံ မွဲအခိၚ်ကဵု မွဲအခိၚ် ဂၠိုၚ်ကၠုၚ်ဒၟံၚ်ဖောၚ်ၚ်ဂှ် ဂွံဆဵုညာတ်ဒၟံၚ် အလုံကောန်ဂကူရာမညတအ် သီုညးဖအိုတ်ရ။ ရန်ကဵု ကောန်ဂကူမန်တအ် ကောန်သောတုဇနမန်သၟတ်တအ်ဂွံလ္ၚတ်လောဲသွာညိလဝ်စိုတ်တုဲ အကြာအကြာမၞုံကဵုဂဗုတ်မဂၠိုၚ် အကြာအကြာပ္တိုန်ဖျေံလိခ်ဂှ် ပၠံၚ်ကေတ်အခိၚ်တုဲ နကဵုဇဲဝဳရိယ ပၠတရဴတုဲ ချူခၞံဗဒှ်ပြကိုဟ်မၞုံယၟု "တြာဲပါရာဇိကဏ် အဋ္ဌကထာ" ဝွံရောၚ်။
နိဿဲ
ပလေဝ်ဒါန်သဳလာစာရ၊ ဘဒ္ဒန္တ (၁၃၇၀) တြာဲပါရာဇိကဏ် အဋ္ဌကထာ၊ ပြကိုဟ်၊ ပထမကၞပ်။ တက်တြးပ္တိတ်နူ - ဗ္ဂေါပရိယတ္တိမန်၊ ဍုၚ်မတ်မလီု။