ဗီုကဝ်တူ သ္ကုတ်(၄) "ဟိုတ်သတ်တအ် ဂွံအာစိုပ်ဍုၚ်ဗြီု"
ဗီုကဝ်တူ သ္ကုတ်(၄) "ဟိုတ်သတ်တအ် ဂွံစိုပ်အာဍုင်ဗြီု "
ပလေဝ်ဒါန်သတ်ဂမၠိုင်တအ် ဂွံမိင် 'ကောလဟလ' ဟီုဂးတဴမံင်ပေင်ဍုင်ပေင်ကွာန်ဂှ်တုဲ မၞိဟ်ဂမၠိုင်လေဝ် ဖေက်ဂၟံက်ကၠုင် ဘဲကဝ်တူအိုတ်ရ။
ဗီုပကတိ ကေင်မိပ်လဟိင်ဝိဝိင်မံင်ဂှ် မိပ်လဟိင်ဟွံမာန် ဗီုညးဗီုအဲဂစာန်ကၠောန်ကၠုင်ကေင်ကာကုသဵုအိုတ်ရ။
ကာလဂှ်မ္ဂး ညးမွဲကေုာံညးမွဲ ဟွံမွဲကဵုပွမ ဍဵုဍိုက်သ္ပမာန်တုဲ နွံကဵုဓရ်မေတ္တာ၊ ကရုဏာ၊ မုဒိတာ၊ ဥပေက္ခာ မင်မွဲကၠုင် ဓရ်ဗြဟ္မဇဵုပန်၊ ရှေ်သှေ်တဴမိမအစာ ကၠောန်ကၠုင်ကုသဵုအိုတ်တုဲ စုတိအာနူဂှ် လ္ၚဵုကလေင်ဒှ်မၞိဟ်၊ လ္ၚဵုစိုပ်သွဝ် လ္ၚဵုစိုပ်ဗြီု အိုတ်ရ။
အာက္တဵုဒှ်ပ္ဍဲဘုံ ဟွံဗၠးနူဘဲကဝ်တူဂှ်ဏီမ္ဂး ညံင်ဂွံစိုပ်အာဘုံဗြီုလ္တူလ္တူ ဟွံဒးတူဂှ် ဒးဆက်ဂစာန် လွဳပရာဓရ်ကုသဵုပၠန်ရ။
သတ်တိရစ္ဆာန်တအ်လေဝ် ဗွဲသဘာဝဍေံကဵုဍေံ တီကၠိုဟ်ကေတ်အိုတ်တုဲ မွဲကေုာံမွဲ ဟွံပြိုက်ပျဲ ဟွံကိတ်ဂစိုတ်ညးကအ်ရ၊ အခိင်ဂှ်မ္ဂး ကုသဵုကံ ကၠောန်ကၠုင်လဝ် ဘဝအတိက်တေံ ကလေင်ဇိုန်ကဵုဖဵုတုဲ နူတိရစ္ဆာန်ဂှ် စုတိအာ လ္ၚဵုဒှ်မၞိဟ် လ္ၚဵုစိုပ်အာသွဝ်အိုတ်ရ၊
နူဂှ်မွဲကဆံင် ညံင်ဂွံစိုပ်ဘုံဗြီု ဗၠးနူဘဲပၟတ်ကဝ်တူဂှ် ဒးဂစာန်ကၠောန်အာ ကေင်ကာကုသဵုပၠန်ရ။
သတ်နရက်၊ ပြိုတ်၊ အသုရကာယ်တအ်လေဝ် ကာလစိုပ်အခိင်ဂှ်မ္ဂး ကုသဵုကံအတိက် ကဵုဖဵုကီုတုဲ စုတိနူဂှ် က္တဵုဒှ်မၞိဟ် စိုပ်သွဝ် ဒးဆက်ဂစာန်လွဳပရာကုသဵု ညံင်ဂွံဗၠးနူဘဲပၟတ်ကဝ်တူကီုရ။
ကာလပၟတ်ကဝ်တူမ္ဂး နရက်(၈)ကတိုင်လေဝ် ဒးတူအာကီု သီုဖအိုတ်ဂှ်ရ ရဲညး-နိယတမိစ္ဆာဒိဋ္ဌိ နွံမံင်ကတိုင်နရက်အဝိစိတအ်ဂှ် ယဝ်ရ အကုသဵုကံ ဒးဒုင်ပျဲဟွံအိုတ်ဏီမ္ဂး ဒးအာဆက်ဒုင် ပ္ဍဲစက္ကဝါမွဲသ္အာင်တေံပၠန်ရ။
ညံင်ရဴကောန်ထံင်ဍုင်မၞိဟ်ပိုဲဏအ် ဒးပြံင်ထံင်ကီု ကောန်နရက်အဝိစိ ဒုဟ်ဇၞော်ဇၞော်တအ်ဂှ် ဟွံဗၠးတိတ်မွဲသာ် ဒးအာဒုင်ပ္ဍဲ စက္ကဝါ ဟွံဒးတူတအ်ဂှ်ရ။
သၟေဟ်နူဂှ် ကောန်နရက်ဂမၠိုင်တအ် ဂွံက္တဵုဒှ်မၞိဟ်အိုတ်တုဲ မၞိဟ်ဂမၠိုင်တအ်ကီု၊ ဒေဝတဴဂမၠိုင်တအ်ကီု၊ ကောန်ဗြီုဘုံကဝ်ဒးတူဂှ်ကီု ဟိုတ်နူဖေက်ဘဲကဝ်တူတုဲ ညးညးအဲအဲဂစာန်လွဳပရာတဴဓရ်ကုသဵု သၞာံဗွဲမလအ်လကာဖာတုဲ စိုပ်အခိင်ဂှ်မ္ဂး သတ်တအ်မွဲဍောတ်လေဝ်ဟွံသှ်ေ အာစိုပ်ဍုင်ဗြီု ဟွံဒးလီုလာ်ဂှ်အိုတ်ရ။
ဒှ်သာ်ဂှ်ရ ကဝ်တူမွဲလန်တှ်ေ သတ်တအ်စိုပ်ဗြီုမွဲလန် ညးတအ်ဟီုစရ။ အခိင်ဂှ်မ္ဂး ပိုဲတအ်လေဝ် အာစိုပ်ဍုင်ဗြီုကီုဏောင်။