ဗီုကဝ်တူ သ္ကုတ် (၅) တ္ၚဲထပှ်မ တိုန်ဗွဲလၟေၚ်လၟေၚ်
ဗီုကဝ်တူ သ္ကုတ်(၅) " တ္ၚဲထပှ်မ တိုန်ဗွဲလၟေင်င် " ပလေဝ်ဒါန်
ဘဲပၟတ်ပလီုကဝ်မ္ဂး စဵုကဵုဘုံဗြီု ပထမဇျှာန်(၃)ဘုံ ဒးတူလေင်ဆောံ ဘဲပၟတ်ကဝ်တူကီုရောင် ဒှ်သာ်ဂှ်တုဲ အောန်အိုတ်ကလိဂွံအာစိုပ် ဘုံဗြီုဒုတိယဇျှာန်မှ ဂွံတိတ်ဗၠးမာန်ရ။
ဟိုတ်ဂှ်ရ သတ်တအ်ဂမၠိုင်လေဝ် ညံင်ဂွံတိတ်ဗၠးနူဘဲပၟတ်ကဝ်တူဂှ် ဂစာန်လွဳပရာတဴဓရ်ကုသဵု ညံင်ဂွံအာစိုပ်ဘုံ ဗြီုလ္တူလ္တူတအ် ဂမၠိုင်အိုတ်တုဲ ကာလဂှ် သတ်တအ်ဂမၠိုင်လေဝ် အာစိုပ်ဘုံဗြီုကဝ်ဟွံဒးတူတအ်အိုတ် မွဲဍောတ်လေဝ် ဟွံသှေ်ရ။
အခိင်ဂှ်မ္ဂး ဗြဲလေဝ်ဟွံမွဲ တ္ၚဲသၟးကာတ်မံင် ဗွဲမလအ်လကဵုသၞာံအခါတုဲ တၞံဆုအကြာဒဵုဂမၠိုင်လေဝ် ကှ်ကေဲအေဲဇြဒၟံင်အိုတ်ရ။
နူကဵုတ္ၚဲတိုန်မံင် ဗွဲပကတိမွဲမဂှ် ဗွဲကြဴဏအ် တ္ၚဲဒုတိယ ထပ်မံက်တိုန်ကၠုင်မွဲမပၠန်တုဲ ဒှ်အာတ္ၚဲ (၂)မရ၊ တ္ၚဲဒုတိယဏအ်ဂှ် ကာတ်သၠာန် ဂမ္တဴလောန်နူကဵု တ္ၚဲပထမ မကိုပ်ကၠာဂှ်ဏီရ။
တ္ၚဲတိုန်ဒၟံင် ဗွဲပကတိမွဲမ ကိုပ်ကၠာဂှ် နွံတဴကဵုဒေဝတဴသၟိင်တ္ၚဲကီုလေဝ် တ္ၚဲဒုတိယ ထပ်တိုန်တၟိဏအ်ဂှ် ဒေဝတဴမင်မွဲတ္ၚဲဟွံမွဲ၊ တ္ၚဲမကၠာဂှ်စှေ်မ္ဂး တ္ၚဲမလက္ကရဴဏအ်မံက်တိုန် ဒှ်ဒၟံင်သာ်ဏအ်အရိုဟ်ဟ်တ္ၚဲတုဲအခိင်ဂှ်မ္ဂး ဗ္တံလေဝ်ဟွံမွဲ ဒှ်မံင်တ္ၚဲသက်က်ရ။
နနဲသာ်ဏအ် တ္ၚဲၜါမတိုန်ဂေတ်မံင် စက္ကဝါပိုဲဏအ် မွဲဓဝ်ဟွံသေင် ဂေတ်ဒၟံင်အလုံမွဲကိုတ်နိလဟုတ် စက္ကဝါတုပ်ပ် အရိုဟ်ဟ်တ္ၚဲ သၞာံဗွဲမလအ်လတုဲ ကာလဂှ်မ္ဂး ကြုင်စောဝ် လဂေါဝ်ဂမၠိုင် ကှ်ဇိုတ်အာအိုတ်ရ။
နူကဵုတ္ၚဲၜါမ ညးစှေ်အဲတိုန်ဂေတ်ဒၟံင် ဟွံမွဲကဵုအခိင်ဗ္တံ သၞာံဗွဲမလအ်တုဲ ဗွဲကြဴဏအ် တ္ၚဲထပ်မံက်တိုန်ကၠုင် မွဲမပၠန်တုဲ ဒှ်အာတ္ၚဲပိမရ။
ကာလတ္ၚဲဒှ်အာပိမ တိုန်ဒၟံင်အခိင်ဗွဲမလအ်လကဵုသၞာံပၠန်တုဲ ဍာ်ကြုင်ဇၞော်ဂမၠိုင်လေဝ် ဇတ်ကှ်အာအိုတ်ပၠန်ရ။
ဗွဲကြဴ တ္ၚဲမရနုက်ကဵုစတုတ္ထ ထပ်မံက်ကၠုင်မွဲမပၠန်တုဲ တ္ၚဲဒှ်အာ (၄)မရ။ ကာလတ္ၚဲပန်မ ဂေတ်မံင် ဂၠိုင်ဂၠင်ကဵုသၞာံအခါဂှ် လ္စ၊ အင်လှာဂမၠိုင်လေဝ် ဍာ်ကှ်ဇိုတ်အာအိုတ်ရ။
တ္ၚဲပန်မ တိုန်ဒၟံင်သၞာံဗွဲမလအ်လကဵု သၞာံအခါတုဲ ဗွဲကြဴဂှ် တ္ၚဲထပ်မံက်မွဲမပၠန် ဒှ်အာတ္ၚဲ(၅)မရ။ တ္ၚဲမသုန်မလေဝ် ဂေတ်မံင်ဂၠးကဝ်သၞာံလအ်လတုဲ ကာလဂှ် ဍာ်ၜဳမှာသၟိဒ်ဇၞော် ဒကှ်ဇိုတ်အာရ။
နူဂှ် တ္ၚဲထပ်မံက်ကၠုင်မွဲမပၠန် ဒှ်အာတ္ၚဲ(၆)မဂှ် ဂၠးကဝ်ဏအ် ယက်ဂၠု မုလေဝ်ဟွံဆဵု နွံမံင်ဆယက်သၟး ပေင်ထာတ်မံင်ရ။ တ္ၚဲတြဴမ တိုန်မံင် ဗွဲမလအ်လကဵုသၞာံတုဲ တ္ၚဲထပ်မံက်တိုန်ကၠုင်မွဲမပၠန် ဒှ်အာတ္ၚဲထပှ်မရ။
ကာလတ္ၚဲထပှ်မ တိုန်မံင်သၞာံဗွဲမလအ်ဂှ် ဂၠးကဝ်ဏအ်လေဝ် ဒုင်ဒဝ်ဘဲဂမ္တဴဟွံမာန် နူကဵုယက်ဂၠုမံင်ဂှ် ပၟတ်ဂဵုတိုန်တုဲ ဂၠးကဝ်ဏအ်လေဝ် တူဂဵုတိုန်ရ။