ဗီုကဝ်တူ သ္ကုတ် (၆) "ပၟတ်စံၚ်ပၠေၚ်ဘုံဂမၠိုၚ်"
ဗီုကဝ်တူ သ္ကုတ်(၆) " ပၟတ်စံင်ပၠေင်ဘုံဂမၠိုင်" ပလေဝ်ဒါန်
ပ္ဍဲကာလတ္ၚဲတိုန်ပေင်ထပှ်မတုဲ တၞံဆုကှ်ကှ်တအ် သ္ၚိတြေံတြဟ်မံင်တအ် ကမ္တဴသၠာန်မင်ဂဵုအိုတ်ဍာ်မံင်ရတှေ် ဂၠးကဝ်လေဝ် ဒုင်ဒဝ်ဟွံမာန် ပၟတ်ဂဵုတူတိုန် ဗွဲမသ္ကာတ်ရ။
နူကဵုဂၠးကဝ်ဂဵုတူဒၟံင် သၞာံဗွဲမလအ်တုဲ လ္ပာ်သၟဝ်မ္ဂး ဘုံနရက်ဇၞော်(၈)ကတိုင်လေဝ် ပၟတ်ဂဵုတူအာဖအိုတ်ရ။
လ္ပာ်လ္တူဂှ် ပၟတ်ဂဵုတူအာ ဒဵုယုဂန္ဓိုရ်လေဝ်ဟွံသှေ်သွဝ်စာတုမဟာရာဇ်လေဝ် သ္ၚိနန်ပြာသာဒ် ဒေဝတဴဂမၠိုင် တူဂဵုထၞာန်အာ စဵုကဵုဒဵုသိန္နရာဇ်ရ။
လ္တူက္ဍဟ်ဒဵုသိန္နရာဇ် လွဳမာန်ပြာသာဒ် ဝေဇယန္တဝ်ကီု လွဳမာန်ဒေဝတဴဂမၠိုင်တအ်ကီု တူဂဵုဟတိုဟ်တိုန် ထၞာန်ကၠောံအာ လ္တူဗလးအာကာသ စဵုကဵုဍုင်သွဝ်ယာမာရ။
သွဝ်လ္တူတိ ၜါဘုံကီု သွဝ်လ္တူအာကာသပန်ဘုံကီု အိုတ်သီုကဵု ဍုင်သွဝ်(၆)ဘုံ မွဲဟွံသှေ် ဒးဒုင်စံင်ကဵု ဘဲပၟတ်ကဝ်တူရ။နူဂှ်မွဲကဆံင် စဵုကဵုဍုင်ဗြီုပထမဇျှာန် (၃)ဘုံလေဝ် ပၟတ်ကဝ်စံင်ပၠေင်ကၠေံကီုရ။
ပၟတ်ကဝ်တူ ဂဵုတဴဒၟံင်သၞာံဗွဲမလအ်လ လုကဴကာလ ဂၠးကဝ်သှေ်ဒၟံင် ဗၞတ်တၟာညိညဏီမ္ဂး ပၟတ်ကဝ်ဟွံပၠိုတ်၊ ကာလညိညဓဝ်မှ သက်ဂွံတူဟွံမွဲရ ဒှ်မ္ဂး အခိင်ဂှ်မှ ပၟတ်ကဝ်ဂွံညိင်ရ။
ပၟတ်ကဝ်တူဒၟံင် ဂလအ်လဵုရောဟီုမ္ဂး စပ္တံနူ -တ္ၚဲစပလီုကဝ်တေံ စဵုကဵုကဝ်တူအိုတ် ပၟတ်ကဝ်ဂွံပၠိုတ်ဏအ်ဂှ် ဒှ်အာအခိင်မွဲအသင်္ချေယျကပ်ရ၊ အခိင်ကဝ်တူမံင် မွဲအသၚ်္ချေယျကပ်ဏအ်ဂှ် ညးကော်စ " သံဝဋ္ဋကပ်" အခိင်ဂလအ်တုပ်ကဵု (၆၄)အန္တရကပ်ကီုရ။
ကာလပၟတ်ကဝ်ပၠိုတ်အာတုဲ ဒၞါဲကဝ်တူလဝ် ဂၠးတိဏအ်ကီု ဒၞါဲဘုံနရက်ကီု ၜဳမှာသၟိဒ်တအ်ကီု ဘုံသွဝ်ကီု ဒၞါဲဘုံဗြီုပထမဇျှာန်တအ်ကီု မုဟွံသှေ် ဒှ်အာဒၞါဲသၠးမွဲရ။
လ္ပာ်သၟဝ်မ္ဂး ဗလးအာကာသာနန္တ လ္တူအာကာသ အနန္တဂှ် ဗလးကျာ လ္တူဗလးကျာဂှ် ဗလးဍာ်လေဝ်ဟွံမွဲရ၊ လ္တူဍာ်ဂှ်တိလေဝ်ဟွံမွဲရ လ္ပာ်လ္တူလေဝ် ဘုံသွဝ်ဟွံမွဲ ဘုံဗြီုပထမဇျှာန်ပိဘုံလေဝ်ဟွံမွဲရ။
ဂၠုမံင်တုဲ ဒၞါဲသၠးတဴဒၟံင်မုလေဝ်ဟွံမွဲ ဗီုဏအ်ဂှ် လုကဴမွဲအသၚ်္ချေယျကပ်ပၠန်ရ။ နူကဝ်တူအိုတ်အာတုဲ ဂလအ်ဂွံစခၞံကဝ်ပၠန် မုဟွံမွဲသၠးမံင်အတိုင်ဏအ် လုကဴကာလဏအ်ဂှ် ညးကော်စ " သံဝဋ္ဋဌာယဳ အသၚ်္ချေယျကပ်ရ။
တင်စၟတ် -
၁။အဃောကဝ်တူ " သံဝဋ္ဋကပ်" မွဲအသၚ်္ချေယျကပ်ကီု။
၂။ကဝ်တူအာတုဲ မုလေဝ်ဟွံမွဲ ''သံဝဋ္ဋဌာယဳကပ်" မွဲအသၚ်္ချေယျကပ်ကီု။
၃။အဃောခၞံမံင်ကဝ် "ဝိဝဋ္ဋကပ်" မွဲအသၚ်္ချေယျကပ်ကီု။
၄။ကဝ်တန်တုဲ အဃောညိင်မံင် " ဝိဝဋ္ဋဌာယဳကပ်" မွဲအသၚ်္ချေယျကပ်ကီု -
တအ်ဂှ် မွဲမွဲအသၚ်္ချေယျကပ်မ္ဂး ဂလအ်ဍေံ (၆၄)အန္တရကပ် တုပ်ပ်ညးသ္ကအ်ရ။
အသၚ်္ချေယျကပ် (၄)ကပ်ဏအ်ဂှ် ညးကော်ခဴစ " မွဲမဟာကပ်"ရ။
မွဲမဟာကပ်ဂှ် " မွဲကဝ် "လေဝ် ကော်ခဴစရ။