မဟာစေတဳ (ကွာန်ကအ်သိုက်)
ကျာ်မဟာစေတဳ နွံ ပ္ဍဲဘာကအ်သိုက် ကွာန်ကအ်သိုက်၊ ပွိုင်ဍုင်ကျာ်မြဟ် တွဵုရးဍုင်မန်။ ကျာ်စေတဳဝွံ အတိုင်ဝင်မ္ဂး တၠညးစိင်ဗတာင် သၟိင်ဗညာဥူ ပ္တန်လဝ် နူကဵု သက္ကရာဇ်ဍုင် ၇၂၈ ရ။ ဗွဲကြဴ ညးဂမၠိုင် က္လေင်လဟဵု ပလေဝ်ကၠုင်လဝ် အဆက်ဆက်တုဲရ။
ဝင် ပလေဝ်ဒါန်
အတိုင်ဝင်ကျာ်မ္ဂး ကျာ်စေတဳဝွံ တၠညးစိင်ဗတာင် သၟိင်ဗညာဥူ ပ္တန်လဝ် ပ္ဍဲဗုဒ္ဓသာသနာ ၁၉၁၀ သက္ကရာဇ်ဍုင် ၇၂၈ ပ္ဍဲအခိင် ညးမပဒတဴဒၟံင် ပ္ဍဲဍုင်ဝါန်ရ။ ပ္ဍဲကျာ်စေတဳဝွံ ညးသၠိုင်စုတ်လဝ် ဓါတ်သော်မွဲတၞုင် ကဵု သရဳရဓာတ် ထပှ်မ မြဴသာ်ဝွံ ဟီုလဝ်ရ။ [၁]
ပ္ဍဲဗုဒ္ဓသာသနာ ၂၄၉၂ သက္ကရာဇ်ဍုင် ၁၃၁၀ ဂိတုဒုတိယဒဂိုန် ၈ မမံက် တ္ၚဲအဒိုတ် ပယာံသဝ်တ္ၚဲဂှ် ၝောအ်ကိုဋ် ကျာ်ဒတုံပိုတ်စှ်ေတုဲ ကောန်ကွာန်ကအ်သက် ကအ်ဇြဲ ကအ်ဇၞော်တအ် ထပ်ပလေဝ်လဟဵုတုဲ သက္ကရာဇ်ဍုင် ၁၃၁၂ ဂိတုမာဃ် ၁၅ မမံက် တ္ၚဲဗုဒ္ဓဝါဂှ် ကၠောန်သဘင်ပ္တိုန်က္ဍိုင်ကျာ်ရ။[၁]
ပ္ဍဲဗုဒ္ဓသာသနာ ၂၅၅၅ သက္ကရာဇ်ဍုင် ၁၃၇၃ ဂိတုမြေက္ကသိုလ် ၁၄ မမံက် တ္ၚဲသိုက်ဂှ် ကျာ်စေတဳဝွံ ဒေါမ်လာ်စှ်ေ စဵုစိုပ်ဂဒအ်ဗြာတ်တုဲ ဒါယကာဂမၠိုင် ဇၞော်ပ္တိုန် ကျာ် ၈ ၝောအ်တဲ၊ က္လေင်လဟဵုပတိုန် ကျာ်စေတဳဝွံရ။ ပ္ဍဲအခိင်ဂှ် ဂိတုပုဟ် ၅ မမံက် တ္ၚဲဗြဴဗတိဂှ် သီုဒက်ပ္တန် စရောတ်ကျာ် ၂၃ တၞုင်၊ ဗွဲဒိုဟ်ဗမံက် ၂ တၞုင်၊ ဒိုဟ်အဂၞဲ ၃ တၞုင်၊ ဒိုဟ်သၠုင်ကျာ ၃ တၞုင်၊ ဒိုဟ် နေရတိ ၃ တၞုင်၊ ဒိုဟ်ပလိုတ် ၃ တၞုင်၊ ဒိုဟ်ဗာယပ် ၃ တၞုင်၊ ဒိုဟ်သၟဝ်ကျာ ၃ တၞုင်၊ ဒိုဟ်ဨသာန် ၃ တၞုင်ရ။ မွဲအဆက်ဓဝ် တၠသဒ္ဓါစေတနာ မံက်ဂတဝ်ကၠုင်တုဲ ကၠောန်ဗဒှ် ရုပ်ကျာ်ပဋိမာရုပ် ၄ ဇကု၊ ဗွဲဒိုဟ်သၟဝ်ကျာ ၂ ဇကု၊ ဒိုဟ်အဂၞဲ ၁ ဇကု၊ ဒိုဟ်သၠုင်ကျာ ၁ ဇကုရ။[၁]
ပ္ဍဲဗုဒ္ဓသာသနာ ၂၅၅၅ သက္ကရာဇ်ဍုင် ၁၃၇၃ ဂိတုဖဝ်ရဂိုန် ၆ မမံက် တ္ၚဲစန်ဂှ် က္ညနိမန်နင် ဓါတ်ကျာ် ကေုာံ ဓါတ်တၠအရှန်ဂမၠိုင် နူဘာဓါတ်ကျာ်၊ ဍုင်ကၟာဝက်ရးဇြာတုဲ ဓါတ်တအ်ဂှ် ဒုင်ပူဇဴ ပွိုင် ၂၁ တ္ၚဲတုဲ ပ္ဍဲဂိတုဖဝ်ရဂိုန် ၁၁ စွေက် တ္ၚဲအဒိုတ် အခိင် နူဂယး ၈ နာဍဳဂှ် ဓါတ်တအ်ဂှ် သၠိုင်စုတ် ပ္ဍဲစရောတ်ကျာ်စေတဳဂမၠိုင်ဂှ်ကီု သီုကဵု ပ္ဍဲကဵု ရုပ်ပဋိမာရုပ်ဂှ်ရ။ ဓါတ်မသၠုင်စုတ်လဝ်ဂမၠိုင်ဂှ် ဓာတ်သာ်ဗၠဲ၊ သာ်ဆီ၊ သာ်ထဝ်၊ သာ်သြန်၊ ဓါတ်တၠအရှန်ဂမၠိုင်ဂှ် ဓာတ်မဟာထေရ်မောဂ္ဂလာန်၊ မဟာထေရ်သာရိပိုတ်၊ မဟာထေရ်ရာဟုလ၊ မဟာထေရ်အနုရုဒ္ဓ၊ မဟာထေရ်ကစ္စာယ်၊ မဟာထေရ်ဗာကုလ၊ မဟာထေရ်သဳဝလိ၊ မဟာထေရ်အင်္ဂုလိမာလ၊ မဟာထေရ်ဥပါလိ၊ သီု ကျာ်ပဋိမာရုပ်ကီု သီုကဵု လိက်တၞးထဝ် ဓဝ်ဓမ္မက္ကန်။[၁]
ပ္ဍဲဗုဒ္ဓသာသနာ ၂၅၅၅ ဂိတုစဲ ၁၃ မမံက် တ္ၚဲသိုက် အခိင်ပယာံနူဂယးဂှ် ကၠောန်သဘင် ပ္တိုန်ၝောအ်ကိုဋ်/က္ဍိုင် စရောတ်ကျာ်ဂမၠိုင် ၂၃ ဇကုကီု သီုကဵု ကျာ်စေတဳဍောတ်တြေံ ၈ ဇကုဂှ်ရ။ [၂]
နိဿဲ ပလေဝ်ဒါန်
- ↑ ၁.၀ ၁.၁ ၁.၂ ၁.၃ (ကအ်သိုခ်), ကျာ်ဇၞော်အစာ ပညာပဝရဇိန (24 August 2023). " width="500" ဝင်ကျာ်မဟာစေတဳ ဘာကအ်သိုခ် ကွာန်ကအ်သိုခ် ပွိုင်ဍုင်ကျာ်မြဟ်. Open.
- ↑ ဗန်, တၠ (24 August 2023). " width="500" လ္ၚောဝ်ကျာ်ဓရ်သင်. Open.