မအရေဝ်ဝေါဟာမန်တၟိ ထေက်ကဵုဒးမာန်ပ္တိုန်သုၚ်စောဲစကာအိုတ်စိုအ်

မ္ၚဵုသီုညးဖ္အိုတ်ရအဴကောန်ဂကူမန်တအ်

တ္ၚဲဏံမိက်သ္ဂောံစမာန်ပ္တိုန်ကေတ်မအရေဝ်ဝေါဟာမန်ပိုဲတၟိတၟိထေက်ကဵုဒးသုၚ်စောဲပ္ဍဲဘဝလၟေၚ်လၟေၚ်ဏံဂှ်ကီု သီုဂွံကၠုၚ်မအရေဝ်ဝေါဟာမန်ပိုဲဂွံဂၠိုၚ်တိုန်ကၠုၚ်သွက်သၟတ်အနာဂတ်တံဂွံသုၚ်စောဲအာဂှ်တုဲ ခၞံဗဒှ်ကၠုၚ်က္ဍိုပ်လိက်(မအရေဝ်ဝေါဟာမန်တၟိထေက်ကဵုဒးမာန်ပ္တိုန်သုၚ်စောဲစကာအိုတ်စိုအ်)ဏံကီုရအဴ ။

အမရေဝ်ဝေါဟာမန်ပိုဲလေဝ် သုၚ်စောဲစကာကၠုၚ်ဒၟံၚ်ဂၠိုၚ်ကဵုသၞာံရိုဟ်လၟိဟ်ဟွံမာန်ကီုလေဝ် တ္ၚဲဏံဒှ်ကၠုၚ်အခေတ်မွဲတုဲ ၜိုတ်ဆမအရေဝ်ဝေါဟာမန်ပိုဲနွံဒၟံၚ်တုဲတုဲကၠုၚ်တံဂှ်သုၚ်စောဲဟွံရုံဂပ်ပ္ဍဲဘဝလၟေၚ်လၟေၚ်တ္ၚဲဏံအိုတ်တုဲ တ္ၚဲဏံလေဝ်ပိုဲတံဇၟာပ်ညးအဲထေက်ကဵုဒးမာန်ချူကၠာဲသိုၚ်ပ္တိုန်ကေတ်မအရေဝ်ဝေါဟာနူကဵုဘာသာညးသ္အာၚ်တုဲ ဗီုပိုဲကောန်ဂကူတံကၠိုဟ်စိုတ်ပ္ဍဲကဵုမအရေဝ်ဝေါဟာညးတၞဟ်တံဂှ် ညံၚ်သ္ဂောံဒှ်မအရေဝ်ဝေါဟာမန်ပိုဲတၟိအပိုၚ်ဒြပ်မန်ပိုဲဇေတ်ဇေတ်ညံၚ်သ္ဂောံဂတာပ်ကဵုအခိၚ်အခေတ်ကာလဒေသအိုတ်တုဲ ညးတၠပညာအ္စာစောန်စောန်တံဂှ်ကီု သီုကဵုခမဳသၚ်ခရှ်တံလေဝ်ဇၟာပ်ညးအဲတာလျိုၚ်အခေါၚ်မာန်ပ္တိုန်မအရေဝ်ဝေါဟာမန်ပိုဲတၟိတၟိဂွံအိုတ်တုဲ ညံၚ်ဟွံဒးသုၚ်စောဲမအရေဝ်ဝေါဟာညးသ္အာၚ်တုဲ ဗီုပိုဲတံကၠိုဟ်စိုတ်ပ္ဍဲကဵုမအရေဝ်ဝေါဟာညးတၞဟ်တံဂှ် ပ္ဍဲကဵုမအရေဝ်ဝေါဟာဘာသာမန်ပိုဲလေဝ်ဒးနွံကီုတုဲ တ္ၚဲဏံစိုပ်ကၠုၚ်အခိၚ်ယျတှ်ေ ပိုဲကောန်ဂကူတံသီုဖအိုတ်လေဝ်မၚ်မံၚ်အတိုၚ်ဏံလအ်အာဖျးအာတုဲ ဇၟာပ်ညးအဲလုပ်ကေတ်တာလျိုၚ်ချူကၠာဲမာန်ပ္တိုန်မအရေဝ်ဝေါဟာမန်ပိုဲတၟိတၟိညံၚ်သ္ဂောံဂတာပ်အခေတ်အိုတ်စိုအ် ။

ပ္ဍဲကဵုတ္ၚဲဏံအခေတ်ပါ်ပရအ်ဗဟုသုတလ္တူလပှ်ကျာအာကၠုၚ်ဆဵုစိုပ်မာန်ညးသ္ကံကော်စ(Social Media)ဏံတုဲ မအရေဝ်ဝေါဟာပ္ဍဲကဵုဂကူညးသ္အာၚ်ဗီုပိုဲကောန်ဂကူတံကၠိုဟ်စိုတ်တုဲ ညံၚ်သ္ဂောံဒှ်တိုန်မရေဝ်ဝေါဟာမန်ပိုဲဇေတ်ဇေတ်အပိုၚ်မွဲကီုတုဲ ဣဏံရပိုဲတံဒးဓမံက်ပတိုန်မအရေဝ်တၟိတၟိတုဲ ညံၚ်ဟွံဒးသုၚ်စောဲစကာမအရေဝ်ညးတၞဟ်ဂၠိုၚ်ဂၠိုၚ်တုဲ ဗွဲမဂၠိုၚ်ညံၚ်သ္ဂောံကော်ဟီုလဴဘာသာမန်ပိုဲကၠးကၠးသောၚ်သောၚ်ကၠိုဟ်စိုတ်လောဲအိုတ်တုဲ ပိုဲတံထေက်ကဵုဒးဓမံက်မအရေဝ်ဝေါဟာမန်ပိုဲကီုအိုတ်ညိ၊ သာ်ဂှ်ဟွံသေၚ်တှ်ေ အခေတ်တ္ၚဲဏံလေဝ် မန်ပိုဲနွံအာစိုပ်ပေၚ်ပြးဍုၚ်ဇဳၜဳကၠောံဇၟာပ်ဋ္ဌာန်ဒေသအိုတ်တုဲ အကြာဏံဟေၚ်မအရေဝ်နူကဵုဂကူညးတၞဟ်တၟေၚ်တၟေၚ်ညံၚ်သ္ဂောံဒှ်အာမအရေဝ်ဝေါဟာမန်ပိုဲတၟိခိုဟ်မွဲကီုတုဲ ပိုဲတံဒးကၠာဲသုၚ်စောဲစကာအိုတ်ညိ၊ ဗွဲကိုပ်ကၠာဂှ်တှ်ေ ၜိုန်ရဟီုဂးဟွံဒးစကတောဝ်ကီုလေဝ် ဟိုတ်နူအကေၚ်မိၚ်လဝ်အောန်ပ္ဍဲမအရေဝ်မန်ပိုဲတုဲ တၟိတၟိဏံတှ်ေကလၚ်စဝါတ်မံၚ်ကီုရ၊ ယဝ်ပိုဲစကာအာလအ်လဏောၚ်တှ်ေ ဒှ်ကၠုၚ်မအရေဝ်စပုၚ်သုၚ်ဍာ်ဏံကီုရ၊ ယဝ်ပိုဲဟွံကၠာဲထောံမအရေဝ်မန်ပိုဲမ္ဂးတှ်ေ ပိုဲကောန်ဂကူတံလေဝ် ဒးသုၚ်စောဲစကာဒၟံၚ်မအရေဝ်ဝေါဟာညးတၞဟ်ဂၠိုၚ်ပ္ဍဲအရာပေါဲသဳကၠဳပေါဲတက်ကျာပါ်ပရအ်ဗဟုသုတနကဵုဘာသာမန်တံဂှ်လေဝ် ပိုဲတံဒးဟီုဗြံက်ဏာသီုအရေဝ်ဗၟာသီုအရေဝ်သေံသီုအရေဝ်အေၚ်္ဂလိခ်တုဲမှဂွံဆက်ဟီုလဴဘာသာမန်ရ၊ လဆောဝ်တှ်ေ ပ္ဍဲအရေဝ်ညးတၞဟ်ဇကုဟီုဂွံကီုလေဝ် ယဝ်ဒးဟီုလဴပသောၚ်ကဵုမအရေဝ်မန်ဗက်ဂှ်ဒှ်ကၠုၚ်တၚ်ဝါတ်ဂါတ်ရ၊ လဆောဝ်တှ်ေဒုၚ်စမအရေဝ်ဂကူညးတၞဟ်တံလေဝ်နွံတဴဗဝ်သအဝ်ပ္ဍဲပေါဲသဳကၠဳနာနာကောန်ဂကူမန်ပိုဲတံရ။

မအရေဝ်ဝေါဟာမန်ပိုဲၜိုတ်ညးတၠပညာတံချူစွံလဝ်နွံကီုလေဝ်စဵုကဵုလၟုဟ်ညးလ္ၚဵုတံဟွံသုၚ်စောဲအိုတ်တုဲ ဗက်အၚာပ်စိုတ်ပူဂဵုဇကုဗီုခံၚ်ဂှ်သုၚ်စောဲဟီုဂးဒၟံၚ်စဵုကဵုတ္ၚဲဏံဏီရ၊ ကဏ္ဍဏံလေဝ်ဇၟာပ်ညးအဲတာလျိုၚ်နွံဒၟံၚ်တုပ်တုပ်ဖ္အိုတ်တုဲ ညံၚ်ဂွံဒှ်မအရေဝ်ဝေါဟာမန်ပိုဲလတ်လတ်ကၠးကၠးဓဝ်ဓဝ်တပ်တပ်သောၚ်သောၚ်ဂှ်ဒးသုၚ်အာမာန်တှ်ေ မအရေဝ်မန်ပိုဲလေဝ်ပဵုမံက်ဂၠိုၚ်တိုန်တုဲ အရာကၠိုဟ်စိုတ်နဲကဲဂတာပ်အခေတ်လေဝ်တုပ်ကၠုၚ်ကဵုဂကူဍုၚ်တောတက်တံကီုရ၊ မအရေဝ်ဝေါဟာတၟိတၟိဗီုပိုဲကောန်ဂကူတံကၠိုဟ်စိုတ်ဂှ်ပ္ဍဲကဵုမလိက်မန်ပိုဲဟွံမွယ်ဟွံသေၚ်ပုဟ်တုဲ ဟိုတ်နူကဵုပိုဲကောန်ဂကူတံဟွံဟီုနကဵုမအရေဝ်ဝေါဟာမန်ဇကုဂှ်ကီု မအရေဝ်ဝေါဟာမန်ပိုဲတံဂှ်လေဝ်ဟွံကေၚ်မိၚ်နွံအောန်မံၚ်တုဲ ယဝ်ဟီုဏာပေၚ်ပြးလေဝ်ရိုၚ်ဇိုၚ်ထေၚ်ခယျစအိုတ်တုဲ ဟွံဆက်လ္ၚတ်ဂၠာဲနကဵုမအရေဝ်ဝေါဟာဇကုအိုတ်တုဲ သုၚ်စောဲထောံမအရေဝ်ဝေါဟာညးတၞဟ်တံလေဝ်တီကၠိုဟ်မံၚ်သီုညးၜါလပါ်ရတှ်ေဒုၚ်စရ၊ ဟိုတ်သာ်ဏံဟေၚ်ရမအရေဝ်ဝေါဟာမန်ပိုဲတၟိတၟိမံက်ကၠတ်ပါ်တိတ်ကၠုၚ်နွံအောန်ဒၟံၚ်တုဲ ဗွဲမဂၠိုၚ်ဟေၚ် ပ္ဍဲကဵုဂကောံဍောတ်လဒေါဝ်စဵုကဵုစိုပ်ကဆံၚ်သၠုၚ်တၠပညာတံလေဝ်ဒးသုၚ်စောဲဒၟံၚ်မအရေဝ်ဝေါဟာညးသ္အာၚ်ဗြံက်နှဴအာကဵုမအရေဝ်မန်ပိုဲတံကီုအိုတ်ရ။

ပြသၞာမအရေဝ်မန်ပိုဲဒးမံၚ်လက္ကရဴနူမအရေဝ်ညးသ္အာၚ်တံဂှ် မူတမ်ဍေံဂှ်တှ်ေကၠုၚ်နူမၞိဟ်ဂွံမာန်ကၠာဲချူပ္တိုန်ကေတ်မအရေဝ်တၟိတၟိစၞးပိုဲဒးဟီုမအရေဝ်ညးသ္အာၚ်ဂှ်ရဟွံမွယ်ဟွံမံက်ကၠတ်ပါ်တိတ်ကၠုၚ်တုဲ စဵုကဵုတ္ၚဲဏံလေဝ် ၜိုန်ရဘာတုဲလဝ်နူဍုၚ်မ္ၚးတေံကီုလေဝ် ပ္ဍဲအရာသဳကၠဳတက်ကျာကဵုဗဟုသုတတံဂှ် ဒၞာဲဒးဟီုမအရေဝ်မန်ပိုဲကၠးကၠးဂှ်တှ်ေဒးဟီုထောံမအရေဝ်ညးတၞဟ်တုဲမှမအရေဝ်မန်ပိုဲဆက်ဟီုဗွဲလက္ကရဴရ၊ လဆောဝ်တှ်ေ မအရေဝ်မန်ကၠာဲဟွံဂတာပ်တုဲဒုၚ်စမအရေဝ်ညးသ္အာၚ်တံဂှ်ရ၊ မအရေဝ်ညးသ္အာၚ်ဂှ်ဟီုဒှ်ဂုဏ်ဖဵုဟွံသေၚ်ပုဟ်၊ ယဝ်ရပိုဲတံဟီုဂွံမအရေဝ်ဝေါဟာမန်ပိုဲတှ်ေ ညးကဆံၚ်သၟဝ်သၟဝ်တံဂှ်လေဝ်ကၠိုဟ်စိုတ်လောဲကီုတုဲ သီုကဵုမအရေဝ်ဝေါဟာမန်ပိုဲဂွံကၠတ်ပါ်တိတ်မံက်ကၠုၚ်မာန်သွက်သၟတ်အနာဂတ်တံဂွံသုၚ်စောဲဆက်အာအာယုက်တၞုၚ်တၞးမအရေဝ်ဝေါဟာမန်ပိုဲမာန်ကီုရ။

အခေတ်လၟုဟ်လေဝ် လ္တူလပှ်ကျာဂှ်ဒှ်ဋ္ဌာန်ပါ်ပရအ်ဗဟုသုတခိုဟ်မွဲဒၞာဲတုဲ ညးမွဲကဵုညးမွဲ ဂကောံမွဲကဵုမွဲလေဝ် လုက်စုတ်ဆက်စဠောံညးသ္ကံပြဟ်ပြေဟ်လောဲသွာညးသ္ကံအိုတ်တုဲ မအရေဝ်မန်ပိုဲတၟိတၟိယဝ်မံက်ကၠုၚ်တုဲစသုၚ်စောဲစကာကၠုၚ်အိုတ်တှ်ေ ဒှ်အခေါၚ်မအရေဝ်ဝေါဟာမန်ပိုဲဂွံစိုပ်အာပြဟ်ပြဟ်မာန်ဇၟာပ်ဒၞာဲဆီမန်ပိုဲနွံပေၚ်ပြးဇၟာပ်ဍုၚ်တံဂှ်မာန်လောဲလောဲသွာသွာရ၊ သာ်ဏံဟွံသေၚ်မ္ဂးတှ်ေ ပိုဲတံဒးဟီုမအရေဝ်ညးတၞဟ်တုဲမှဂွံဆက်ဟီုမအရေဝ်မန်ပိုဲတွဵုရတုဲ မအရေဝ်မန်ပိုဲတၟိတၟိဟွံမံက်ကၠတ်ပါ်တိတ်ကၠုၚ်တုဲ အာဂတနူဏံဟေၚ် ပိုဲတံဒးသုၚ်မအရေဝ်ညးတၞဟ်ဂၠိုၚ်ကၠုၚ်လၟိုန်ရ၊ ဥပမာတုန်−ပ္ဍဲကောံဓရီုဍုၚ်မန်ပိုဲတေံလေဝ် ညးကဆံၚ်သၠုၚ်သၠုၚ်တံကဵုဗဟုသုတပ္ဍဲညးဍုၚ်ကွာန်တံဂှ်တှ်ေ မအရေဝ်ဗၟာဒးပါမံၚ်တွဵုတွဵုဂှ်ဂွံဆဵုကေတ်ရ၊ အမရေဝ်ဗၟာပိုဲဒးဟီုဂှ်လေဝ် ယဝ်ပိုဲကၠာဲသ္ပမအရေဝ်မန်ပိုဲတှ်ေကလၚ်စခိုဟ်ကွေံကွေံရ၊ အမရေဝ်ညးတၞဟ်ၜိုန်ရဒးဟီုကီုလေဝ် ညံၚ်သ္ဂောံနွံပါအောန်ရှ်စှ်ဟိုတ်ဖဵုဍေံတုဲဟီုပသောၚ်လဴဏာတှ်ေဒှ်ဖဵုခိုဟ်သွက်ညးကလၚ်တံရ၊ တုဲတှ်ေဗဵုစခိုဟ်ကွေံနူလညာတ်ညးကလၚ်တံပ္ဍဲကဵုညးမဟီုတံဂှ်တှ်ေ ဟွံထ္ၜးရုပ်ရဴအဲစောန်ရအဲကၠိုဟ်တီအိုတ်ရသာ်ဏံဗွဲတုန်။

ဥမမာတုန်ဒးဆဵုဒးမိၚ်ဒၟံၚ်တွဵုဟီုဂှ်တှ်ေ −−−အာပေါဲ(ကောံဓရီု)ဟီုဂးအောန်တုဲ ဟီုတဴအာ(အစီးဝေး)၊ သွဍာတ်သွဇြောတ်ဟွံဟီု ဟီုတဴသွ(ဟင်းချို)၊ ဗံၚ်ကလောံဟွံဟီုတုဲ ဟီုတဴ(ဆပ်ပြာ)၊ တၟံကလောံဟွံဟီု ဟီုတဴ(ရေခဲ) ၊ နုၚ်ထုၚ်ဟွံဟီု ဟီုတဴ(ရေပုံး) ၊ သာ်ဏံဗွဲတုန်၊ မအရေဝ်တံဏံဂှ်ဒှ်မအရေဝ်တၟိဟွံသေၚ်တုဲ အရေဝ်မန်ပိုဲလေဝ်နွံမံၚ်တုဲတုဲရ၊ လၟုဟ်တှ်ေဂတာပ်ကၠုၚ်အခေတ်မွဲတုဲ မအရေဝ်နွံကဵုအဓိပ္ပါဲဟိုတ်ဖဵုခိုဟ်ခိုဟ်ဆေၚ်စပ်ကဵုသွက်ဘဝကီု သွက်ဂကောံအိန်ထံၚ်ကီု သွက်နဲကဲဗဂဵုလဟဵုသွာၚ်နာနာတံဂှ်ကီု သွက်ပညာစိုတ်ကီု သွက်ဂဥုဲဒြဟတ်စိုတ်တံကီုဂှ် အကေၚ်ပိုဲမိၚ်လဝ်နွံအောန်ပ္ဍဲမအရေဝ်မန်ပိုဲတံတုဲ ဆဂး ယဝ်ပိုဲတံဟီုအရေဝ်ညးတၞဟ်ဗှ်လိက်ဘာသာညးတၞဟ်တုဲတှ်ေပိုဲကၠိုဟ်မံၚ်ရပ္ဍဲစိုတ်တေံ ဆဂး ပိုဲဂွံကလေၚ်ဟီုပ္တိတ်နကဵုမအရေဝ်မန်ပိုဲဇေတ်ဇေတ်ကၠးကၠးဂှ်နွံအောန်မံၚ်တုဲ ဣဏံဟေၚ်ရပိုဲကောန်ဂကူသီုညးဖ္အိုတ်လေဝ် တ္ၚဲဏံဒှ်တာလျိုၚ်ဇၟာပ်ညးအဲသီုဖ္အိုတ်တုဲ ဗီုပိုဲကၠိုဟ်စိုတ်ဗီုအရေဝ်ညးသ္အာၚ်ဂှ် ပိုဲလေဝ်ညံၚ်ဂွံဟီုကေတ်နကဵုမအရဝ်ဝေါဟာမန်ပိုဲအပိုၚ်ဂှ်လေဝ်တာလျိုၚ်နွံဒၟံၚ်သီုညးဖ္အိုတ်ကီုရအဴ ။

နိဿဲ−ကၠုၚ်နူပရေၚ်ဆဵုဂဗလၟေၚ်လၟေၚ်တ္ၚဲ ။