ဝိဇ္ဇာနန္ဒ (ဝေဒဂူ)၊ ကျာ်ဇၞော်အ္စာ
ကျာ်ဇၞော်အ္စာ ဝိဇ္ဇာနန္ဒ (ဝေဒဂူ) ဝွံ ဒှ်အစာချူလိက်မန် မဆေင်ကဵု ပရေင်ပညာဗဟုသုတနာနာတုဲ ဟိုတ်ယၟုမကဵုလဝ် ယၟုကၞေဟ် ဝေဒဂူ တုဲ ကျာ်ဇၞော်ဝေဒဂူ မြဴသာ်ဝွံ ညးဂမၠိုင် မတီလဝ်ညးရ၊၊ ကျာ်ဇၞော်ဝွံ နူအဝဲဍောတ်တ် စကတ်ကၠုင်လိက်ပရိယတ်တုဲ ပ္ဍဲသဘင်သွဟ်လိက်၊ သဘင်ကလေင်လိက်တအ်ဂှ် မလေပ်ကလိဂွံကၠုင် လာပ်ဂုဏ်တၟေင် မပ္တံ ပထမ၊ ဒုတိယတုဲ ပ္ဍဲအရာမပြိုင်ချူလိက်လေဝ် ပါလုပ်ကၠုင် နူဍောတ်တ် စဵုကဵုအာယုက်ဇၞော်ရ၊၊ ကျာ်ဇၞော်ဝွံ ဒှ်ညးမပ္တန်လဝ် ဒတန်သာသနာ ဘာဂြိုပ် မဟာဗောဓိ မၞုံဗၟံက် ကွာန်ဝင်ဒုန်တုဲ ချူခၞံလဝ် လိက် သီုဖအိုတ် (၅၀) ကၞပ်ပြင်ရ၊၊
| ကျာ်ဇၞော်အ္စာ ဝိဇ္ဇာနန္ဒ (ဝေဒဂူ) | |
|---|---|
 | |
| သၠးဂၠံဂဝ် |
မာံတေန်ထောန် အဝ်ဂေတ် ၂၈၊ ၁၉၃၃ ကွာန်တာတြေံ |
| စုတိ |
နဝ်ဝေမ်ဗါ ၁၄၊ ၂၀၀၇ (အာယုက် ၇၄) ကွာန်ဝင်ဒုန် (မုဟ်ဍုင်) |
| ဂကူ | ဂကူမန် |
| မဒယှ်တဴ | အစာချူလိက် |
| အံက် | နာဲညောအ်၊ မိသိင် |
| ဂယိုင်လမျီု | နွံပိုန်ဘာ |
ပထမအဝဲ ပလေဝ်ဒါန်
လၟောဝ်ကျာ်ဇၞော်အ္စာ ဝိဇ္ဇာနန္ဒ (ဝေဒဂူ)ဝွံ က္တဵုဒှ်မၞိဟ် ဇရေင် နာဲညောအ်၊ မိသိင် ပ္ဍဲသက္ကရာဇ်ဍုင် ၁၂၉၅ ဂိတုဘတ် (၉) မံက် (၂၈ အဝ်ဂေတ် ၁၉၃၃) တ္ၚဲဗုဒ္ဓဝါ ပ္ဍဲကွာန်တာတြေံ ပွိုင်ဍုင်မုဟ်ဍုင်ရ၊၊ ပၞောဝ်ကဵု ကောန်မွဲမိ မၞိဟ်ထပှ်တၠဂှ် ညးဒှ်ကောန် မရနုက်ကဵု ပန်ရ၊၊ နူဍောတ်တ်တေအ် ခုတ်လဝ်ယၟု မာံတေန်ထောန်ရ၊၊
ကာလ မာံတေန်ထောန် မကလိဂွံအာယုက် (၉) သၞာံ ပ္ဍဲသက္ကရာဇ်ဍုင် ၁၃၀၄ ဂှ် မာံတေန်ထောန် ဂှ် မိမၜါ အာပအပ်ဘာ ပ္ဍဲဘာကွာန်တာတြေံ ဇရေင်ကျာ်ဇၞော်အ္စာ ဘဒ္ဒန္တကောသလ္လတုဲ ကာလမပေင်အာယုက် (၁၄) သၞာံ ပ္ဍဲသက္ကရာဇ်ဍုင် ၁၃၀၉ ဂှ် မိမၜါ ဒုင်ဂိုင်ကေတ် ပစ္စယ်ပန်တုဲ သ္ပကဵုထပိုယ် ပ္ဍဲဘာကွာန်တာတြေံ ကလိဂွံယၟုထပိုယ် သောမ ရ၊၊ ကာလမအာစိုပ်အာယုက် (၂၀) ပ္ဍဲသက္ကရာဇ်ဍုင် ၁၃၁၄ ဂိတုပုဟ် (၉) မံက် အခိင်ဂယး (၉း၀၀) နာဍဳဂှ် ဒုင်ဂိုင်ကေတ်ပစ္စယ်ပန် နူမိမၜါတုဲ သ္ပဥပ္ပဇ္ဇျယ် ကုကျာ်ဇၞော်အ္စာကောသလ္လတုဲ ဂွံအာစိုပ် ဒဒှ်ဘဝခမဳမပြဲ ပ္ဍဲခဏ္ဍသိမ် ဘာကွာန်တြေံ ပွိုင်ဍုင်မုဟ်ဍုင်ရ၊၊ ကာလဂှ် ကလိဂွံ ယၟုခမဳ နာဲဝိဇ္ဇာနန္ဒရ၊၊
အ္စာမနိဿဲလဝ်ဂမၠိုင် ပလေဝ်ဒါန်
ကျာ်ဇၞော်အ္စာဝိဇ္ဇနန္ဒဝွံ ဂွံနိဿဲကေတ်လဝ် ဇရေင်ကျာ်ဇၞော်အ္စာ ဘဒ္ဒန္တကောသ္လ ဘာကွာန်တာတြေံ၊ ကျာ်ဇၞော်အ္စာတၠ ဘဒ္ဒန္တပုပ္ဖရသ ဘာပုပ္ဖာရာမ ဍုင်မုဟ်ဍုင်၊ ကျာ်ဇၞော်အ္စာတၠ ဘဒ္ဒန္တအာဒိစ္စ (အဂ္ဂမဟာပဏ္ဍိတ၊ အဘိဓဇအဂ္ဂမဟာဇောတိက၊ သြဝါဒါစရိယ ကၟိန်ဍုင်) ဘာမဟာယျေန် ကွာန်ကဒဵု၊ ကျာ်ဇၞော်အ္စာ ဘဒ္ဒန္တစန္ဒိမာ ဘာဂြိုပ်ခေမိကသိပ္ပံ ကွာန်ဖအံက်၊ ကျာ်ဇၞော်အ္စာ ဘဒ္ဒန္တတေဇောဘာသ ဘာသာသနမေဒနဳ၊ ကွာန်ကၟာမဵုဂမၠိုင်တုဲ ဂွံကတ်လ္ၚတ်ကၠုင် ပရိယတ် ကဆံင်သၠုင်သၠုင်ရ၊၊
ကျာ်ဇၞော်အ္စာဝွံ နူဘဝထပိုယ် လုပ်ကလေင်လိက် ပ္ဍဲသဘင်ကလေင်လိက်ဓမ္မဝိနယ ဂကောံဂိုဏ်ပံင်ကောံ ပ္ဍဲဘာကၟာဆီ (လၟုဟ် ရာမညဝေပုလ္လ ပါဠိတက္ကသိုလ်)တုဲ ပၞောဝ်ကဵု သင်မကလေင်လိက် ဗၞတ် (၃၀၀) ဂှ် ကလိဂွံ လာပ်ပထမရ၊၊ ဟိုတ်နူမကလိဂွံ လာပ်ပထမဂှ်ရ နူကဵု ဂကောံမန် ကေုာံ သကိုပ်ဝန်ဇၞော်နာဲနုတအ် ပလံင်ဗစိုပ်ကဵု ဍုင်သိင်ဃဵု၊ ဍုင်အိန္ဒိယရ၊၊
ကျာ်ဇၞော်အ္စာဝွံ ပ္ဍဲသဘင်သၟာန်သွဟ်လိက် ဂကောံသာသနပါလ ဍုင်မုဟ်ဍုင်ဂှ် အံင်ဇၞးကေတ် ကဆံင်ပထမ၊ ကဆံင်ဒုတိယ၊ သဘင်သၟာန်သွဟ်လိက် ဂကောံသဒ္ဓမ္မပါလ ဍုင်မတ်မလီုဂှ် အံင်ဇၞးကၠုင် ကဆံင်ပထမ၊ ကဆံင်ဒုတိယ၊ တုဲပၠန် ပ္ဍဲသဘင်သၟာန်သွဟ်လိက်အလဵုအသဳဂှ် အံင်ဇၞးကေတ် တန်ဍောတ်၊ တန်ဒေါဝ်ရ၊၊ လၟောဝ်ကျာ်ဇၞော်အ္စာဝွံ ပ္ဍဲအရာမကတ်လိက်ပရိယတ်ဂှ် ဆန္ဒ၊ စိတ္တ၊ ဝဳရိယ၊ ဝိမံသ ဟိုတ်နူမဍိုက်ပေင်စိ နူဘဝကွးဘာ၊ ထပိုယ်၊ ခမဳတေအ် ပ္ဍဲသဘင်ကလေင်လိက် ကလိဂွံလာပ်ပထမ ပိသၞာံဆက်ဆက်ရ၊၊ ၜိုန်ဂှ်လေဝ် ဟိုတ်နူ ပရေင်ထတ်ယုက် ဟွံခိုဟ်တုဲ အဃောဂၠုင်ဂြိုပ်ဒၟံင်ဂှ် ညံင်ရဴကသုကဝ်အာကီု ဒးဇူထောအ် နူ ဘဝကတ်လ္ၚတ်ပရိယတ်ရ၊၊
ဘဝအစာကၞေဟ် ပလေဝ်ဒါန်
ကျာ်ဇၞော်အ္စာဝွံ ဟိုတ်နူ လုပ်ကၠုင် သဘင်ကလေင်လိက် သဘင်သၟာန်သွဟ်လိက်ဂမၠိုင်ဂှ်ရ ဒြဟတ်ကာယ အောန်ကၠုင်တုဲ ပရေင်ထတ်ယုက်လေဝ် ဟုတ်ယုတ်ကၠုင်ရ၊၊ ဟိုတ်ဂှ်တုဲ ဇူဒေါအ် နူဘဝကောန်ကတ်လိက်တုဲ ကွာ်လိုန်ကၠုင် ဂၠံင်တရဴအ္စာကၞေဟ်မွဲရ၊၊ ဗွဲစၟတ်တုန် ဂွံဒှ်အ္စာကၞေဟ်ခိုဟ်ခိုဟ်မွဲဂှ် ဟွံလောဲသွာရ၊၊ ဒးဍိုက်ပေင်တဴ ကုဗဟုသုတ လမိင်လညာတ်ဏောင်ဂှ် တီကေတ်တုဲ ကျာ်ဇၞော်အ္စာဝွံ ညံင်ဂွံဒှ် ဗဟုသုတမာန် ရန်တၟအ်သာ်ဂှ်တုဲ ကျာ်ဇၞော်အ္စာ ပကောံကၠုင်လဝ် လိက်တၟအ် လိက်သၠရိုတ် လိက်ဘာသာမန်၊ ဗၟာ၊ ပါဠိ၊ အင်္ဂလိက် မဆေင်စပ် ကုလောကဳ လောကုတ္တဵုဂမၠိုင် ဗၞတ် (၃၀၀၀)အုပ်တုဲ ပ္ဍဲဘာကျာ်ဇၞော်အ္စာ ဒှ်ဒၟံင် ညံင်ရဴ တိုက်ဗွဟ်လိက်ဇၞော်ဇၞော်မွဲကီုရ၊၊
ကျာ်ဇၞော်ဝွံ ဟိုတ်မစိစောန် ပ္ဍဲအရာလောကဳ လောကုတ္တဵု ဘာသာမန်၊ ဘာသာဗၟာတုဲ ပ္ဍဲအရာမချူလိက်မ္ဂး ဟွံဒးချပ်လအ်မွဲသာ် နဲသဒ္ဒါစှ်ေစှ်ေ ချူမာန်ရ၊၊ နူဘဝခမဳမွဲဝှ်တေအ် စလုပ်ကၠုင် ပေါဲပြိုင်လိက်ပတ်ဂမၠိုင်တုဲ ကလိဂွံလဝ် လာပ်ဒုတိယရ၊၊ ကြဴနူဂှ် စဵုကဵုကလိလောန်စဴအာ ဆက်လုပ်ကၠုင် ပေါဲပြိုင်လိက်ပတ်၊ ပေါဲပြိုင်ကၠာဲဘာသာ၊ ပေါဲပြိုင်ဟီုအရေဝ်၊ ပေါဲပြိုင်လိက်ပရေင်၊ ပေါဲပြိုင်ကဗျ ပ္ဍဲဍုင်လ္ဂုင်၊ ဍုင်မတ်မလီု၊ ဍုင်မုဟ်ဍုင်၊ ကွာန်ကၟာဝက်၊ ကွာန်ကအ်ဗိန် ဟွံဒးဒုင်ကျဟောံအာမွဲသာ် ကလိဂွံကၠုင်လဝ် လာပ်လၟိန်ရောင်ဂှ် ဂွံတီကေတ်ရ၊၊
ကျာ်ဇၞော်အ္စာ ဘဒ္ဒန္တဝိဇ္ဇာနန္ဒဝွံ သွက်ကောန်ဂကူမန် ဂွံဒှ်ဒတုဲဖိုလ် လောကဳ လောကုတ္တဵု ၜါသာ် ၜါပြကာ ရန်တၟအ်တုဲ ချူခၞံကၠုင်လိက် သီုဖအိုတ် (၅၀) ကၞပ်ပြင်ရ၊၊
စိုတ်ဓါတ် ကေုာံ ပရေင်ပတန်သာသနာ ပလေဝ်ဒါန်
ကျာ်ဇၞော်အ္စာ ဘဒ္ဒန္တဝိဇ္ဇာနန္ဒဝွံ ဟိုတ်မၞုံကဵုအလေအ်စိုတ် မိက်ဂွံမံင် ပ္ဍဲဘာဂြိုပ် ဒၞာဲမၜိုဟ်သြိုဟ်နွံတုဲ ပ္ဍဲတိုက်လိက် လတူဍုင်ဇၞော်ဂမၠိုင် ဆမွဲဝှ်ကီု ဟွံကေင်မံင်ကၠုင်လဝ်ရ၊၊ ကာလမကလိဂွံ ဘဝခမဳ (၁၂) ဝှ်ဂှ် ပဒတဴ ပ္ဍဲဘာဂြိုပ်၊ မၞုံဗၟံက်ကွာန်ဝင်ဒုန် ပွိုင်ဍုင်မုဟ်ဍုင်တုဲ ဘာဂှ်ဒါယကာ ကပ္ပိယဟွံမဲ ဆညးမွဲဇကုဟေင် မိန်ဗဗေင် ကၠေင်သ္ၚာစှ်ေပိဏ္ဍပါတ် ဇကုမွဲဓဝ် သ္ပဒတဴကၠုင်လဝ်တုဲ ပတန်ကၠုင် သာသနာရ၊၊ ဘာကျာ်ဇၞော်အစာ မမံင်လဝ်ဂှ် ဟိုတ်နူ အလဵုဇကု တၞံဇြဲဗောဓိ မဒှ်အလဵုဇကုကျာ်ဇၞော် မတဵုလဝ်ဂှ်တုဲ ဘာဂှ် ညးကော်စ ဘာမဟာဗောဓိရ၊၊
နူသက္ကရာဇ်ဍုင် ၁၃၂၆ စပတန်ကၠုင်ဘာတုဲ အခါမပေင်ကၠုင် ပွိုင် ၄၃ သၞာံ ကိစ္စပရိယတ်၊ ပဋိပတ်၊ ချူလိက်တအ်ဂှ် ဟွံဂွံပိုတ်သကုတ် ပ္တိတ်ဒြဟတ်လွဳပရာကၠုင်တုဲ ပ္ဍဲသက္ကရာဇ်ဍုင် ၁၃၆၉ ဂိတုကထိုန် (၅) မံက် (၁၄ နဝ်ဝေမ်ပါ ၂၀၀၇) အခိင်ဂယး ၇ နာဍဳကဵု ၈ မိနေတ်ဂှ် စုတိစဴအာသွဝ်ရ၊၊[၁]
နိဿဲ ပလေဝ်ဒါန်
- ↑ အနာဂတ်မန် ကၞပ် (၉) မုက်လိက်၃၄-၃၅