သဘၚ်ဍေန်ပၟတ်ပၞာၚ်သ္ဍဴလိုက်ဝှ်
ပ္ဍဲပွိုၚ်မွဲသၞာံဂှ် ရိုဟ်လၟိဟ်တ္ၚဲမ္ဂး နွံ (၃၆၅-တ္ၚဲ) ရိုဟ်လၟိဟ် ဂိတုမ္ဂး နွံစှ်ၜါဂိတုရ၊ ပၞောဝ်စှ်ၜါဂိတု ဂိတုဝှ်ဂှ် ရဲဗုဒ္ဓဘာသာတအ် စၟတ်ပိုၚ်ခြာလဝ် ဂိတုပရဲမွဲဂိတုကီု၊ နူဒဂိုန်မွဲစွေက် ဒဵုစိုပ်ဂိတုဝှ်ပေၚ်ဂှ် မွဲဝှ်ပိဂိတု ရဴဝွံကော်ခဴစအိုတ်ရ၊ တ္ၚဲသဳဗပေၚ်ဝှ်ဂှ် ဒှ်တ္ၚဲသဳလိုက်ဝှ်တုဲ ပ္ဍဲတ္ၚဲဂှ် ခမဳသၚ်တအ် သှ်ပဝါအိုတ်ရ။
လိုက်ဝှ်တုဲမ္ဂး ကျာဗၟံက်လေဝ် ပိုက်စှ်ေရ၊ တိလေဝ်ကှ် သြောံပရဟ်လေဝ် ဍုဟ်တဴရ၊ ဂိတုဝှ်ဂှ် တၞီလုပ်ဒၟံၚ်ပ္ဍဲဥတုဗြဲတုဲ လဆောဝ်လဆောဝ် ဗြဲဂူရ၊ နူဝှ်မွဲစွေက် ဒဵုစိုပ်ကထိုန်ပေၚ်ဂှ် ဒှ်တ္ၚဲအပိုၚ်အခြာ ကဵုဒါန်လလး ကထိုန်ရ၊ ဟိုတ်ဂှ်ရ ဂိတုဝှ်ဝွံ တၞီလုပ်ဒၟံၚ် ပ္ဍဲသမယ လလးကထိုန်ကီုရ။
ကွေတ်ပြဝေဏဳ ရဲဗုဒ္ဓဘာသာတအ် နွံမွဲသာ်ဂှ် အဃောကျာ်တြဲက္တဵုဒှ်ကျာ် မိကျာ်တြဲ နွံပ္ဍဲသွဝ်တာဝတိၚ်တေံရ၊ကျာ်တြဲဂှ် တၞဟ်နသ္ဂောံခၠေဝ်ရော် ဂုဏ်မိ တွံဓဝ်အဘိဓဝ် ပ္ဍဲဍုၚ်သွဝ်တာဝတိၚ်တေံ လုကဴမွဲဝှ် ပိဂိတုရ၊ ပ္ဍဲတ္ၚဲသဳဗပေၚ်ဝှ် တ္ၚဲလိုက်ဝှ်ဂှ် ကျာ်တြဲတ္ညစှ်ေကၠုၚ်ဍုၚ်မၞိဟ် ဍုၚ်သၚ်္ကဿနာဂဵု နူဍုၚ်သွဝ်တာဝတိၚ်ရ၊ ကာလဂှ် ကောန်ဍုၚ်ကောန်ကွာန်ဂမၠိုၚ် သွက်ဂွံဒုၚ်တၠုၚ်သ္ပပူဇဴ ကုကျာ်တြဲ မက္ညစှ်ေကၠုၚ် နူဍုၚ်သွဝ် တာဝတိၚ်တေံဂှ် နကဵုပၟတ်ပၞာၚ်သ္ဍဴ ပူဇဴအိုတ်ရ။
ဟိုတ်ဂှ်ရ ပတွဵုနူကာလဂှ်တုဲ ရိုဟ်စိုပ်ဂိတုဝှ်ပေၚ် ဇၟာပ်ဍုၚ်ဇၟာပ်ကွာန် ဋ္ဌာနဋ္ဌာန်ရးအိုတ်သီု ရဲဗုဒ္ဓဘာသာတအ် ဗဒှ်သဘၚ်ဍေန်ပၟတ်ပၞာၚ်သ္ဍဴလိုက်ဝှ်အိုတ်ရ။