သွာၚ်သမၠဲပတိုန်ကွတ် သွက်ပရေၚ်ပညာဘာသာဇဳ မပတိုၚ်ကဵုဘာသာမိ

သွာၚ်ကမၠောန်သမၠဲပတိုန်ကွတ် (ဗဳဗဳသဳဒဳ) သွက် ပရေၚ်ပညာဘာသာဇဳမပတိုၚ်ကဵုအရေဝ်ဘာသာမိ (ပဇတမ)

သွာၚ်ကမၠောန်ဗဳဗဳသဳဒဳ ဝွံ ရေၚ်တၠုၚ်ဒၟံၚ်ကမၠောန် သ္ဂောံပခိုၚ်သၠုၚ်ပတိုန်ကွတ် သွက်သၞောတ်ပရေၚ်ပညာ ဘာသာဇဳ မပတိုၚ်ကဵုအရေဝ်ဘာသာမိ (ပဇတမ ) ရောၚ်။ ရဲသွာၚ် ဗဳဗဳသဳဒဳ တအ် ကတ်လ္ၚတ်ကွတ်ပညာ စပ်ကဵု သဘဴဓဝ်/တၠုၚ်လအာ၊ နဲကဲဗ္တောန်ကွတ်အစာ ကေုာံ သီုကမၠောန်ဗမံက်ရုပ်ရဴနဇိုၚ်နတဲ သ္ဂောံကိတ်ညဳကဵု ပဘမ ဏအ် နူကဵုတၠပညာတအ်တုဲ ကၠောန်ခၞံဗဒှ်ဒၟံၚ် မပ္တံကဵု မူဗွိုၚ်ဇုတ်ဇၞော်ဗ္တောန်၊ နဲကဲပ္ကတ်ပ္ကေၚ်ကွတ်အ္စာ ကေုာံ အပေါတ်အထံက်အရီုကတ်ဗ္တောန်၊ သွက်ကောန်ၚာ်တအ် သ္ဂောံတ္ၚအ်မိပ်လဟိၚ်အာ အပ္ဍဲအရာကတ်လ္ၚတ်ပညာ နကဵုအရေဝ်ဘာသာဍေံ မတီကၠိုဟ်လဝ်ဂှ် ရောၚ်။ အတိုၚ်ကမ္မတဳပညာ ဒုၚ်လဝ်တဲမူဝါဒပိဘာသာ (မန်၊ ဗၟာ ကေုာံ အေၚ်္ကလိက်) ဂှ် သွာၚ်ဗဳဗဳသဳဒဳဏအ် ဗမံက်ဒၟံၚ်ရုပ်ရဴကမၠောန် ကၠောန်ခၞံဒၟံၚ် မပ္တံကဵု မူဗွိုၚ်ဇုတ်ဇၞော်ဗ္တောန်တန်ကောန်ၚာ် (KG Curriculum)၊ လိက်ဗွဟ်သဇိုၚ် (Primer)၊ အပေါတ်အထံက်အရီုဗ္တောန်ဂမၠိုၚ် ကေုာံ နဲကဲပ္ကတ်ပ္ကေၚ်ကွတ်အ္စာ တအ်ရောၚ်။ နူကဵုတၠဒါန် MEC ကေုာံ ဂကောံတၠကွတ် LSDO တအ်ပံၚ်တောဲတုဲ ကော်ဘိက်လဝ် တၠပညာ ညးမဆိုက်ဗ္ဒက်စိုန်သကီု စပ်ကဵု ပဘမ ဏအ်တုဲ ကဵုဒၟံၚ်အရီုဗၚ်ကွတ်ပညာ ကုကမၠောန် ဗဳဗဳသဳဒဳ မန်၊ ကရေၚ်၊ သေံဇၞော်၊ ကရေၚ်ဍာဲ၊ ကေုာံ ကယာန် တအ် နူကဵုသၞာံ ၂၀၁၉ တေံရောၚ်။ ဒုၚ်သဇိုၚ်ကဵု အရေဝ်ဘာသာကောန်ၚာ်တီကၠိုဟ် (ဘာသာမိ) ဂှ်တုဲ ကောန်ၚာ်တအ် သ္ဂောံကတ်လ္ၚတ် စသိုၚ်အာ ပရေၚ်ပညာနွံကဵုအသဝ်ဂုန်စရာဲ (quality education) ပေၚ်ၚ်မာန်ဂှ် အဃောရေၚ်တၠုၚ်ခၞံဗဒှ်ဒၟံၚ် အပေါတ်အထံက်အရီုဗ္တောန် နကဵုဘာသာမန် ဖိုဟ်ရ။ သ္အာၚ်နူဂှ် သွက်ဂွံကၠောန်ခၞံဗဒှ်အာ နဲကဲကောန်ၚာ်တအ် သ္ဂောံကတ်လ္ၚတ်လေပ်အာ ဘာသဒုတိယ (ဗၟာ) ကေုာံ ဘာသာတတိယ (အေၚ်္ကလိက်) ဗွဲမလောဲသွာမာန်ဂှ် ဆက်ဂိုတ်ဂ္စာန်လွဳပရာအာပၠန်ရောၚ်။ တုဲပၠန် ကမၠောန်မရေၚ်တၠုၚ်ဒၟံၚ် သီုဖအိုတ်ဂှ် သ္ဂောံကိတ်ညဳကဵု ယေန်သၞာၚ် အခိုက်ကၞာဒေသကောန်ၚာ်တအ်မာန်ဂှ် စမ်ၜတ်၊ မဒးဆဝ်မ္ၚုဟ်၊ ကေတ်ကသပ်လညာတ် နူညးဍုၚ်ကွာန်၊ မိမကွးဘာ၊ အ္စာ ကေုာံ ကွးဘာ တအ်တုဲ ကလေၚ်သ္ၚေဝ်ဂၠိပ် ရနုက်ဗပေၚ်ထပ်ပလေဝ်ဒၟံၚ် ထပ်ကဵုထပ် အဆံၚ်ၚ်ပၠန်ရ။ ဟိုတ်ဂှ်ရ သ္ဂောံသမၠုၚ်ပတိုန် အသဝ်ဂုန်စရာဲပညာကောန်ၚာ်တအ်ကီု၊ ကောန်ၚာ်တအ် သ္ဂောံကတ်လ္ၚတ် အာ ပညာနွံကဵုဂုန်စရာဲ ဗွဲမစှ်ေသၞောတ်စိုပ်တရဴ (Relevant & effective) မာန်ဂှ် သွာၚ်ကမၠောန်ဗဳဗဳသဳဒဳဏအ် ရေၚ်တၠုၚ်ဒၟံၚ် ကမၠောန်လၟေၚ်ၚ် ကရောံမိမညးဍုၚ်ကွာန်၊ အ္စာ၊ ကွးဘာ၊ ညးဒုၚ်ကာဌာနပညာ၊ ဂကောံကဵုကသပ် ကေုာံ ညးတာလျိုၚ်အဆံၚ်ၚ် တအ်ရောၚ်။

နိဿဲ