သၠ​ပတ်​ပ​ထ​မ​ကဝ် ၁

သၠပတ်ပထမကဝ် (၁)

^၁ပ္ဍဲတံပထမတေံဂှ် ကျာ်ဂမျိုၚ်ဝွံ အကာသဂှ်လေကီု၊ တိဇၞော်ဂှ်လေကီုက္တဵုပဒှ်လဝ်ရ။ ^၂တိဇၞော်မ္ဂးဂှ်၊ ဟွံမွဲကဵုရုပ်သာ်၊ အဇဟာသက်သက်ရ။ ဒမံၚ်မသ္ဇိုဟ်နက်ဂှ် ဒမၠုမဂြောပ်ဒလီုတုဲ၊ ဝိညာန်ကျာ်ဂမျိုၚ်ဝွံ ချဳဒရာၚ်ပ္ဍဲလတူဂၠးဍာ်ရ။

^၃ကျာ်ဂမျိုၚ်ဝွံ ကဵုဒးဒှ်လယး သာ်ဝွံ အသံမနွံတုဲ၊ ဒှ်အာလယးရ။ ^၄တေံလယးဝွံ ဒှ်ခိုဟ်ဂှ် ကျာ်ဂမျိုၚ်ညာတ်တုဲ၊ လယးကဵုဒမၠုဂှ် ကျာ်ပါ်ပိုၚ်ခြာလဝ်ရ။ ^၅လယးဝွံ နကဵုယၟုတ္ၚဲဂှ်လေကီု၊ ဒမၠုဝွံ နကဵုယၟုဗ္တံဂှ်လေကီု၊ ကျာ်သမုတ်ကော်ခဴတုဲ၊ သၟဝ်တ္ၚဲကဵုနူဂယးဂှ်ဒှ်ပထမရ။

^၆မွဲဝါပၠန်ဂမျိုၚ်ဝွံ၊ ပ္ဍဲအဒေါဝ်ဍာ်ဂှ် ကဵုဒှ်ဂၠးအမှဲရ။ ဍာ်ကဵုဍာ် ကဵု ပါ်ခြာလဝ် သာ်ဝွံ အသံကျာ်မနွံတဴရ။ ^၇ကျာ်ဂမျိုၚ်ကတဵုပဒှ်လဝ်ဂၠးအမှဲတုဲ၊ ဍာ်မနွံအသၟဝ်ဂၠးအမှဲအတိုၚ်ကျာ်မပိုၚ်ခြာလဝ်ဂှ် ဒှ်တဴရ။ ဂၠးအမှဲကျာ်မပိုၚ်ခြာလဝ်ဂှ်ဒှ်ရ။ ^၈ဂၠးအမှဲကျာ်ဂမျိုၚ်မသမုတ်ကော်ခဴနကဵုယၟုအကာသတုဲ၊ သၟဝ်တ္ၚဲကဵုနူဂယးဒှ်တ္ၚဲဒုတိယရ။

^၉မွဲဝါပၠန်ကျာ်ဂမျိုၚ်ဝွံ။ ဍာ်မနွံအသၟဝ် အကာသကဵုကောံဒရီု၊ ဒဵုကဵုမံက်ရ သာ်ဝွံ အသံကျာ်နွံတုဲ၊ အတိုၚ်အသံမနွံဂှ်ဒှ်တဴရ။ ^၁၀ဒဵုနကဵုယၟုတိဂှ်လေကီု၊ ဒမံၚ်ဍာ်မကောံဓရီုနကဵုယၟုမှာသ္မိတ်ဂှ်လေကီုကျာ်ဂမျိုၚ်သမုတ်ကော်ခဴတုဲ၊ တေံအရာဒှ်ခိုဟ်ဂှ် ကျာ်ဂမျိုၚ်ညာတ်တဴရ။

^၁၁မွဲဝါပၠန်ကျာ်ဂမျိုၚ်ဝွံ၊ တိဂှ် တၞံချောဲဂှ်လေကီု၊ တၞံသြောံမကဵုဒှ်သတ်သြောံဂှ်လေကီု၊ တၞံဆုမနွံကဵုမတုဲ မကဵုဒှ်ဂကူသတ်ဆုဂှ်လေကီု၊ ကဵုကၠုတ်တိုန်ရ သာ်ဝွံ အသံကျာ်နွံတုဲ အတိုၚ်အသံမနွံဂှ်ဒှ်တဴရ။ ^၁၂တိဝွံ တၞံချောဲဂှ်လေကီုတၞံသြောံမကဵုဒှ်ဂကူသတ်ဂှ်လေကီု၊ ပ္ဍဲဇကုဂှ် မဍေံပါမ္ဂး တၞံဆုမကဵုဒှ်ဂကူသတ်ဆုဂှ်လေကီုကဵုကၠုတ်တိုန်ရ။ တေံအရာဒှ်ခိုဟ်ဂှ် ကျာ်ဂမျိုၚ်ညာတ်တုဲ ^၁၃သၟဝ်တ္ၚဲကဵုနူဂယးဂှ်ဒှ်တ္ၚဲတတိယရ။

^၁၄မွဲဝါပၠန်ကျာ်ဂမျိုၚ်ဝွံ၊ တၞဟ်နသၟိက်ပိုၚ်ခြာတ္ၚဲကဵုဗ္တံဂှ် သ္ၚိလယးကဵုဒှ်ပ္ဍဲဂၠးအကာသရ။ သွက်နိမိတ်လက္ခဏာအခိၚ်အခါ၊ သွက်ဂွံပိုၚ်ခြာဂိတုတ္ၚဲ၊ သွက်ဂွံပိုၚ်ခြာသၞာံဂှ် ကဵုဒှ်ရ။ ^၁၅တန်ပ္ဍဲဂၠးအကာသတုဲ ကဵုဒှ်သ္ၚလယးဂွံယးတၟးပ္ဍဲလတူတိဇၞော်ရ သာ်ဝွံ အတိုၚ်အသံမနွံဂှ်ဒှ်တဴရ။

^၁၆သာ်ဂှ် ကျာ်ဂမျိုၚ်ဝွံ သ္ၚိလယးဇၞော်ၜါမ မတွံဂးညံၚ်ဂွံအုပ်လဒံတ္ၚဲမွဲမ၊ ညံၚ်ဂွံအုပ်လဒံဗ္တံမွဲမ၊ သီုကဵုသၞံၚ်ဂမၠိုၚ်တံဂှ် က္တဵုပဒှ်လဝ်တုဲ ^{၁၇-၁၈}တၞံနသၟိက်ဂွံယးတမးပ္ဍဲတိဇၞော်ဂှ်လေကီု၊ အုပ်လဒံတ္ၚဲကဵုဗ္တံတုဲ ညံၚ်ဂွံပိုၚ်ခြာလယးကဵုဒမၠုဂှ်လေကီု၊ ပ္ဍဲဂၠးအကာသကျာ်ဂမျိုၚ်စွံလဝ်ရ။ တေံအရာဒှ်ခိုဟ်ဂှ် ကျာ်ဂမျိုၚ် ညာတ်တုဲ ^၁၉သၟဝ်တ္ၚဲကဵုနူဂယးဒှ်တ္ၚဲစတုတ္ထရ။

^၂၀မွဲဝါပၠန်ကျာ်ဂမျိုၚ်ဝွံ၊ ဂျိုၚ်လမျိုၚ်စွံလဝ်တုဲ တိရစ္ဆာန်မလေပ်ချဳဂရာၚ်တံဂှ် ကဵုဍာ်က္ဍတ်ပါ်ဗွဲမဂၠိုၚ်ရ။ ဂစေံတံဂှ်လေ ကဵုပဝ်အာလတူတိဇၞော်အလုံမွဲဂၠးအကာသရ သာ်ဝွံ အသံကျာ်မနွံတဴရ။ ^၂၁သာ်ဂှ် ဍာ်က္ဍတ်ပါ်တိရစ္ဆာန်အတိုၚ်ဂကူဍေံဗွဲမဂၠိုၚ်တုဲ၊ မပ္တံကဵုကဇၞော်၊ ဂျိုၚ်လမျီုတုဲ တိရစ္ဆာန်မလေပ်ချဳဂရာၚ်အိုတ်သီုတံဂှ်လေကီု၊ ဂစေံမလေပ်ပဝ်အာအိုတ်သီုတံဂှ်လေကီုကျာ်ဂမျိုၚ်က္တဵုပဒှ်လဝ်တုဲ တေံအရာဒှ်ခိုဟ်ဂှ် ကျာ်ဂမျိုၚ်ညာတ်တဴရ။ ^၂၂ကျာ်ဂမျိုၚ်ဂှ်လေ က္ဍတ်ပါ်ဗွဲမဂၠိုၚ်ရ။ ကဵုဍာ်ၜဳဂမၠိုၚ်ပေၚ်တဴအိုတ်ရ။ ဂစေံဂှ်လေ ပ္ဍဲလတူတိဇၞော်ဂှ်လေ ကဵုဂၠိုၚ်တိုန်ရောၚ် သာ်ဝွံ ကဵုမ္ၚဵုမၚ်္ဂလပ္ဍဲတိရစ္ဆာန်ဂမၠိုၚ်တံဂှ်တုဲ ^၂၃သၟဝ်တ္ၚဲကဵုနူဂယးဒှ်တ္ၚဲပဉ္စမရ ^၂၄မွဲဝါပၠန်ကျာ်ဂမျိုၚ်ဝွံ၊ တိဝွံဂကူသတ္တံမဂျိုၚ်လမျိုၚ်မတွံဂးပြေၚ်ဂၠဴတံဂှ်လေကီုကဵုက္ဍတ်ပါ်ရ သာ်ဝွံ အတိုၚ်အသံကျာ်မနွံဂှ်ဒှ်တဴရ။ ^၂၅သာ်ဂှ် ကျာ်ဂမျိုၚ်ဝွံ ဂကူပြေၚ်ဂၠဴဂကူကၟီကၠဂကူတိရစ္ဆာန်မလေပ်ခမာအာပ္ဍဲလတူတိအိုတ်သီုတံဂှ် က္တဵုပဒှ်လဝ်တုဲ တေံအရာဒှ်ခိုဟ်ကျာ်ဂမျိုၚ်ညာတ်တဴရ။ ^၂၆မွဲဝါပၠန်ကျာ်ဂမျိုၚ်ဝွံ၊ တုပ်သၟဟ်ကဵုအယောၚ်အလာပိုဲညးကတဵုဒှ်မၞိဟ်အိုတ်စိုအ်။ ညးဝွံ ကပ္ဍဲၜဳတံဂှ်လေကီု၊ ဂစေံအကာသတံဂှ်လေကီု၊ တိရစ္ဆာန်ကွာန်တံဂှ်လေကီု၊ ကောန်ကုအလုံမွဲတိမွဲစွံသတ်မလေပ်အာပ္ဍဲလတူတိအိုတ်သီုတံဂှ်လေကီု၊ အုပ်လဒံရ သာ်ဝွံ အသံကျာ်နွံရ။ ^၂၇သာ်ဂှ် ကျာ်ဂမျိုၚ်ဝွံ တုပ်သၟဟ်ကဵုအယောၚ်အလာဇကုဂှ် က္တဵုပဒှ်လဝ်မၞိဟ်ရ။ တုပ်သၟဟ်ကဵုအယောၚ်အလာကျာ်ဂမျိုၚ်ဂှ် ကတဵုပဒှ်လဝ်မၞိဟ်တြုံကဵုမၞိဟ်ဗြဴတုဲ ^၂၈မၞးတံက္ဍတ်ပါ် ဗွဲမဂၠိုၚ်အိုတ်ရ။ ကဵုတိဇၞော်ပေၚ်တုဲ မာန်အိုတ်ရ။ ကပ္ဍဲၜဳတံဂှ်လေကီု၊ ဂစေံအကာသတံဂှ်လေကီု၊ ဂျိုၚ်လမျီုတုဲ တိရစ္ဆာန်မချဳဒရာၚ်ပ္ဍဲလတူတိအိုတ်သီုတံဂှ်လေကီုအုပ်လဒံအိုတ်ရ သာ်ဝွံ ဟီုပၟိၚ်တုဲ ကဵုမ္ၚဵုမၚ်္ဂလပ္ဍဲညးတံဂှ်ရ။ ^၂၉ကျာ်ဂမျိုၚ်ဂှ်လေ၊ ရံၚ်မွဲရ။ တၞံသြောံမကဵုဒှ်သတ်သြောံအလုံမွဲဂၠးတိဇၟာပ်ဇၟာပ်ဂကူတံဂှ်လေကီု၊ တၞံဆုမဍိုက်ပေၚ်သတ်မကဵုဒှ်မဍေံဇၟာပ်ဇၟာပ်ဂကူဂှ်လေကီု၊ သွက်မၞးတံဂွံစဂှ် အဲကဵုရ။ ^၃၀သတ်ဇိုၚ်ပန်ဂစေံအကာသ၊ ဂျိုၚ်လမျီုတုဲ ဂကူသတ်မခမာအာပ္ဍဲလတူတိအိုတ်သီုတံ၊ သွက်ညးတံဂွံစဂှ် အဲကဵုတၞံချောဲဇၟာပ်ဇၟာပ်ဂကူတံဂှ်ရ သာ်ဝွံ အသံမနွံတုဲ၊ အတိုၚ်အသံမနွံဂှ်ဒှ်တဴရ။ ^၃၁ကျာ်ဂမျိုၚ်ဝွံ ရံၚ်မွဲပွဆဇကုမက္တဵုပဒှ်လဝ်တုဲ ခိုဟ်ဗွဲမလောန်ဂှ် ညာတ်တုဲ၊ သၟဝ်တ္ၚဲကဵုနူဂယးဒှ်တ္ၚဲဆဌမရ။

နိဿဲ

ဂကောံသၠပတ်သမ္မာမန်