သၠပတ်ပထမကဝ် ၁၄
သၠပတ်ပထမကဝ် ၁၄
ပလေဝ်ဒါန်၁ပ္ဍဲကာလဂှ်၊ အာမ်ရာဖေလသၟီဇၞော်သှိဏာ၊ အာရောက်သၟီဇၞော်ဨလာသာ၊ ခေဍဝ်ရလဝ်မာသၟီဇၞော် ဨလာမ်၊ တိဍလသၟီဇၞော်ဂဝ်အိမ်တံဝွံ၊ ၂ကဵုၜေရသၟီဇၞော်သောဝ်ဍောမ်၊ ၜိရသှသၟီဇၞော်ဂေါဝ်မောဝ်ရ၊ သှိဏာပ် သၟီဇၞော်အာဍမာ၊ သှေမၝဵုသၟီဇၞော်ဇိၝီု၊ သၟီဇၞော်ၜေလာတံဂှ် ဗတိုက်ပၞာန်အိုတ်ရ။ ရးၜေလာမ္ဂးဂှ်၊ နွံကဵုယၟုဇောဝ်ရရောၚ်။ ၃တေံရးဆမနွံတံဝွံ ကောံဒၟံၚ်မွဲစွံပ္ဍဲခလံက်သိဒ္ဒိမ်မတွံဂးခၠိုၚ်ၜိုဝ်အိုတ်ရ။ ၄လုကဴစှ်ၜါသၞာံဒုၚ်ဍိက်ပ္ဍဲထာန်သၟီဇၞော်ခေဍဝ်ရလဝ်မာတုဲ ကာလမဒှ်စှ်ပိသၞာံသပုန်အိုတ်ရ။ ၅ဒှ်စှ်ပန်သၞာံတုဲ သၟီခေဍဝ်ရလဝ်မာဝွံ ကောံကုသၟီဇၞော်တံမနွံ လ္ပာ်ညးမွဲစွံကၠုၚ်တုဲ၊ ပ္ဍဲဍုၚ်အာသှတရောတ်ကာနိမ်၊ မၞိဟ်ရေဖိမ်ဂမၠိုၚ်ဂှ်လေကီု ပ္ဍဲဍုၚ်ဟာမမၞိဟ်ဇူဇီဂမၠိုၚ်ဂှ်လေကီု ပ္ဍဲခလံက်ကိရယထိမ် မၞိဟ်ဨမိမ်ဂမၠိုၚ်ဂှ်လေကီု၊ ၆ပ္ဍဲလတူဒဵုသိရမၞိဟ်ဟောဝ်ရိဂမၠိုၚ်ဂှ်လေကီုတ္ၚီုတုဲ၊ ဒဵုကဵုဍုၚ်ဨလပါရာန်မနွံဇရေၚ်ဂြိုပ်ဂှ် ဗက်အိုတ်ရ။ ၇မွဲဝါပၠန်ကလေၚ်ကၠုၚ်တုဲ၊ စိုပ်ပ္ဍဲဍုၚ်အေန်မိသှပါတ်၊ ရးကာဍေသှမ္ဂး ဆမနွံပ္ဍဲရးအာမလေက်ဂှ်လေကီု၊ မၞိဟ်အာမောဝ်ရိမမံၚ်ပ္ဍဲဍုၚ်ဟာဇဇောန္တာမာဂမၠိုၚ်ဂှ်လေကီု တ္ၚီုဂစိုတ်အိုတ်ရ။ ၈ပ္ဍဲကာလဂှ် သၟိၚ်ဇၞော်သောဝ်ဍောမ်၊ သၟီဇၞော်ဂေါဝ်မောဝ်ရ၊ သၟီဇၞော်အာဍမာ၊ သၟီဇၞော်ဇေၝိုမ်၊ သၟီဇၞော်ၜေလာမတွံဂးဇောဝ်ရတံဝွံ ဇက်တိတ်တုဲ၊ ပြိုၚ်ပၞာန် ပ္ဍဲခလံက်သိဒ္ဒိမ်အိုတ်ရ။ ၉သာ်ဂှ် ခေဍဝ်ရလဝ်မာသၟီဇၞော်ဨလာမ်၊ တိဍလသၟီဇၞော်ဂဝ်အိမ်၊ အာမ်ရာဖေလသၟီဇၞော်သှိဏာ၊ အာရောက်သၟီဇၞော်ဨလာသာမတွံဂးသၟီဇၞော်ပန်ဇကုကဵုသၟီဇၞော်မသုန်ဇကုတံပြိုၚ်ပၞာန်အိုတ်ရ။ ၁၀ပ္ဍဲခလံက်သိဒ္ဒိမ်က္တိုၚ်ဂမၠိုၚ်မပေၚ်ကဵုလၟက်ကၠေၚ်ဍာ်နွံရ၊ သၟီဇၞော်သောဝ်ဍောမ်ကဵုသၟီဇၞော်ဂေါဝ်မောဝ်ရတံဝွံ ဒြေပ်တုဲ ဒတုံစှ်ေပ္ဍဲက္တိုၚ်တေံဂမၠိုၚ်ဂှ်ရ။ ညးမသေဟ်ဒၟံၚ်တံဂှ် ဒြေပ်အာပ္ဍဲဒဵုအိုတ်ရ။ ၁၁သၟီမဇၞးတံဝွံ ဒြပ်ဗ္စဲဆမနွံ ပ္ဍဲဍုၚ်သောဝ်ဍောမ်ဍုၚ်ဂေါဝ်မောဝ်ရကဵုဇွိုအ်ဆမနွံတံဂှ် ကေတ်တုဲ အာအိုတ်ရ။ ၁၂လဝ်တကောန်ကောအာဗြာမ်မမံၚ်ပ္ဍဲဍုၚ်သောဝ်ဍောမ်ကဵုဒြပ်ညးဂှ်လေ သီကေတ်တုဲ အာရ။
၁၃ဗၠးနူဘဲဂှ်တုဲ ညးမဒြေပ်ကၠုၚ်မွဲဝွံ၊ ပ္ဍဲထာန်အာဗြာမ်မမံၚ်ဇရေၚ်ဂြိုပ်ကြောတ်မၞိဟ်အာမောဝ်ရိမာမ်ရေကောဨသှကောဝ်လကဵုအာနေရ၊ ညးမဒက်မိဿဟာဲယျကဵုအာဗြာမ်မၞိဟ်ဟေဗြာဲဂှ် စိုပ်တုဲ ကဵုပရိုၚ်ရ။ ၁၄အာဗြာမ်ဝွံ ဒဒှ်ကောန်ကောဇကုမဒုၚ်ရပ်ဏာဂှ် မိၚ်တုဲ၊ ဒုၚ်သၠးဂဗ္ဘပ္ဍဲသ္ၚိဇကုမ္ဂး မၞိဟ်မဒလောံဗ္တောန်ပိကၠံစှ်ဒစာံတံဂှ် စဳရေၚ်တုဲ ဗက်အာဒဵုကဵုဍုၚ်ဍာန်ရ။ ၁၅အခိၚ်ဗ္တံပါ်ကောန်ရဲဇကုတံတုဲ၊ ကဵုဗတိုက်ပလီုပလာ်တုဲ၊ ဒဵုကဵုဍုၚ်ဟောဝ်ၜမနွံလ္ပာ်တဲဇွိဍုၚ်ဍမာသကုဂှ် ဗက်ပၠန်ရ။ ၁၆ဒြပ်ဗ္စဲသတ်တြုတံမသီဏာဆမနွံဂှ်လေကီု ကောန်ကောဇကုလဝ်တကဵုဒြပ်ညးဂှ်လေကီု၊ မၞိဟ်ဗြဴဂမၠိုၚ်ကဵုမၞိဟ်တြုံဂမၠိုၚ်တံဂှ်လေကီုပလံၚ်နၚ်မွဲဝါပၠန်ရ။
၁၇နူကဵုမတက်ဂစိုတ်ခေဍဝ်ရလဝ်မာကဵု ညးမမံၚ်လ္ပာ်ညးတံဂှ် ကာလအာဗြာမ်မကလေၚ်ကၠုၚ်ဂှ်၊ သၟီဇၞော်သောဝ်ဍောမ်ဝွံ ညံၚ်ဂွံဝါၚ်ဒုၚ်တၠုၚ်ဂှ် တိတ်အာပ္ဍဲခလံက်သၟီဇၞော် မတွံဂးခလံက်သှာဝေရ။ ၁၈သၟီဇၞော်မေလခိဇေဍေက်မဒှ်ယတ်ပရောဟိတ်ကျာ်မသၠုၚ်အိုတ်ဂှ်လေ၊ ပလံၚ်ပ္တိတ်ကွာၚ်ကဵုဍာ်ဇဗျေတ်တုဲ၊ ၁၉တလအကာသတိဇၞော်၊ ကျာ်မသၠုၚ်အိုတ်ဂှ် ကဵုကိုဝ်မ္ၚဵုမၚ်္ဂလပ္ဍဲကဵုအာဗြာမ်ရ သာ်ဝွံ ကဵုပသေက်ပသဝ်မ္ဂး၊ ၂၀ကျာ်မသၠုၚ်အိုတ်မပ္အပ်သတ်တြုမၞးတံပ္ဍဲတဲမၞးဂှ် ကဵုနွံမၚ်္ဂလရ သာ်ဝွံ ဟီုဂးရ။
၂၁အာဗြာမ်ဝွံလေ ဒြပ်ဆမနွံတံဂှ် စှ်စွံမွဲစွံကဵုဒါန်ကဵုသၟီတေံရ။ သၟီဇၞော်သောဝ်ဍောမ်ဂှ်လေ၊ မၞိဟ်တံဂှ် ကလေၚ်ကဵုပ္ဍဲအဲညိ၊ ဒြပ်ဂမၠိုၚ်မ္ဂးဂှ် ဇကုကေတ်ညိရ သာ်ဝွံ ဟီုကဵုအာဗြာမ်တုဲ၊ ၂၂အာဗြာမ်ဝွံ၊ သၟီဇၞော်ဝွံ အဲကဵုအာဗြာမ်ဒှ်တသိုက်ရ သာ်ဝွံ ဒမံၚ်ဂွံဟီုတၞဟ်နဟွံမိက်ကဵုနွံဂှ်၊ ၂၃-၂၄ဒြပ်မၚ်ဗၠာဲတံစတုဲဂှ်လေကီု၊ ညးမဗက်ကောံကုအဲမွဲစွံအာနေရ၊ ဨသှကောဝ်လ၊ မာမ်ရေတံဝွံ ညံၚ်ဂွံကဵုကေတ်သွက်ဇကုညးတံဂှ် ကဵုအခေါၚ်မ္ဂး၊ သွက်ညးတံမကေတ်ဂှ်လေကီုစွံလဝ်တုဲ၊ ဒြပ်သၟီဇၞော်တောဝ်ပလုဲမွဲတၞုၚ်ကဵုဒှ်၊ ဇုက်ဂနပ်မွဲတၞုၚ်ကဵုဒှ်၊ ဆဗၞတ်မွဲမွဲအဲဟွံကေတ် သာ်ဝွံ ပ္ဍဲဂတကျာ်ထာဝရ၊ ကျာ်မသၠုၚ်အိုတ်၊ တလအကာသတိဇၞော်ဂှ်၊ အဲဝွံ ပၚ်တဲမ္ဂး ပသစ္စတုဲရ သာ်ဝွံ ဟီုကဵုသၟီဇၞော်သောဝ်ဍောမ်ရ။
နိဿဲ
ပလေဝ်ဒါန်ဂကောံသၠပတ်သမ္မာမန်