သၠ​ပတ်​ပ​ထ​မ​ကဝ် ၂

သၠပတ်ထမကဝ် ၂

^၁သာ်ဂှ် ကောံကုအကာသတိဇၞော်မွဲစွံအပေါတ်ကြိယျာအိုတ်သီုတံဝွံတုဲဒှ် တုဲအိုတ်ရ။ ^၂စိုပ်တ္ၚဲသတ္တမတုဲ ကျာ်ဂမျိုၚ်ဝွံ အရာမက္တဵုပဒှ်ဂှ်ပတုဲပဒှ်တုဲမ္ဂး၊ အရာကျာ်မက္တဵုပဒှ်လဝ်တံဂှ်တုဲ ဒှ်တုဲ ပ္ဍဲတ္ၚဲသတ္တမတေံဂှ် မံၚ်သီုမသ္ၚိတ်ဇြတဴရ။ ^၃တ္ၚဲသတ္တမတေံဂှ် ကျာ်ဂမျိုၚ်ဝွံ ကဵုမ္ၚဵုမၚ်္ဂလတုဲ ကဵုသ္အးဇ္ၚးတဴရ။ ဟိုတ်မ္ဂးဂှ်၊ ဟိုတ်အရာကျာ်မက္တဵုပဒှ်ပြုပြေၚ်သီုဖအိုတ်တံမတုဲ ဒှ်ဂှ်၊ ပ္ဍဲတ္ၚဲတေံဂှ် မံၚ်သီုမသ္ၚိတ်ဇြတဴရ။

^၄ဒတိတ်ဒဒှ်ဝွံမ္ဂးဂှ်၊ ပ္ဍဲတ္ၚဲကျာ်ဂမျိုၚ်ဝွံ နာဲညးထာဝရမက္တဵုပဒှ်လဝ်အကာသကဵုတိဇၞော်ဂှ်၊ ကာလကျာ်မက္တဵုပဒှ်လဝ်ဂှ် မူလအုပ္ပတ္တိအကာသကဵုတိဇၞော်ရောၚ် ^၅ကၠာတၞံမတဵုပ္ဍဲဝါဗ္ၚဟွံကၠုတ်ပ္ဍဲတိဏီ၊ ကၠာတၞံသြောံပ္ဍဲဝါဟွံဇၞော်ဟွံတိုန်ဏီဂှ်၊ တၞံဆမနွံတံဂှ် ကျာ်က္တဵုပဒှ်လဝ်။ ပ္ဍဲကာလကျာ်ဂမျိုၚ်နာဲညးထာဝရဟွံဂွံကဵုဗြဲဂူလတူတိဏီ။ မၞိဟ်မဂွံကၠောန်တိဟွံမွဲဏီဂှ်ဒှ်တုဲ။ ^၆သမူအမြာဲမတိတ်နူတိတုဲ ကဵုဍုက်မွဲဂၠးတိရ။

^၇ကြဴဂှ် ကျာ်ဂမျိုၚ်နာဲညးထာဝရနကဵုခနိက်တိက္တဵုပဒှ်လဝ်မၞိဟ်တုဲ၊ ပ္ဍဲကဵုမုဟ်ညးဗဂိုဟ်ပၠုပ်လမျီုမ္ဂး မၞိဟ်ဒှ်သတ္တံမဂျိုၚ်လမျီုရ။ ^၈ကျာ်ဂမျိုၚ်နာဲညးထာဝရဂှ်လေ ပ္ဍဲဒေသဨဍေန်ဒိုဟ်ဗၟံက်၊ တဵုလဝ်ကၠံမွဲတုဲ၊ မၞိဟ်မက္တဵုပဒှ်လဝ်ဂှ် ကျာ်ဖျေံကဵုဒၞာဲပ္ဍဲကၠံဂှ်ရ။ ^၉နူအပ္ဍဲတိဂှ် ရုပ်သာ်ဂေါဝ်ဆာဲမ္ဂး တၞံဆုအဘိုအ်ဂွံစခိုဟ်ဇၟာပ်ဇၟာပ်ဂကူဂှ် ကျာ်ဂမျိုၚ်နာဲထာဝရကဵု ကၠုတ်တိုန်ရ။ ပ္ဍဲအဒေါဝ်ကၠံဂှ် တၞံလမျီုဂှ်လေဝ်မနွံရ။ ခိုဟ်ကီုဟွံခိုဟ်ကီု၊ တၞံသွက်ဂွံတီ သာ်ဝွံလေ နွံရ။

^၁၀တၞံနသၟိက်ကဵုကၠံဍုက်ဍေက်ဂှ် ၜဳမွဲဇွောဝ်တိတ်နူကဵုဒေသဨဍေန်ဂှ်တုဲ မ္ၚးကၠံဂှ် ပါ်အာပန်သွာၚ်မ္ဂး ဒှ်အာၜဳပန်သွာၚ်ရ။ ^၁၁ၜဳပထမမ္ဂးဂှ် မနွံယၟုဂိသှောန်ရ။ တေံၜဳဂှ် ဇွောဝ်အာအလုံမွဲရး ဟာဝိလမနွံကဵုထဝ်ရ။ ^၁၂ထဝ်မဒှ်ကၠၚ်နူရးတေံဂှ် ခိုဟ်လောန်ရ။ ထၜိုတ်ဆုၜဍေလကဵုတၟံသှဟာမ်နွံကီုရ။ ^၁၃ၜဳဒုတိယမ္ဂးဂှ် မနွံကဵု ယၟုဂိဟာန်ရ။ တေံၜဳဂှ် အလုံမွဲရးကုသှဇွောဝ်အာတဴရ။ ^၁၄ၜဳတတိယမ္ဂးဂှ် မနွံယၟုဟိဍကေလရ။ တေံၜဳဂှ် ဇွောဝ်အာလက်ဗၟံက်ရးနဳဂီုအာသှုရိရ။ ၜဳစတုတ္ထမ္ဂးဂှ် မနွံကဵုယၟုဥဖရာတ်။

^၁၅ကာလဂှ် ကျာ်ဂမျိုၚ်နာဲညးထာဝရဝွံ ကေတ်မၞိဟ်တုဲ ညံၚ်ဂွံဝဳပရာမၚ်မွဲဨဍေန်ဂှ် စွံလဝ်ရ။ ^၁၆ကျာ်ဂမျိုၚ်နာဲညးထာဝရဂှ်လေ၊ ဝေၚ်နူတၞံဂွံတီခိုဟ်ကီုဟွံခိုဟ်ကီု၊ သတ်တၞံဆုဆနွံပ္ဍဲကၠံတံဂှ် သွက်မၞးဂွံစဂှ် အခေါၚ်မနွံရ။ ^၁၇သတ်တၞံဆုတေံမ္ဂးဂှ် စဟွံဂွံရ။ ပ္ဍဲတ္ၚဲမစဂှ် ဒးချိုတ်ဨကန္တရောၚ် သာ်ဝွံ ပညပ်လဝ်ကဵုမၞိဟ်ရ။ ^၁၈ကျာ်ဂမျိုၚ်နာဲထာဝရဂှ်လေ မၞိဟ်တြုံ၊ မံၚ်ညးမွဲဇကုဟွံခိုဟ်၊ ညးမထံက်ညးမထေက်ဂှ် သွက်ညးအဲကၠောန်ရောၚ် သာ်ဝွံ က္သပ်မနွံရ ^၁၉ကျာ်ဂမျိုၚ်နာဲညးထာဝရဝွံ သတ်ဇိုၚ်ပန်ကဵုဂစေံ အကာသအိုတ်သီုတံဂှ် နကဵုတိက္တဵုပဒှ်လဝ်တုဲ၊ မၞိဟ်ဝွံ အခိုက်လဵုသမုတ်ကော်ခဴရောၚ်ဂှ် တၞံနသၟိက်တီဂှ် ပလံၚ်နၚ်ပ္ဍဲဇရေၚ်မၞိဟ်ရ။ အတိုၚ်မၞိဟ်ကော်ခဴ သတ္တံမဂျိုၚ်လမျီုအိုတ်သီုတံဂှ် အတိုၚ်ဂှ် ယၟုတၞဟ်တၞဟ်မနွံရ။ ^၂၀သာ်ဂှ် မၞိဟ်ဝွံ ပြေၚ်ဂၠဴအိုတ်သီုတံဂှ်လေကီု။ ဂစေံအကာသအိုတ်သီုတံဂှ်လေကီု၊ ကၟီကၠအိုတ်သီုတံဂှ်လေကီုကဵုယၟုတုဲ ကော်တဴရ၊ ၜိုန်ဂှ်လေ ညးမထၜသဘာ်မၞိဟ်ဟွံမံက်ဟွံကၠုၚ်ဏီ။

^၂၁ပ္ဍဲကာလဂှ် ကျာ်ဂမျိုၚ်နာဲညးထာဝရဝွံ နကဵုဒဒှ်မသ္တိက်ဇၞော်ဂှ် သ္တိက်တုဲ၊ ဝါရမၞိဟ်သ္တိက်လှိၚ်ဂှ် ဇုတ်ထကဲမွဲတၞုၚ်ကျာ်နုက်ပ္တိတ်တုဲမ္ဂး၊ စဏးဇုတ်ဂှ် ကဵုဖျုန်စပ်လုပ်ရ။ ^၂၂ကျာ်ဂမျိုၚ်နာဲညးထာဝရဝွံ နကဵုဇုတ်ထကဲမနုက်ပ္တိတ်နူအပ္ဍဲမၞိဟ်ဂှ် က္တဵုပဒှ်လဝ်မၞိဟ်ဗြဴတုဲ ပ္ဍဲဒၞာဲမၞိဟ်မနွံဂှ် ပလံၚ်နၚ်ရ။ ^၂၃မၞိဟ်ဂှ်လေ လၟုဟ်ညးဝွံ ဇုတ်နူအပ္ဍဲဖျုန်အဲဂှ် မဒှ်ရ။ ဟိုတ်မနုက်ပတိတ်နူမၞိဟ်ဂှ် ဒှ်ကော်ညးမၞးဗြဴရောၚ် သာ်ဝွံ ဟီုတဴရ။ ^၂၄ဟိုတ်နူဂှ်၊ မၞိဟ်တြုံထောံမိမညးတုဲ၊ သၞေန်စပ်ပ္ဍဲသမ္ဘာဇကု၊ တေံညးၜါတံဝွံ ဒးဒှ်ဖျုန်မွဲဇကုမွဲရောၚ်။ ^၂၅တေံညးတြုံကဵုဗြဴညးၜါတံဝွံ ယာတ်ဟွံလတက်မံၚ်တုဲ ဗၠးနူကဵုဂဍိုက်ဂဝရ။

နိဿဲ

ဂကောံသၠပတ်သမ္မာမန်