အၚ်ခေဝ်၊ ကွာန်
အင်ခေဝ် (English: AnKe, မြန်မာ - အံခဲ)ဝွံ ဒှ်ဒတန်ကွာန်မန် နွံပ္ဍဲ (15.790972N, 97.729783E) တွဵုရးဍုန်မန် ပွိုင်ဍုင်ဇြပ်ဗုရ။ ကွာန်ဝွံ နွံဗီုပြင် ပန်ကၠင်တုဲ အရာပ်ဗၟံက် အရာပ်ပလိုတ် အရာပ်သၠုင်ကျာ အရာပ်သၟဝ်ကျာ အရာပ်သ္ကုတ်ကှ်ေ အရာပ်သ္ကုတ်ဇာ သီုဖအိုတ်(၆)အရာပ်ရ။ ဘာလကျာ် မၞုံယၟုဘာဇၞော် နွံမွဲမ၊ ဘာအလဵုသဳ တန်လဒေါဝ် နွံမွဲမ ကၠအ်ပ္ကဴသုသာန်၊ ရုင်ဂဥုဲ၊ ပၟတ်ဍုင်၊ ဒှ်ကွာန်မန်မွဲကွာန်ရ။
နိရုတ္တိ
ပလေဝ်ဒါန်ကွာန်အင်ခေဝ်ဝွံ နူမွဲအခိင်တေအ် ညးကော်စ ကွာန်တၟိရ။ ဗွဲကြဴ သ္ပအစာံကဵု အင်ဒဂါ တၞုင်ကွာန်ဂှ်တုဲ ညးကော်စ ကွာန်အင်ဒဂါ၊၊ နူကွာန်အင်ဒဂါ ဒှ်ကၠုင် ကွာန်အင်ခေဝ်ရ။
ပရေင်ဘာသာ
ပလေဝ်ဒါန်ဂကောံဂိုဏ်ပဝါရဏာအင်ခေဝ်
နူသက္ကရာဇ် ၁၃၃၃ သၞာံကျာ်ဇၞော်အ္စာတၠ ဘဒ္ဒန္တပညာဒဳပမဟာထေရ်(ဘာဇၞော်၊ ကွာန်အင်ခေဝ်) မဒှ်ဂဥုပ်ဂိုဏ် ပဝါရဏာအင်ခေဝ်ဂှ် မွဲဟာန်ကေုာံ ဂကောံဒါယကာဂမၠိုင် စကၠောန်ဗဒှ်လဝ် သဘင်ကလေင်လိက် ဗွဲလၟေင်သၞာံ ဟဂွံသ္ကုတ်ခြာအာရ။ ပ္ဍဲသက္ကရာဇ် ၁၃၄၂ သၞာံကျာ်ဇၞော်အ္စာတၠ ဘဒ္ဒန္တပညာဒဳပမဟာထေရ် စုတိကလိလောန်စဴအာသွဝ်တုဲ ကျာ်ဇၞော်အ္စာ ဘာဒေါဝ် ကွာန်ပြဳ ဂွံဒှ်အ္စာတၠရ။ ပ္ဍဲသက္ကရာဇ် ၁၃၄၉ သၞာံဂှ် ပပဓာန်ကုကျာ်ဇၞော်အ္စာတၠဘာဒေါဝ်တုဲ ကျာ်ဇၞော်အ္စာဂကောံဂိုဏ် မွဲဟာန်ကေုာံ အ္စာလိက်ဂမၠိုင် ထပ်ကၠောန်ဗဒှ်အာ သဘင်ကလေင်လိက်သွဟ်လိက် ပ္ဍဲဌာနဘာဒေါဝ် ကွာန်ပြဳရ။ သက္ကရာဇ် ၁၃၅၀ သၞာံဂှ် ကၠောန်ဗဒှ်သဘင် ကလေင်လိက်သွဟ်လိက် ပ္ဍဲဘာသဳဟရာဇာ ကွာန်လှာရ။ သက္ကရာဇ် ၁၃၅၁ ဂှ် ပ္ဍဲဘာဇၞော် ကွာန်အင်ခေဝ်။ သက္ကရာဇ် ၁၃၅၂ သၞာံဂှ် ဘာစောဝ်က၊ ဍုင်ဇြပ်ဗု။ သက္ကရာဇ် ၁၃၅၃ သၞာံဂှ် ပ္ဍဲဘာဇၞော်သၠုင်ကျာ၊ ကွာန်ကြုက်ပိ။
အတိုင်လၟေင်ဘာ မြဴသာ်ဝွံ ကၠောန်ဗဒှ်ကၠုင် သဘင်ကလေင်လိက်သွဟ်လိက် လၟေင်င်သၞာံရ။ ပ္ဍဲဘာ ဂကောံဂိုဏ်သၟေဟ်တအ် ဟွံသၟဟ်အစောံမ္ဂး ဘာမသုန်ဘာဝွံဟေင် ဒးကေတ်တာလျိုင် ဗွဲအတိုင်လၟေင်ပၠန်ရ။ ပ္ဍဲသက္ကရာဇ် ၁၃၇၃ သၞာံဂှ် သဘင်ကလေင်လိက်သွဟ်လိက် ဂကောံဂိုဏ်ပဝါရဏာအင်ခေဝ် ပေင်အာ ၂၅ သၞာံတုဲ ကၠောန်သဘင်သြန်ရတ် ပေင် ၂၅ သၞာံ ပ္ဍဲဘာဒေါဝ် ကွာန်ပြဳရ။