အမ်မြာယ်ဆာန်
လၚ်္ကာမ္ၚဵုပိစှ်ေဒ္စာံ ကံက်နုက်နူလိက်ဗွဟ်မန် တန်တတိယ အစဳဇန် - မန်သဝ်နဲ၊
မၞိဟ်သမၠီုဟေၚ် ဝေၚ်ပါဲအာညိ ဟွံနိသဲတုဲ စ္ဍးမံၚ်အာ ညးနွံပညာ ပံၚ်ဖက်အာတုဲ သဳကၠဳနိဿဲ ကေတ်နဲမာ ရတ်ပိပြကာ မိမၜါကီု သီုအ္စာဂှ် ပူဇဴအာ ကဵုတသိုက်ကၠာ ဆက်ဆောံအာ သာ်ဝွံပိပြာကာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
ကုသဵုပညာ သွက်ဂွံဂြပ်ပၠန် ဌာန်ဒတန်ဒးရး ဒးမံၚ်အာ အတိက်ကိုပ်ကၠာ ကေၚ်ပတုဲလဝ်ဟေၚ် တၟေၚ်ကုသဵုဂှ် ဒးနွံမာ ဇကုစိုတ်ပိုဲ ထိၚ်ဒက်လဝ်ညိ ညံၚ်ဂွံခိုဟ်ဂှ် သှ်ပတဴအာ ကဵုဂြပ်ရတ်ကၠာ ဌာန်ဒၟံၚ်အာ သာ်ဝွံပိပြကာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
ထေက်ကဵုလေပ်ကီု အရာအိုတ်သီုဂှ် မိၚ်ညာတ်သုတ ဒးနွံမာ ပရေၚ်ဝိဝါဟ အရာဗုၚ်ဂၞဴပၠန် သွက်လမျီုကွတ် ကတ်လ္ၚတ်အာ ဒ္ဂေတ်ဝတ်အိုတ်သီု အရာဆေၚ်ကဵုမၞိဟ် ဒးရးကတ်ဗ္တောန် ကၠိုဟ်ခၠၚ်အာ ဍာံစၟတ်ယေန်သၞာၚ် လဟီုပါၚ် ရမျာၚ်ကဵုသာယျာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။ ခတှ်မိမဂှ် သၟဟ်သိန္နရာဇ်ကၠာ ဒးရးပတုဲလဝ် ကၠောန်ဆာပ်အာ ခတှ်တၟိပၠန် သွက်ကောန်သမ္ဘာ ထံက်ပၚ်သၚ်ရိုဟ် ဒးကဵုမာ လျိုၚ်ဇကုဒးကၠောန် ပဆောတ်ယောၚ်ညိ ကဵုဗၠးဒုဟ်ပၠန် ဒးကၠောန်အာ ကဵုပိုန်ဟာန်ကၠာ ကၠောန်ၜိုတ်အာ သာ်ဝွံပိပြကာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
ကဵုသ္အးဇ္ၚးကၠာ စေတနာပိတန် ပါ်ပြအ်ကဵုဒါန် ဒးမာန်အာ ဇကုစိုတ်ပိုဲ ပဓီုဓုဲအိုတ် သုစရိုတ်ကွေတ် ဒ္ဂေတ်တိုန်ကၠာ ကလောမိတ်ပြဝါ ပလသာထောံညိ သၚ်္ဂဟဓရ်ပြဲဗလဲထံက်ဏာ သ္အးဇ္ၚးဗၠးဒုဟ် ဖဵုညးကၠာ ရေၚ်တၠုၚ်ယိုက်ဂၠေၚ်အာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
သရာံပါတ်ကီု သီုဖအိုတ်မာ ကၠာဟွံဆဵုပၠန် ဝေၚ်ခၠန်အာ ခါဆဵုညာတ်ပၠန် ပက္လိလောန်ညိ တၟေၚ်ဆေဝ်ဒဝ် မၚ်မွဲအာ အရက်သုရာ ပသုၚ်စညိ ဒှ်ဝိဝိၚ်မာ ဟိုတ်မာဲကၠာ ကၠောန်ၜိုတ်ဟီုပၠန် စွံသတိပ္တန် ဓရ်ပၠန်လ္ပဝိုတ်အာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
အာယုက်ဂုဏ်ဂှ် ဇၞော်နူဇကုပိုဲ သဳကၠဳခစ ရှ်ေသှ်ေကၠာ မာနဇၞော်အလာံ ပသၠုၚ်စွံလဝ် ဗဒေက်ဖျဝ်ဇကုကၠာ လၟိုန်မံၚ်အာ ပၟိက်လောဘ လ္ပဗက်စညိ ဆထေက်ကဵုဇကု ဒးမံၚ်အာ လ္တူဇကုပ္တုဲလဝ် ဂဏ်ညးတအ်ပြဲ ဗွဲတၟေၚ်ကဵုတီအာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။ မံစဗွိုက်လတက်သတြုအိုတ်သီု ထိၚ်ဒဝ်စိုတ်သၠုၚ် အေၚ်ဒုၚ်အာ ဟိုတ်ဖဵုစၞောန်ထ္ၜး ဂလာန်ဒၠေတ်ဗ္တောန်ပၠန် ညးဟီုကၠုၚ်မာ သွာကလၚ်အာ ခၟဳဇၞော်ညးပြဲ ရဲသီုဖအိုတ်ရ ခဏဟွံခြာ ညာတ်လ္ၚောဝ်အာ သဘာတအဆတ် ဍာံစၟတ်ပၠန် ချပ်ဂၞန်ဟွံသ္ကုတ်ခြာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
အာရလောကဳ သ္ၚဳၜူမာဲတုဲ ပမိတ်လောန်ပၠန် ဖန်ဒ္ဂေတ်အာ ဓရ်ဗြဟ္မဇဵု ဗိုန်ဗတ်ရပ်လဝ် ညံၚ်သပ္ပုရိုဟ်ဒ္ဂေတ် ပဗၠေတ်မှာ သစ္စပန်ဌာန် နဉာဏ်ညာတ်တုဲ ကဵုတီဍာံစၟတ် မှာတ်လွဳပရာ ဗၠးဒဒိုက်မာန် နိဗ္ဗာန်အထောတ် ဇၞော်မတ်ဒးသ္ပအာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
ဒဒိုက်တသိုက် သဘာဝ ဆဵုဂဗဟွံပိုတ်ညးဖအိုတ်ကၠာ ခိုဟ်ပရေံၜါတန် ဒွန်တောဲမံၚ်တုဲ မွဲလှ်ေပၠန် တန်လၟိုန်မာ လောကဓရ်ဂှ် ခါဒှ်ကၠုၚ်ပၠန် ပ္တန်စိုတ်ပညဳ လ္ပချဳအာ ထိၚ်ဒတ်သောက သဳၜတ်မှ ၜိုတ်ရဂွံတသိုက်ကၠာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။
ပိစှော်ဒ္စာံရောၚ် ဍောၚ်ဓရ်မ္ၚဵုဂှ် လီုလာ်စာ်ခြာ အလုံတိကၠာ ရးတေံဍုၚ်ဏအ် ရဗၚ်သ္ကအ်ပပၞာန် ညးမွဲကဵုမွဲ ပျဲဂစိုတ်မာ ကဵုညိၚ်ဝတ်ညိ ပၟိက်သဳသပၠန် ထေက်တန်ကဵုအစောံ ရီုဗၚ်အာ ပိစှော်ဒ္စာံမာ ဓရ်မ္ၚိုဟ်ကၠာ ချူတြးပါ်ပြအ်ဏာ အေ...ဣဏံရ ဗုဒ္ဓဝါဒ မၚ်္ဂလ မ္ၚဵုသေၚ်ဟာ။