လပအ် သၟိင် ပဿိုန် (၁၆) သာ်

လိက်လပအ် သၟိင်ပဿိုန် (၁၆) သာ် (အၚ်္ဂလိက်: The sixteen dreams of King Pasenadi)ဝွံ ပၞောဝ်ကဵု လိက်ပတ် ဗုဒ္ဓဘာသာဂမၠိုင်ဂှ် ဒှ်လိက် မၞိဟ်မတီဂၠိုင်မွဲရ။ ပရူဝွံ ဂွံဆဵုကေတ် ပ္ဍဲကဵု မဟာသုပန ဇာတက (Mahāsupina Jātaka) မဒှ် ပရူ သၟိင်ပဿိုန် (Pasenadi) ညးမဒှ်သၟိင် ဍုင်ကောသလရး လပအ်ညာတ်တုဲ ကျာ်တြဲဂေါတမ သှ်ကဵု အဓိပ္ပါယ်သွပ်လပအ်တအ်ဂှ်ရ။ အတိုင်ဇာတ်ဂှ်မ္ဂး ကျာ်တြဲဂေါတမ ညးစကာ အနာဂတံသညာဏ်တုဲ ညးဟီုတွဟ်ကဵု သွဟ်လပအ် သၟိင်ပဿိုန် အရာ မကြက်ကတဵုဒှ် ပ္ဍဲအခိင်သာသနာကျာ် မစိုပ် ၂၅၀၀ တုဲ (ၜိုတ် အေဒဳ ၁၉၅၇) မဒှ်အခိင် သာသနာကျာ်မဟုတ်စှ်ေအာရ။ ပရူလပအ်သၟိင်ပဿိုန် ၁၆ သာ် မချူပျးလဝ် နကဵုရုပ်ဂှ် ပ္ဍဲကဵု အရှာံကျာ် ဍုင်မန်ဗၟာဂှ် ဂွံဆဵုကေတ်မာန် ဗွဲမဂၠိုင်ကဵု ဒၞာဲရ။

လိက်လပအ် သၟိင်ပဿိုန်ဝွံလေဝ် ဒှ်လိက် ဓရ်ဒၠောအ်ဗတောန် ကောန်မၞိဟ်တအ်တုဲ ဒုင်သဇိုင် ကုဒ္ဂေတ်လၟေတ် ကောန်ဗုဒ္ဓဘာသာတုဲ အရာလဵု မဒှ်အရာ မနွံကဵု ဓရ်၊ အရာလဵု မဟွံမဲ ကုဓရ်ဂှ် ချူဗၟံက်ထ္ၜးလဝ် နကဵုဇာတ်လေဝ် ဟီုမာန်ရ။

လပအ် သၟိင်ပဿိုန် (၁၆) သာ်

ဗွဲသၟဝ်ဝွံ ကံက်နုက်ကေတ် ဆပ္ဍဲ သွပ်လပအ် ကေုာံ တင်သွဟ် နူလိက်သၠပတ် လိက်ဇၟန်တုဲ ဗၟံက်ထ္ၜးဏာရ။

လပအ် ပထမ

ဂၠဴပန်သၟိက်ဇဵု ကဵုခရာပၠ၊

(သွဟ်) ဗြဲပန်ဒိုဟ်ဗိုန် ဍေဟ်ပ္တိုန်မတ်သၞ၊ ဟွံဂူဟဲအာ သ္ၚးခြာစာ်သၠ၊ ဗြဲဟွံဓဝ်သၟတ် သတ်ဒှ်ဒုက္ခ၊ အနာဂတ်ဂတ စိုပ်ရပဿိုန်။

လပအ်ဒုတိယ

ၝောအ်ဂၠဴ မဴတှ်ကောန်

(သွဟ်) ကာလဂှ်စၟတ် အိုတ်သတ်တအ်ရ၊ မိမအစာ ဥပဇျှာယျ၊ ညးဗျုဇၞော်ကီု အိုဿီုသဗ္ဗ၊ ဇၟာပ်ကိစ္စရော ဂၠိုင်ပယောဂ၊ ကောန်စးဂလာန် ပါင်မိကဵုမ၊ ဟီုကဵုဟွံကေတ် ဝေတ်ဒှ်သောံဗျ၊ ဇၟာပ်ပူဂိုလ်ကီု သီုအဲညးရ၊ မိမဖေက်ကောန် ဗၠန်ပ္ဍဲကာလ၊ စိုပ်ဝိသုံဂျ ဒှ်ရပဿိုန်။

လပအ် တတိယ

တၞံဆုမွဲဟတ် ပ္ကဴသတ်လမိုန်၊

ကုမ္မာရဳဒှ် စှ်အခါပြင်၊ ပြေင်ဝိဝါဟ ပမှုစရင်၊ ညာတ်မုက်ကောန် တြုဟ်ဗြဴဇၟာပ်တင်၊ ပတုပ်စအဲ ညးရး၀င်၊ အိုတ်သတ်တအ်သၟတ် ဟွံဆောတ်မွဲတင်၊ သာသနာ ၜါလ္ၚီလောန်ပြင်၊ ဒ္ဂေတ်ဟိုတ်မာဲ ပြးချာဲဂၠိုင်ဂၠင်၊ တိုင်လပအ်ကၠာ သၟီရာဇာ၀င်၊ ညံင်ကဵုပၞောန်တင် လ္မေင်သွပ်ဗိုန်၊ ယွံလေပဿိုန် လ္မိုန်ဂတ၊ အနာဂတ်ဂျ စိုပ်ကၠုင်ရညန်။

လပအ်စတုတ္ထ

ၝောအ်ဍေဟ်နွံတဴ ကောန်ဂၠဴရပ်ဗ္ဂန်၊

စိုပ်ပ္ဍဲကာလ ဗွဲဂတညန်၊ ညးနွံပညာ တီဝေါဟာနန်၊ လေပ်သၞောဝ်သ္ဂုတ်သွာတ် ဓမ္မသာတ်ပၠန်၊ ညးဟွံကၠုင်အာ အိုတ်ဝေါဟာဇန်၊ ညးဟွံစင်ခြင် ဓုတင်ဇၟာပ်တန်၊ ပူဂ်ိုလ်ဂှ်သွိင် လာပ်သၟီတအ်အန်၊ မၞိဟ်သမၠီုပၠန် လုလန်မောဟ၊ ဟွံတီဓဝ်ယာ ဝါစာသောံဗျ၊ ဂှ်ပူဂိုလ်အဴ စဴဒှ်ရာဇ၊ ညးဗျုဇၞော်ပြဲ တီပ္ဍဲဓမ္မ၊ ဍေဟ်ဟွံထံက်ပင် ဟွံစင်ခြင်စ၊ မၞိဟ်သွတ်ပသၟီ လဟိင်စိတ္တ၊ သၞောဝ်ဟွံဓဝ်ယာ ယောင်အာသဗ္ဗ၊ ဟိုတ်ဟွံထံက်ပင် ဟွံစင်ခြင်စ၊ ကဵုညးနွံကၠာ ပညာညာဏ၊ ဟိုတ်ဂှ်သ္ကဲ ဂၠိုင်ဘဲဒုက္ခ၊ ဗွဲအနာဂတ် သၟတ်ဨကန္တ၊ စိုပ်ဝိသုံဂျ ဒှ်ရပဿိုန်။

လပအ် ပဉ္စမ

ချေဟ်စပါင်ၜါ

သၟီရာဇဆက် ကြက်ဂတဗိုန်၊ ၜါလ္ၚီလောန်အာ သာသနာကွိုန်၊ သၟီတအ်ဟိုတ်မာဲ မြအ်မြာဲဂၠိုန်တိုန်၊ ဒ္ဂေတ်ဟွံလဝ် ဓဝ်ဟွံမင်ဗိုန်၊ သီုစှ်ပြကာ ယောင်ခြာလမိုန်၊ ညးဒိုက်တအ်ဒှ် ကာလဂှ်ဗိုန်။ ယွံညးတိက္ခ ညာဏပဿိုန်၊ ပင်မှိင်မွဲချိုန် လၟိုန်ဒဒှ်၊ ကာလဂှ်သ္တိုတ် အိုတ်တြုဟ်ဗြဴဂှ်၊ ဍေဟ်ကဵုဍေဟ်ကၠာ ဝါစာဟွံသ္မဟ်၊ ဂၠိုင်ဝါဒရ ဒေါသလေဒှ်၊ တိဗ္ၚကၠံပ္ညုင် ဂၠုင်ကွဳတအ်ဂှ်၊ ပ္ဍဲအာဲတၟာဲ ဂၠိုက်ဂၠဲာက္တဵုဒှ်၊ ယဝ်အာစိုပ်သွိင် သ္မီကာလဂှ်၊ စဳစတ်ဂၠိုင်ဒၞဲာ သ္မာန်ဂၠဲာလပှ်၊ ညးနွံဒုဟ်ပြဲ ဟွံမဲတင်တှ်၊ သီုအမှုစာ ကြာညးတအ်ဂှ်၊ စသဳဖဵုဒှ် ဂၠဲာလပှ်တွိင်၊ ၜါလ္ပာ်အဵု ဒးကဵုလာပ်သ္မီ၊ အမှုသ္ဇိုင်သာ ဟွံဗ္စာဂၠိင်၊ သ္မီဟွံဓဝ်သ္မတ် သတ်ဒှ်လဟိင်၊ ဂၠိုင်တဴသိင်သာ ပူဆာဝိဝိင်၊ သ္ၚောဝ်ဟွံဓဝ်ပြဲ ဗြဲဂူဂြိင်ဂြိင်၊ မိတ်ဒှ်သတြု အမှုဂၠိုင်ဂၠိင်၊ ကြက်ဨကန္တ သုပိဏ္ဏသ္မိင်၊ ဒှ်ဟွံဆောတ်သွိင် ရသ္မီပဿိုန်။

လပအ်ဆဋ္ဌမ

နုင်ဇၞော်မ္ဂး ညာတ်ဒးမွဲချိုန်၊ နုင်ဍောတ်ဂမၠိုင် ဗိုင်တုက်ဗိုန်၊ ပေင်ဟွံမာန်ကၞာတ် ဂွံညာတ်လ္မိုန်၊

(သွဟ်) ကၠံမွဲဘာသာ ဝေါဟာဂၠိုင်တဴ၊ အိုတ်ရးနိဂီု ဂြီုဂြီုလိုက်လဴ၊ ပၠောပ်အခေါန်သွိင် ကဵုသ္မီသ္ဘဴ၊ သီုညးဂမၠိုင် ရိုင်င်ဗွဲကြဴ၊ ဒးကၠုင်ဆက်ကွာဲ နာဲရာဇပ္ကဴ၊ ဟွံပေင်စိုတ်သွိင် သ္မီတအ်လိုက်ဗာ၊ ယွံလေပဿိုန် ပိုန်ဒှ်ဗွဲကြဴ။

လပအ် သတ္တမ

ပုင်မွဲထမာဲ မြအ်မြာဲဂၠိုင်ပိ၊ တူသ္ၚေက်သ္ၚုသ္ၚုဲ ဗ္စဲလွုဲယုတ္တိ၊

(သွဟ်) စိုပ်အနာဂတ် ဨကန်မှတ်ကြဴ၊ ဗြဲဂူလယတ် ဇၞော်ဒြဟတ်နုဘဴ၊ ဟွံတီအခါ ကျာဆံင်ဒေဝဴ၊ ဗြဲတံဂှ်ပ္ညဳ ဂူဟွံညဳတဴ၊ ညံင်ပုင်သ္ၚေက်သ္ၚုဲ ထုဲကြာန်ဂၠိုက်ဏှဴ၊ ဗြဲဟွံဓဝ်ကီု လီုသစ္ဆုပ္ကဴ၊ မၞိဟ်ဟွံဓဝ်ယာ ဂၠိုင်စာ်ခြာတဴ၊ သ္မီတအ်သဘဴ . သ္ဂုတ်သွာတ်သၞောဝ်၊ ဒၞဲာထံက်ထံက်ပင် ဒၞဲာဒးလင်ဇွောဝ်၊ ဗြဲဟွံဓဝ်ကီု သ္မီတအ်လီုသၞောဝ်၊ ဓာတ်တိဆတ္တဝ် ဟွံမောဝ်ဗၠိုက်အာ၊ တၞံဆုသၠပ္ကဴ သတ်တဴယောင်ယာ၊ လ္ၚဵုကဴသ္မတ် လ္ၚဵုသတ်အာ၊ မသြောအ်သစ္ဆု အန်ကုရှ်သာ၊ အိုတ်တြုဟ်ဗြဴရ ပတဴအဟာ၊ စသစ္ဆုဂှ် ဂၠိုင်ဒှ်ရောဂါ၊ ဓာတ်ဟွံညဳသာ ဝေဒနာဂၠိုင်၊ ရိုဟ်ဂဥုဲပၠန် အန်ဣဓိဂွိုင်၊ ၝဲဒေံကောရ မိမနာံမြိုင်၊ ဟွံညဳသာသၟတ် ဇၟာပ်သတ်ဂမၠိုင်၊ ဟိုတ်ဟွံညဳသာ ဗြဲကျာထတ်ဂၠိုင်၊ ဒးက္တဵုဒှ်သၟတ် အနာဂတ်ဗျိုင်၊

လပအ် အဋ္ဌမ

နွံကမာမွဲ ဇၞော်ဇျှာသြဲလောန်၊ ဒေါဝ်ကမာစိ ကၠိတဴလစောန်၊ ဇိုင်ကမာဂှ် ကၠေင်သွဟ်ဟွံလောန်၊ ဍာ်မွဲကမာ ဟွံညဳသာပၠန်။

(သွဟ်) အနာတဂတ်ပ္ညုင် ဍုင်ကွာန်လိုက်လဴ၊ ပ္ဍဲကာလဂှ် သတ္တံဒှ်က္တဴ၊ ရိုင်ဇိုင်လိုက်လဴ ညးတဴဒေါဝ်ဍုင်၊ သ္မီခါန်စကာ အိုတ်ဝေါဟာကၠုင်၊ ဒှ်တဴသိုက် တိုက်တိုက်ဂၠုင်(ဂၠုင်)၊ သ္မီတံက္တဴလောန် ကောန်ကွာန်ဒေင်လ္ၚုင်၊ မၞိဟ်တဴပ္ဍဲဍုင် သ္မီဍုင်စကာ၊ သ္မီကဵုသ္မီပ္ညဳ ဟညဳသစ္စာ၊ ပပၞာန်ဒမၠ ကာလဂၠိုင်ရာ၊ ဟိုတ်ဂှ်ဆတ္တဝ် ဒေါဝ်ကၠိသေင်ဟာ၊ လ္ၚဵုတအ်ဂှ် ဒြေပ်တၞဟ်ခြာ၊ ဍုင်ဒှ်လ္ၚု အမှုဂၠိုင်အာ၊ ညးဒြေပ်တအ်ဂှ် ပှ်လှ်ပေင်အာ၊ ဇိုင်ဍုင်မုဟ်ရး အိုတ်ညးနိဂါ၊ သ္ၚောဲကဵုဍုင်ကွာန် ထာန်ရညဝါ၊ ညံင်တအ်ဂှ်သွိင် အမှုသ္မီသာ၊ မိပ်သ္ၚိပ်ၜိုဟ်လောန် ကၠောန်ဟွံလီုကာ၊ ဟိုတ်ဂှ်သေင်ဟာ ဍာ်ကၟာဖျိုင်၊ ဒေါဝ်ကၠိဓဝ် ကေဝ်တဴဇိုင်ဇိုင်၊

လပအ် နဝမ

လဵုတၞီဇၟအ် တၟအ်ဂတဝ်အာ၊

(သွဟ်) လဵုတၞီစၟတ် အနာဂတ်စိ၊ ပူဂဵုတီကၠာ သမ္မာဒိတှိ၊ မဂ္ဂအတှာ သဳလာပက္ခိ၊ ကုသလာကီု သီုအဗျာဓိ၊ ညးနွံပညာ တီဝေါ(ဟာ)ဂၠိ၊ ဗ္စာရဏာပြဲ နဲတင်ပလိ၊ ဍိုက်ပေင်ဂကူ စိုတ်တမူဂ္ညိ၊ ပူဂဵုဂှ်စိ နွံဟိရိပြဲ၊ ညးဂမၠိုင်ရ ဟွံပနိသြဲ၊ ညးဟွံညှာတာ ဟွံပကာမွဲ၊ ဟွံသ္မာန်သ္မုက်ရ သုက္ခနဲကဲ၊ စဴဒှ်လ္ၚု ဝွံလက်သန်မွဲ၊

လပအ် ဒဿမ

(သွဟ်) တၟအ်ဂတဝ်ပၠန် ဟီုပၠန်ထံက်ပင်၊ မၞိဟ်သမၠီုကၠာ ဟွံဗစာဂြင်၊ ဒ္ဂေတ်ဗာလာနံင် ဂၠံင်ဓဝ်ဟွံမင်၊ ဟိုတ်မောဟဂၠု ဟွံတီဓုတင်၊ မၞိဟ်အန်ဂကူ ပူဂဵုဂၠိုင်ဂၠင်၊ ဍေံကဵုဍေံဂှ် သှ်ၜးစင်ခြင်၊ မၞိဟ်သာ်ဂှ်သွိင် သ္မီတအ်ထံက်ပင်၊ ခိုဟ်စပ္ဍဲလိုက် သိုက်တဴဂမြင်၊ အိုတ်သီုဝုတ်ဗၠာဲ ရာင်ဆာဲလောန်က္ဍင်၊ ဟွံချပ်စင်ခြင် ဓုတင်ဂတ၊ ဓဝ်ဍေံဟွံကေတ် ဒ္ဂေတ်သောံဗျ၊ ၜးနူဘာကၠာ တိရစ္ဆာဏ၊ ပ္ဍဲလိုက်ဂွံသိုက် ပလိုက်ဒုက္ခ၊ က္တဵုဒှ်ကဵုသတ် မှတ်ဨကန္တ၊ သုပိဏ္ဏဆိတ် လမိတ်ရာဇ၊

လပအ် ဨကဒသ

ဂဍာ်အရိုင် ၜိုပ်ထဝ်ဗိုင်တဴ၊
(သွဟ်) ၜိုပ်ဗိုင်ခဍာ် လ္မာ်ဗွဲကြဴ၊ ညးဒိုက်ဒှ်သ္မိင် လွိင်မုက္ခဝါ၊ ဍိက်က္တဵုဒှ်နာဲ ရာင်ဆာဲလောန်တဴ၊ ဂဍာ်သဘဴ ရဴၜိုပ်ဇံသဝ်၊ ညးနွံဂကူ စိုတ်လ္ဂူမောဝ်၊ ဒးခစပြဲ မၞိဟ်ဟွံမဲဓဝ်၊ ဂကူယုတ်သိုက် ညးဒိုက်ဂတဝ်၊ ဂဍာ်ကိကာ ဟံသာဇံသဝ်၊ အနာဂတ်ကြဴ စဴဒှ်ဆတ္တဝ်၊

လပအ် ဒွါဒသ

ကၠဵုပယျာလဝ် ထးထဝ်သေင်လေင်၊

(သွဟ်) ဗြဴနွံဂကူ ၜိုန်ဥူသိပ်ဇၟံ၊ ကဵုတြုဟ်ယုတ်ပြဲ ဒှ်မွဲတၟအ်၊ ဟွံမွဲလ္မေတ် ဒ္ဂေတ်ဍေံတံ၊ လီုပဝေဏဳ အိန်ရဳဟွံဇၟအ်၊ ဂၠိုင်သာသပအ် သတ်တအ်ဂမၠိုင်၊ ဗက်ပ္တုပ်စသ္ကဲ အိုတ်အဲညးဖျိုင်၊ ဂကူယုတ်ဂှ် ဒှ်သမ္ဘာဂွိုင်၊ ဟွံယိုက်ဒိုက်ကၠာ သာသနာဖျိုင်၊ ယောင်အာဇၟာပ်ဒၞဲာ မြာဲလီုဂၠိုင်ဂၠိုင်၊ ဗွဲအနာဂတ် အိုတ်သတ်ဂမၠိုင်၊ က္တဵုဒှ်သေင်ဟာ ယွံရာဇာပိုင်၊ ညံင်ကဵုတၟံတိုင် ပါင်နာဲက္ဍိုင်ရတ်၊ စဴဒှ်အဆတ် ဗွဲသ္မတ်ဨကန်။

လပအ် တေရသမ

ၚဴၚိတ်ဇြုံ၊ ၚဴသ္မတ်(ဂမ္ကိတ်) ၚိတ်ဇြုံဇၞော်ဂှ်၊

(သွဟ်) ဣတ္ထဳနာမ ဗွဲဂတမာ၊ ဗြဴသ္မတ်ဆိတ် ဒက်မိတ်သမ္ဘာ၊ တြုဟ်ဗျုလောန်တဲ ဒှ်မွဲဘာဂါ၊ ဇၞော်သ္မတ်ကီုတၟုဲ ဟွံရုဲစှ်ကၠာ၊ စၞးယာဲဣတ ယဝ်ရဒြပ်မြာ၊ ဍေဟ်ဒက်မိတ်ဟေင် ရောင်ဟွံသေင်ဟာ။

လပအ် စုဒ္ဒသမ

တြုဟ်စၞာံဂၠဴ ကၠဵုဗြဴစမာ၊

(သွဟ်) ဗွဲအနာဂတ် ဟွံဆောတ်ယောင်ယာ၊ ဗြဴဟွံမင်စိ ဟိရိတဗ္ဗာ၊ အောန်ဒ္ဂေတ်သ္မတ် ပတိပတ်မာ၊ စွံစိုတ်စနာဲ လောန်ကာဲဂၠိုင်ရာ၊ ဝဵုမတ်တုန်စိ တလသ္ၚိကၠာ၊ တြုဟ်ပံက်သွံရာန် ဇၟာပ်ဍုင်ကွာန်အာ၊ အာတိုက်က္ဍိုက်က္ၜင် လှောင်ထာန်ဂင်ဂါ၊ ဟွံဗှ်ဗ္စာ စိတ္တာဟိဏ္ဏ၊ သုင်စဝေင်ဂြိုင် ဂၠိုင်ကဵုဘာဂ၊ ဒဂေတ်အဟိုတ် ကၠတ်စိုတ်ဍေံပ၊ ဟွံမင်ဂကူ လလူရာဂ၊ ဟွံလ္ဂူစိ ကဵုတြုဟ်ဟိဂျ၊ ဗြဴသာ်ဂှ်ရ ဂၠိုင်ထလ္မော၊ အနာဂတ်ရော သမ္ဗုဒ္ဓေါတွံ၊ ဟွံဆောတ်ညိဖျိုင် ညံင်တိုင်အတှ်၊ အိုတ်သတ်တံဂှ် ဒးက္တဵုဒှ်ဟေင်။

လပအ် ပန္နရသမ

ဆုမြမောဝ်ဆက် ကြက်စလန်ဟေင်၊ ၜိုဟ်ကဵုဍာ်သံ တၞံတဴလွေင်၊ အမြာဲလီုဗျဟ် လ္မိတ်ဂှ်တ္မေင်၊

(သွဟ်) အနာဂတ်ပၠန် ပတူဇန်သ္မဟ်၊ ပသာ်က္တဵုဒှ် တဝှ်လက်သန်၊ နူဝွံတုန်ကၠာ သာသၞာပတန်၊ မသုန်လ္ၚီကၞာတ် နာဲကျာ်ဂကန်၊ သုတ်ဝိနဲစိ အဘိဓဝ်ပၠန်၊ ဓဝ်ဟံင်သတ်ချာဲ နူအပါဲပန်၊ သွက်ပတုဇန် ဂကန်ကျာ်တြဲ၊ ကဵုဂွံတီကီု အိုတ်သီုညးအဲ၊ ကဵုဒဂေတ်ညိ ပတိပတ်ပြဲ၊ သာသနာကၠာ ၜါလ္ၚီလောန်တဲ၊ အိုတ်သတ်တအ်ဂှ် ဟွံဗှ်ဂုန်အဲ၊ ဓဝ်အဲကျာ်တွံ သ္မဟ်ရတ်မပြဲ၊ သုတ်ဇာတ်နိပါတ် သေသာတ်ဂၠိုင်နဲ၊ ကဵုဒဂေတ်ချာဲ အပါဲဂွံသ္ၚောဲ၊ စွံပ္တန်လဝ်စိ ပိတကတ်ပြဲ၊ ဍေဟ်ဟွံမင်မဲ အိုတ်ဇၟာပ်အဲညး၊ ဒဂေတ်ဟိုတ်မာဲ ဍေံဂၠဲာပနး၊ ညးလ္ၚဵုပၠန် ဂၠဲာသန်ထဝ်ဂး၊ သွံစဓဝ်အဲ ဟွံမင်မဲသ္အး၊ သုတ်ဇာတ်နိပါတ် ဍေံကၞာတ်ဟီုဂး၊ ကြာဂၠံင်ဍာန်ချာဲ ဂၠဲာဟီုတွံပျး၊ ဟွံတီဒၞဲာဝါဲ ဂၠဲာဟီုလုတ်ဒး၊ ဓဝ်အဲကျာ်ဖျိုင် ဒှ်အရိုင်ညး၊ အလုံရး အိုတ်ညးနဳဂီု၊ ဂၠဲာပံက်သွံရာန် ကွာန်အိုတ်သီု၊ ဓဝ်အဲကျာ်ဂှ် ဍေံဂၠဲာတွံဟီု၊ ဟရှ်ေသှ်ေကၠာ ဟွံစင်ခြာကီု၊ သတ်ဟွံမင်မွဲ ဓဝ်အဲကျာ်လီု၊ အမြာဲဂှ်ဓဝ် ဟွံမောဝ်ဂၠုထီု၊ ပိတကတ်ချာဲ ယောင်ဒၞဲာအိုတ်သီု၊ ဓာတ်အဲကျာ်ရုပ် ဒက်ပတုပ်ဗီု၊ ပုတ်ဂၠတ်ဂၞတ်ချာဲ ဂၠဲာသွံစကီု၊ လောဘဒေါသ မောဟဍေံသ္တီု၊ အိုတ်သတ်တအ်ကီု ဂြီုဂြီုရုရု၊ ဟွံရှ်ေသှ်ေချာဲ ဓဝ်နာဲက္ဍိုင်မြု၊ ၜးအဿဘဴ စဴဒှ်မစ္စု၊ ပ္ဍဲအပါဲဗျာံ ဂၠိုင်သၞာံစနု၊ အိုတ်ပူဂိုလ်ဂှ် စဴဒှ်သာ်ဝွံ၊

လပအ် သောဠသမ

ဇာဒိသိုင်ချာဲ နာဲသတ်သဳဟ၊ ညာတ်ဗ္ၜေအ်ကၠာ ဟွံသွာစိတ္တ၊ ဒဴထောအ်ကၠေအ်ပၠန် ဟေမ၀န်ဏ၊ သ္မီသဳဟကီု သီုဗျက္ဃကၠ၊ သီုပူဂိုလ်ၜါ ဒြေပ်အာရည၊ ဗၜေအ်ဂှ်အဴ ဒှ်တဴရာဇ၊ ဇၞော်သိဒ္ဓိက နာမဒဒှ်၊

(သွဟ်) သတ်တအ်လဟိင် ရသ္မီရာဇာ၊ ညးလ္ၚဵုပြဲ တီပ္ဍဲဟောရာ၊ လ္ၚဵုလေပ်သ္မတ် ပိတကတ်ကၠာ၊ လ္ၚဵုလေပ်ကၞာတ် သုတ်ဇာတ်နာနာ၊ လ္ၚဵုတီစိ ပါလိဂါထာ၊ လ္ၚဵုဂှ်ပြဲ တီပ္ဍဲရောဂါ၊ သဗှနိဒါန် ဂလာန်ဂၠိုင်ရာ၊ ဥုံယန်မန်သွး အိုတ်ညးသံသာ၊ ဇၟာပ်ဇန်တြုဟ်ဗြဴ ဂၠိုင်လေပ်တဴကၠာ၊ ဟိုတ်တီညာတ်ရ မာနသင်ကာ၊ ဍေဟ်လဟိင်ပြဲ ပ္ဍဲသာသနာ၊ ကောန်ကျာ်အရဳ ဂမှဳသင်မှာ၊ ဟွံပဗၞတ်သၟဟ် ဆဒှ်ဟီုအာ၊ ဇၟာပ်ဂလာန်ကောံ နွံပ္ဍဲဒကာ၊ သင်အရဳတွဟ် ဍေဟ်ဒှ်ပၟာ၊ အိုတ်သတ်သံသာ အိုတ်ဝေါဟာဇန်၊ ဟွံပ္တေဟ်ဂလာန် ပါင်ကျာ်ဂကန်၊ သုတ်ဇာတ်နိပါတ်ကွေဟ် ဍေဟ်တအ်တီပၠန်၊ တီညာတ်ဂၠိုင်ပ္ညုင် သၠုင်မာနလောန်၊ ဒဂေတ်ဟိုတ်မာဲ မြဟ်မြာဲဂၠိုင်လောန်၊ မၞိဟ်ယိုက်ဒိုက်ကၠာ သာသနာအောန်၊ မၞိဟ်ဒဂေတ်သွိင် ဓဝ်သ္မီအရှန်၊ ပူဂိုလ်ဂှ်အောန် ဇန်ပုထုဇ၊ မၞိဟ်အောန်သမ္မာ မိစ္ဆာဇိ၀၊ ပ္တေဟ်ဂလာန်စိ ဒိတှိသောံဗျ၊ ပ္တေဟ်အစာပၠန် အုံယန္ဒ၊ သင်ကာပ္ဍဲဓဝ် သက်သွဝ်ဂျ၊ အောန်ပညာကၠာ သဳလဒါန၊ ဟွံပ္တေဟ်ကံဖိုလ် ကုသိုလ်ဟွံပ၊ အိုတ်သတ်တအ်ရ ပွဝေင်တဴ၊ သိက္ခာပိုတ် သင်အရဳကြဴ၊ ဍိုက်ပေင်အိန်ရဳ ကျာ်သြဳတ္ၜတ်သြဴ၊ ပင်မှိင်ခန္တဳ မင်သဳလတဴ၊ ဟွံပဗၞတ်သ္မဟ် ဍေံဟွံသှ်ပ္တဴ၊ ဍေဟ်ဟွံညှာတာ အောန်အာ . . ၊ လ္ၚဵုတ္ၜေဟ်တဴ စောရကလဴ၊ လ္ၚဵုတအ်ကီု ဗျိပၠုတ်ဟီုသၞဴ၊ ဟွံမဲဒုဟ်တင် နင်ဒုဟ်ဂဝဴ၊ ဂၠိုင်သတ်တြုဟ်ဗြဴ ပျုတ်ပဒေက်တဴပၠန်၊ ကာလဂှ်ပ္ညဳ ဂမှဳဗိုန်က္ညန်၊ ပဲါကၠေအ်ဇကု ထာန်လ္ၚုတန်၊ ဟွံဂံင်ဆိုက်ကြပ် တရပ်မှာဇန်၊ ထာန်ရညကၠာ မင်သိက္ခာပ္တန်၊ ဒိပ်ဇကုကြဴ စဴဟေမ၀န်၊ သဳဟပေက်ဂျ နာဲအဇ္ဇပၠန်၊ ဗွဲအနာဂတ် ဟွံဆောတ်မွဲတန်၊ တွံကဵုပဿိုန် သီုကဵုဗိုန်က္ညန်၊ ဂိုင်သမ္တီကၠာ ယွံသတ်မှာဇန်။