နာဲအံင်သာန်

၀၁။ (ဟွံမာန်ထာဝရဟွံကျလၟိုန်)

ပ္တံနူသၠးဂဝ်ဂၞဴမိဂှ် တိုင်ပကဴပေဲါအံင်ဇၞးပါဗက်ကၠုင်ဟွံသေင်ဗွဲတၟေင် ညာတ်မုက်လောကတုဲမှသဗ္ဗနာနာ ကြက်ကတဵုဒှ်မာန်လီုမာန် လတူဘဝပိုဲမၞိဟ်တအ်ရ ဓရ်ဟွံဗိုန်ဗတ် ၜိုန်ရဒှ်မဟာဍာံစၟတ်ကီုလေဝ် ညံင်ဂွံဗိုန်ဗတ် လတူဘဝဇကု အဃောမတန်တဴ ပ္ဍဲလောကမွဲချိုန်ခဏဏအ် ဒှ်တာလျိုင်ဇကုဒးကၠောန် စိုတ်ဓာတ်ဟွံဒုင်ကျ တ္ၚဲလဵုဟွံဒုင်ကျ ရပ်လဝ် စိုတ်ဓာတ်သာ်ဏံမဂး ဓရ်ဗိုန်ဗတ် ဂွံပါဗက် အခိင်ဇကုမတန်တဴ ပ္ဍဲလိုက်ပစ္စုပ္ပန်ဏအ်ရ သဘာဓရ် လောက လ္ပာ်လီုလောဲလ္ပါ်ဝါတ်ဂါတ် ဇၟာပ်ပ်အရာ ဗွဲမလောဲသွာ ကလိဂွံပေဲါအံင်ဇၞးမွဲမာန် ဒးကၠိုဟ်လဝ် ဗွဲကပ်ကၠာ။ ဘဝမၞိဟ်မွဲ ဍိုက်ပေင်တဴအဝဲပန်သာ် ဗီုညးတၞဟ်ကီု မုဟိုတ်ဒးကျ မုဟိုတ်လဇုဲ မုဟိုတ်ဟွံဂတာပ်အခေတ် ဟွံသေင်သာ်ဂှ်မဂး ဇာတာသွက်မွဲဘဝ ဒးလဇုဲကျမံင်လၟိုန် အ္စာဗေဒင် ကေင်ဟီုတွံလဝ်ဗီုဏအ်ဟာ ဒၞာဲယုတ်ဒေတ်ဟွံပေင် ဒးထပ်ဗပေင် ဂၠာဲဂၠံင်ညံင်ဂွံခိုဟ်အိုတ် ညံင်ဂွံကိတ်ညဳ ကဵုညးဂမၠိုင် ညံင်ဂွံဂတာပ်အခေတ် တုပ်ပၟာညံင်ရဴ သၟာပိုင်ပြဳကွဳချေံ ခေတ်ကွဳချေံအိုတ် ညံင်ဂွံထပ်ပိုင်ပြဳ ကွဳစက်ကာပၠန် ဒးပြံင်သၠာဲလေပ်အခိင်အခါလဵုမှ ဟွံဒးကျလၟိုန် ဟွံဒးလဇုဲလၟိုန် ပတဝ်အာမုက်ကဵု ညးလောကတအ်ရ။

ညံင်ဟွံဂွံဒှ်မၞိဟ်ကျဘဝ နူကပ်ကၠာဟွံဒှ်ဏီဒးပ္တိတ်ဇြဟတ်ဒဵုကဵုကလိဂွံပေဲါအံင်ဇၞးရ ကလိဂွံပေဲါအံင်ဇၞးတုဲ ဟွံဒှ်ဓဝိင် ဟွံဂွိင်ဖေတ်ဒးကလေင်ကျရ၊ စိုတ်သာသ္ပအ်မံင်မဂး စိုပ်မွဲတ္ၚဲတှ်ေ ဒးကျဟောံဗြမ်ရ ပေဲါအံင်ဇၞးမကလိဂွံလဝ် အကြာတင်ဝါတ်ဂါတ်ဂှ် ညံင်ဟွံဂွံလုပ်စိုပ် သၟဝ်သကေမ်တဲဒးဒုင်ကျ လောဲလောဲဂှ် ဒးမင်မွဲထိင်ဒဝ်အာရ၊ ကဵုဒှ်သၟာကျအောန်တုဲ ညံင်ဂွံဒှ်မာန်ဂၠိုင်င်ကဵုအလန် ဂွံပတန်အာဇွဲသတ္တိ မနွံကဵုဂမြင်ဉာဏ်ဂတာပ်အခေတ်ဂှ် ဟိုတ်ဖဵု ၜါပြာကာ ဒးတီကၠိုဟ်လဝ်ရ အခိင်ကျ ဒးပတိတ်ဇြဟတ်ညံင်ဂွံမာန် အခိင်မာန်ညံင်ဟွံဂွံကျ ဒးထိင်ဒက်မင်မွဲအာညိ။

၀၂။ (ဒ္ဂေတ်မာန်မ္ဂး)

ဇၟာပ်မၞိဟ် ဂၠိုင်ကဵုအောန်ဂှ် တီကၠိုဟ် ပရေင်စဳပၞောန်ဖအိုတ်ရ။ ဆဂး ဂွံဒဂေတ်ဗက် အတိုင်စဳပၞောန် ဗိုန်ဗိုန် ဗတ်ဗတ်မာန်ဂှ် အောန်လောန်ရ။ လညာတ်ဂမြင်ဉာဏ် ၜိုန်ရသကေတ်သကာ ဇွဲလွဳဗိုန်ကီုလေဝ် ပ္ဍဲအရာစဳပၞောန်မွဲ ယုတ်ဒေက်နွံမဂး တုပ်ပၟာဂၠုင်လဒေါဝ်ၜဳဇၞော် ဟၟဲသီုကဵုသၠသၞေကီုရ။

ပ္ဍဲကဵုပရေင်ပညာ ပရေင်ပိုန်ဒြပ် ပရေင်ဍုင်ကွာန် ပရေင်ပၞာန်တအ် ယဝ်ဒဂေတ်ဗက် စဳပၞောန် ဍိုက်ဍိုက်ပေင်ပေင်ဟွံမာန်မဂး အခိင်တ္ၚဲလဵုမှ ဂွံဇၞော်မောဝ် တောတက်ဂှ် ဂၠံင်ဟၟဲရ။ ယဝ်ရ အတိုင်ဟီု အတိုင်ကၠောန် သဗ္ဗကမၠောန် ကေင်ကာ ကၠောန်သပမာန်မဂး ဂွံဇၞော်မောဝ် တောတက်ရ။ လဟီုမွဲဗီု ကၠောန်ဂှ်မွဲဗီု ဇၟာပ်အရာကေင်ကာမကၠာန် ဂွံဇၞော်မောဝ်

တောတက်ဂှ် ဒှ်ဟွံမာန်ရ။ အတိုင်စဳပၞောန်ဟွံဒ္ဂေတ်ဗက်မဂး တုပ်ပၟာညံင်သ္ၚိ ဟၟဲကဵုဗဒင် ဒိုဟ်ပန်လပါ် ဒယိုင်သ္ၚိ ၜိုန်ရဖျေံလဝ် ရိုဟ်ကၞက် ခိုင်ဗိုန်မံင်ကီုလေဝ် ကျာပန်ဒိုဟ် လပိုက်ကၠုင်မဂး သ္ၚိတအ်ဝွံ ဟိုတ်နူအစောန်သတ္တိ ဒုင်စေဒၞါကျာမေဠံင် ဟၟဲမွဲတုဲ ဗွဲမလောဲသွာ ဒးဓရိုဟ်စှ်ေအာမာန်ရ။ ပ္ဍဲကဵုသက္ကရာဇ် ၁၉၆၅ လဳကောန်ယူ၊ ညးမဒဟ်က္ဍိုပ်သ္ကိုပ်၊ ဍုင်သင်္ကာပေါဝ်လၟုဟ်။ ဍိုက်က္ဍိုပ်တုဲ ပါ်တိတ်ကၠုင်နူ ဍုင်မလေယှာ ပတိုန်ဍုင်သင်္ကာပေါဝ်ရ။

ဝင်ဍုင်သင်္ကာပေါဝ်ဝွံ မုဟိုတ်ဂွံဒုင်ထိုင်သး ကဵုညးဂၠးကဝ်တအ်မာန်ရောဂှ်၊ ယဝ်ဂၠဲါသွဟ်ဍာံမဂး ဒးလဴပူပရေင် စဳပၞောန် ညးတအ်ညိညရ၊ ဍုင်သင်္ကာပေါဝ် ဝွံ၊ ပ္ဍဲကဵုဗၟံက်သၠုင်ကျာ ဨယှာဏအ်မဂး ဒှ်ဍုင်ဍောတ်ဍောတ်မွဲကီုရ။ ပ္ဍဲကဵုဝင် ဂွံဆေကေတ်လဝ်ရ ၜိုန်ရဍုင်ညးတအ် ဍောတ်ကီုလေဝ် ပရေင်ပိုန်ဒြပ် ပရေင်ပညာ ပရေင်မံင်စံင် ဘဝမၞိဟ်သၠုင်တဴသၟးဟွံက ကဆံင်ညးတအ်လေဝ် ပတဝ်ပၞးကဵုဂၠးကဝ်မာန်မံင်ရ၊ ဍုင်သ္အးဇ္ၚးအိုတ် ပ္ဍဲဂၠးကဝ်ဏအ် ဍုင်သင်္ကာပေါဝ် ဝွံလေဝ် ပါလုပ်မံင်လၟိဟ်မွဲကီုရ။

သယံဇာတ ကပေါတ်မတိတ်နူကဵု ဍုင်သင်္ကာပေါဝ် အပိုင်အခြာဇေတ်ဇေတ်ဂှ် စပ္တံနူကဵု ကၠေင် မတ်မၞိက် ထဝ် မုလေဝ်ဟၟဲရ။ သွက်ကောန်ဍုင်တအ် ဂွံသုင်စောဲ ဍာ် ပၟတ်တအ်ဂှ် ဒးရာန်ဟပၠေါပ်နင် နူဍုင်ညးသအာင်တအ်တုဲမှ ဂွံသုင်စောဲအိုတ်ရ။ ယဝ်ရ ဒးသ္ပသုတေသန ပရေင်တောတက် မဂး ဍုင်ညးတအ်တှ်ေ ပရေင်ကမၠောန်ညးတအ် ကၠောန်သ္ပ အရာအိုဿီုတအ်ဂှ် ညးသ္ပအဓိကကဵု စဳပၞောန်အိုတ်တုဲ ဇၟာပ်ပ် ကောန်ဍုင်တအ် အတိုင်ဟီုအတိုင်ကၠောန် ဒ္ဂေတ်ဗက်စဳပၞောန်မာန်တုဲ တ္ၚဲဏအ် ၜိုန်ရဍုင်ညးတအ်ဍောတ် ကောန်ဍုင်ညးတအ်အောန်မံင်ကီုလေဝ်၊ ဇြဟတ်သွက်ဂွံပတဝ်ပၞးကဵု ဂၠးကဝ်မာန်ဂှ် ညးတအ် လွဳၜံင်လဝ် အစောံသတ္တိညးတအ် နွံမာန်ရ အတိုင်ဟီု အတိုင်ကၠောန် အတိုင်ဒ္ဂေတ်ဗက် စဳပၞောန် ဍိုက်ဍိုက်ပေင်ပေင် မာန်မဂး ဒးကဠိဂွံ ပေဲါအံင်ဇၞးရ။

၀၃။ (တာလျိုင်ကဵုပြေလတူမိမ)

ကတဵုဒှ်ကၠုင်မၞိဟ်မွဲဘွ တာလျိုင်ကဵုဂွံပြေလတူ ပရေင်ဘဝညိ ယဝ်ရ တာလျိုင်ဇကုဟွံပြေမဂး ၚုဟ်မးဘဝဟၟဲ ညးဂမၠိုင် ဟွံသုင်စောဲဇကု ဒးဒုင်တးပဲါ ကဵုညးတၞဟ်လၟိုန် တီကၠိုဟ်ကေတ်သာ်ဝွံတုဲ လ္ပသာသသ္ပအ်ကဵု တာလျိုင်ညိ၊ ညးမသာသ္ပအ်ကဵုတာလျိုင်တအ် ခန္ဓကာ ၜိုန်ရထတ်စောန်မြက်စာမံင်ကီုလေဝ် ညံင်ရဴမၞိဟ်ယဲယဲ ဇၟာပ်အရာမကၠောန် ဟွံစိုပ်ဒးတုဲ ကလိဂွံပေဲါအံင်ဇၞး ဟွံမာန်ရ။

အလုံမွဲလောကဏအ် မၞိဟ်ဂမၠိုင် ၜိုန်ရနွံတော ဗွဲမဂၠိုင်ရိုဟ်လၟိဟ် ဟွံမာန်ကီုလေဝ် ညးမဒှ်အနန္တဂုဏ် သွက်ဘဝဇကုဂှ် ဒှ်မိမၜါဟေင်ရ။ ကတဵုဒှ်မၞိဟ်မွဲဘဝလ္ပကဵုဒှ် ညးဝိုတ်တၠိင်ဂုဏ်အနန္တဂုဏ်မိမၜါညိ။ အရာမဝိုတ်တၠိင်ဂုဏ်မိမၜါဂှ် ဒှ်အရာဗၠေတ်မှာသွက်ဘဝရ အဃောမိမ မဂျိုင်မံင်လမျီု ရီုလွဳဝတ်ပတုဲ ကေင်ကာနာနာသာ် ဒၞဲါမိမထေက်ကဵု ဒှ်ဒဒိုက်စိုတ် လၞီစိုတ်ဂှ် ဒးဝင်ပဲါအာလၟိုန်ရ။ မိမဍာ်ရမတ်ဒတုံပြဟ်ဓဇူ မွဲထၞဟ်ဂှ် ညးမဒှ်ကောန်ဇာတ်တအ် ကတဵုဒှ် ဒဒိုက် ပင်ယာမုက်ဟွံမာန် ဘဝဂတအဆက်ဆက်ရ။

ဝတ်ကေုာံတာလျိုင် မိက်ဂွံကဵုရဲဗှ်လိက်တအ် ကၠိုဟ်ကေတ်အဓိပ္ပါယ်ရ၊ ဝတ်ဟီုမဂး ဟွံကၠောန်လေဝ် ဇူထောံသက်သက်ဂွံရ၊ တာလျိုင်ဟီုမဂး ဟွံကၠောန်မံင်ဟွံဂွံ ဒးကၠောန်ဍိုက်ဍိုက်ပေင်ပေင်ရ။ ကောန်ဇာတ် တာလျိုင်နွံ လတူမိမဍာ်ဒကေဝ် ၁၀၀% ပေင်ပေင်တုဲ ညိလေဝ် ဖအောန်ထောံဟွံဂွံရ။ စေတနာမိမ ဟွံခိုဟ်စဵုဒဝ် ခိုဟ်စဝ်ထၜးဏာ ပညာကဵုကတ် နွံဝတ်ထပ်ကဵုတုဲ အာဲပြဲဇိုန်ကဵု လတူကောန်ဇာတ်တအ်ရ။

စေတနာမိမ ညးမဒှ်ကောန်တအ် တီကၠိုဟ်ကေတ်ကေတ် စေတနာမိမတုဲ ဂိုတ်ဂစာန်ပတိတ်ဇြဟတ် ညံင်တာလျိုင် ဇကုဂွံပြေကေတ်လ္တူမိမမာန်ဂှ် ဒှ်တာလျိုင်ကောန်ဇာတ်တအ်ကၠောန်ရ၊ ညးမဒှ်ကောန်ဇာတ်တအ် (ထေက်ကဵုဒးသၟာန်) နကဵုအလေဇကု တာလျိုင်ပြေမံင်လ္တူမိမဇကုကီုဟာဂှ် ညံင်ဂွံပြေမာန် ဗွဲမပြဟ်ဒးပရထောံ သီုကဵုစိုတ်စေတနာမကေဝ်ဇြုင်ဏောင်။

ကလိလောန်စဴစုတိအာတုဲ ဒးလရိုအ်ယာံပ္တိတ်မံင်ဍာ်ရမတ်ဏောန်ဒှ်မဂး အဃောမိမ မဂျိုင်တော လမျီုတေအ် ဝတ်ဇၞော်ဝတ်ဍောတ် ကေင်ပတုဲလဝ် လ္တူမိမၜါ ပြေမံင်ကီုဟာ နွံမံင်ကီုဟာ ဟွံကေင်ပ္တုဲလဝ်မွဲသာ် လရိုအ်ယာံမံင်ဂှ် မုလေဝ်ဂုဏ်ဖဵုဟၟဲရ။ ညးတာလျိုင်ဟွံပြေလ္တူမိမၜါ ဂိုတ်ဂစာန်ပ္တိတ်လွဳ ညံင်ဂွံပြေအာပြဟ်ဟ်မာန် က္တဵုဒှ်မၞိဟ်မွဲဘဝမဂး ၚုဟ်မးဇၞော်တောရ။ အထိုင်သးမၞိဟ်ဂမၠိုင်လေဝ် ဂွံဒုင်စသိုင်ရ လတူနူဂှ် ဒေဝတဴတအ်လေဝ် စၟတ်သမ္တီတော ညးမတီဂုဏ် အနန္တမိမၜါရောင်။