နာဲအံင်သာန်
ဂလာန်ပရင်တဲသွက်ရဲဆာန်ဂကူမန် ပလေဝ်ဒါန်
၀၁။ ဒၟါနူဏအ်ဟေၚ် ဂကူကဵုမသ ဆက်စပ်မံၚ်ရဂှ်ပိုဲတီ၊ ပိုက်တမ်ဂၠာဲရိုဟ်မ္ဂး ဂကူမန်တအ်ဂှ် ဒှ်မသကောဒေံပိုဲ ကြပ်ပ်(ဝါ) သ္ၚောဲသ္ၚောဲဖအိုတ်ရဏောၚ်။
ကောဒေံဂှ် ဒှ်မသကြပ်ပ် ဂကူဂှ် ဒှ်မသသ္ၚောဲသ္ၚောဲကီုရ၊ ဗီုဆာန်ကောဒေံပိုဲဂှ် ယဝ်ရ ဆာန်ဂကူကီုမ္ဂး မန်ပိုဲမုက်မတ်ယးတၟး ဂကူပိုဲလေဝ်ဗၠးၜး ပြဟ်ဟ်မာန်ရ။
၀၃။ ဂကူမၞးဒှ်မံၚ်ဍိက်မ္ဂး မၞးကီုကောဒေံမၞးကီု ဒှ်ဗက်ဍိက်ဒးဒုၚ်ဇိက်သီုဖအိုတ်ရ၊ ဂကူမၞးဗၠးၜးမ္ဂး မၞးကီုကောဒေံမၞးကီု ဗၠးၜးသၠဲလးဇၞော်မောဝ်သီုဖအိုတ်ရ။
၀၄။ ဂကူဇကုဒှ်မံၚ်ဍိက် ဒှ်မံၚ်ဒဒိုက်ဂှ်ဟွံရံၚ် ရံၚ်သွက်ဇကုတုဲ ပဲါဒဴအာဌာန်ညးတၞဟ်ဂှ် ဒှ်ညးကျဂြိပ်ဒဴ မာန်တှ်ေဗက်စ။
၀၅။ ဍုၚ်ကွာန်ဌာန်ဒေသဇကု ဇကုဟွံမံၚ် ရန်တၟံကဵုသြန်တုဲ အာထောံဌာန်ညးတၞဟ်မ္ဂး ဂကူညးတၞဟ်တအ် လုပ်ကၠုၚ်ဗပေၚ်ထောံ ဒၞဲါရောၚ်၊ ယဝ်ခါရ ဒှ်သာ်ဂှ်ဂၠိုၚ်မ္ဂး ဍုၚ်ကွာန်ဌာန်ဒေသဇကု ဒှ်အာဌာန်ညးတၞဟ်ရောၚ်။
၀၆။ ပြံၚ်အာမံၚ်ဍုၚ်ညးတၞဟ် ဌာန်ညးတၞဟ်မ္ဂး ဒးဗက်မံၚ်အခိုက် ညးတၞဟ်ရောၚ်တုဲ၊ လက်သဏ်ဂကူဇကု မဒးဗၠိုက်တၞီအာရ။ ကၞောတ်တဲ (စိုပ်အဆက်ကောန် အဆက်စဴ)မ္ဂး ဒှ်အာဂကူညးတၞဟ်တွဵုရ။
၀၇။ ဘဝဍိက်ဂှ် ပဲါဒဴကေတ်ဟွံဗၠး အာမံၚ်ဍုၚ်ညး ဒးမံၚ်သၟဝ်တဲဂကူညးရ။ ကုသဵုခိုဟ်မ္ဂး ဘဝဍိက်ကဆံၚ်သၠုၚ်ညိဟေၚ် ဒှ်မာန်ရောၚ်၊ သ္ဂောံဗၠးတိတ်နူဘဝဍိက်မာန် ဌာန်ဒေသဂကူဇကုဂှ် ပသ္ဇိုၚ်တုဲ ဒးကၠောန်အာရောၚ်။
၀၈။ ဂကူဇကုဒှ်မံၚ်ဍိက် ဒှ်မံၚ်ဒဒိုက်ဂှ်ဟွံရံၚ် ရန်တၟံကဵုဖဵုဂုဏ်ဇကုတုဲ ကၠောန်မံၚ်သွက်ညး မဍဵုဍိုက်ဂကူဇကုဂှ် ဒှ်မၞိဟ်ဟဠက်ဂကူ ဒှ်မၞိဟ်ဂကူတဝ်မုဲ ဟွံမာန်ဟာ။
၀၉။ ပိုဲဒးဒုၚ်ဒှ်မံၚ်ဍိက်ဂှ် ဟိုတ်နူကဵုကံကုသဵု ဘဝအတိက်တေံဟွံသေၚ် ဟိုတ်နူကဵု ပိုဲဒုၚ်သ္ပမံၚ်ဍိက်တုဲ ညးတၞဟ်ဂွံသ္ပ ဂွံအုပ်ဓလီုမံၚ်ရ။
၁၀။ ဂၠဲါသြန်ဂှ် ဒှ်ဂုဏ်ဖဵု သွက်ပူဂဵုရဂၠိုၚ် ဍုၚ်ကွာန်မန်ဂမၠိုၚ် ဒှ်အာဍုၚ်ကွာန် ဂကူညးတၞဟ်ဂှ် ဂွံက္လေၚ်ပဠေဝ်ဟွံလောဲ လေၚ်ဆောံအာ သွက်ဂကူဇၞော်ကဵုဇြဟတ် စေကဵုဂကူကၠေံကၠက်ဒှ်မာန်ရောၚ်။
၁၁။ ဂကူတုပ်မ္ဂး ဒးရီုဗၚ်မၚ်မွဲညးသ္ကအ်ရောၚ်၊ ဂကူကြုက်၊ ဂကူဂလာ(မူဆလေၚ်)တအ် ရီုဗၚ်မၚ်မွဲညးသ္ကအ်ခိုဟ်တုဲ ဂကူဍေံတအ် ဇၞော်မောဝ်ပြာကတ်ကၠုၚ်အိုတ်ရ။
၁၂။ မၞိဟ်ဂကူတုပ်တအ်ဂှ် ကံကုသဵုဆက်စပ်မံၚ်ညးသ္ကအ်ရောၚ်တုဲ ဒးညဳသာညးသ္ကအ် ဒးရီုဗၚ်မၚ်မွဲ ညးသ္ကအ်ရောၚ်။ ယဝ်ရ ဟွံညဳသာ ဟွံရံၚ်စံၚ် ဟွံမၚ်မွဲညးသ္ကအ်မ္ဂး၊ ညးလေဝ်ဒှ်ဒိုက် အဲလေဝ်ဒှ်ဒဒိုက် ကၞောတ်တဲမ္ဂး ဒးတၞီဗၠိုက်အာ အလုံကောန်ဂကူမာန်ရောၚ်။
ဂကူကၠဵုတအ်ဂှ်ဟွံဝိုတ်တၠ မၞိဟ်ဝိုတ်မံၚ်မသဂကူတအ်ဂှ် ပရေံစိုပ်အာ ကဆံၚ်လဵုချပ်ဗစာရံၚ်အိုတ်ညိ။
၁၃။ ဟိုတ်နူစိုတ်ဓာတ် ဆာန်ဂကူထတ် ကၠောန်သွက်ဂကူတုဲ ဒးဒုၚ်ချိုတ်အာဂှ် လ္ပဂွိၚ် လ္ပဖေတ် စိုတ်လ္ပလီု ချိုတ်ဂှ်ညးလဵုမွဲမှ ပဲါဟွံဗၠးရ။ ဂကူဇကုဒှ်မံၚ်ဍိက်ဖိုဟ် ဇကုတိက်မံၚ် မိပ်မံၚ်တုဲ ဒးချိုတ်အာဂှ် ထေက်ကဵုဒးဂွညးဂမၠိုၚ်ရောၚ်။
၁၄။ မၞိဟ်မွဲမွဲ အယုက်ၜိုတ်လဵုဂၠိၚ်ၚ် ပိုန်ဒြပ်ၜိုတ်လဵုသၠဲသၠဲ နွံမံၚ်ပ္ဍဲဘဝဍိက်မ္ဂး ဝၚ်လျးတၟးမာန်ဟွံသေၚ်၊ ၜိုန်ဒှ်သၟိၚ်မွဲမွဲဒၞဲါ ၜိုန်ဝၚ်နာဲဒယှ်ကီုလေဝ် ဒှ်ဍိက်ကဆံၚ်သၠုၚ် ဍိက်ဒယှ်မွဲဟေၚ်တုဲ သိက္ခာဟၟဲရ။
ဝၚ်ဂှ်ညးဂွံလဝ်ဇၞးတအ်ဟေၚ် အခေါၚ်ချူ နွံဂၠိုၚ်တုဲ ညးဂမၠိုၚ်တအ် စိုတ်လေပ်စ။
ဟီုကြီုမံၚ်ဝၚ်အတိက်တုဲ ဇကုဒုၚ်သ္ပမံၚ်ဍိက်ဂှ် ဂွကဵုလေပ်အိုတ်ညိ။
၁၅။ ကူချပ်ရံၚ်အးအးညိ မၞိဟ်ဟွံဂွံ ဒုၚ်စလဝ်အာဲကၟာဲဂကူဂှ် နွံမံၚ်ကီုရဟာ၊ ဒုၚ်စလဝ်အာဲကၟာဲဂကူတုဲ ဟွံတီဂုဏ်ဂကူ၊ ဟွံကၠောန်ပရေၚ်ဂကူ ဟွံရီုဗၚ်ဂကူမ္ဂး ဒှ်မၞိဟ်ဟွံတီတာလျိုၚ် ဒှ်ပွမၞိဟ် အရိုၚ်တအ်ဏောၚ်။
၁၆။ ဂကူမွဲမွဲ ဂွံဇၞော်မောဝ်တောတက် ပြာကတ်မံၚ်ဂှ် ချိုတ်တုပ်ဂျိုၚ်တုပ် ဝါတ်တုပ်သိုက်တုပ် ညဳညဳသာသာ ရုန်ဂစာန်တတ်ထပါ်ကၠုၚ် အခက်အခုဲနာနာ၊ တဝ်စၞေဟ်ကၠုၚ်သၞနာနာ မွဲစွံ လအ်ကဵုသၞာံအခါရောၚ်၊ အခိုက်ဏအ် ယဝ်ရလီုလာ်ယောၚ်ယာအာမ္ဂး ဒှ်ဍိက်ညးတၞဟ်ရ။
၁၇။ မၞိဟ်ဟွံတီဂုဏ်မိမ ဂုဏ်အ္စာတအ်ဂှ် ဒှ်မၞိဟ်ဟွံတီဂုဏ်ညးတၞဟ် ဒှ်မၞိဟ်သစ္စဟၟဲတုဲ ပရေံနူသတ်တိရစ္ဆာန်ဏီရ။
၁၈။ ကြက်ဂကူဂှ်အရေဝ် ကြက်အရေဝ်ဂှ်လိက်ပတ် ဆာန်ဂကူဇကုမ္ဂး ထိၚ်ဒဝ်အာ အရေဝ်လိက်ပတ် ဂကူဇကုအိုတ်ညိ။
၁၉။ သ္ဂောံထိၚ်ဒဝ်အာ အရေဝ်ဂကူဇကုမာန် ဟီုအရေဝ်မန်အိုတ်ညိ၊ ဟီုအရေဝ်မန်မ္ဂး အရေဝ်ညးတၞဟ်လ္ပကဵုပြံက်ဏှောအာညိ ပြံက်ဏှောမံၚ်အရေဝ်ညးတၞဟ်မ္ဂး အရေဝ်ဂကူဇကုဂှ် ကၠာဲအာတုဲလအ်မ္ဂး ကၠေံကၠက်အာရောၚ်။
၂၀။ ဂကူမန် ကောန်ဗုဒ္ဓဘာသာ ဗီုစိုတ်ထတ် ပ္ဍဲအရာကဵုဒါန်သ္ပကုသဵုဂှ် ယဝ်ခါရထံၚ်ပၚ် ပ္ဍဲပရေၚ်ကောန်ဂကီုမ္ဂး ဂကူမန်တအ် ဗၠးၜးနူဘဝဍိက်မာန်ရ။
၂၁။ ဘဝဂတမုဒှ်ဂှ် ညးလဵုလေဝ်တီချိုတ်ပၠိုတ်ဟွံသေၚ်၊ ကၠောန်ပရေၚ်ဂကူ၊ ပရေၚ်ဍုၚ်၊ ပရေၚ်ညးဂမၠိုၚ် ညံၚ်စိုပ်တရဴမ္ဂး မၞိဟ်ချိုတ်အာလေဝ် ဝၚ်ခိုဟ်မွဲဂွံဒုၚ်စသိုၚ်ရ။
၂၂။ ဂၠဲါဒြပ်ရန်တၟအ် သွက်ကောန် ဗ္တောန်ကွတ်ရန်တၟအ် သွက်ဇကု ဖဵုညးဂမၠိုၚ်ဟွံဒှ်မ္ဂး၊ ညးမွဲလေဝ်ဟွံထိုၚ်သး ဝၚ်ခိုဟ်လေဝ်ဟွံၜက်သှ်ေရ။
၂၃။ မၞိဟ်မွဲမွဲ စိုတ်ဓာန်ဆာန်ဂကူ ၜိုတ်လဵုနွံဂှ်မိက်ဂွံတီမ္ဂး၊ ၜိုတ်လဵုညးဒုၚ်ဂိ ဒုၚ်အိုတ် ဒုၚ်ကၠောန်မံၚ်သွက်ဂကူဂှ်ရံၚ်ညိ၊ လ္တူအရေဝ်ညးသၟး လ္ပကဵုသ္ဂုတ်သွာတ်ညိ။
ဆာန်ကၠအ်မ္ဂး ဒးပခိုသ်ဒၞးဒပ် ဆာန်ဒြပ်မ္ဂး ဒးပခိုၚ်ပရေၚ်ဂီုကၠီု ဆာန်ဂကူ ဆာန်ဍုၚ်မ္ဂး ဒးခိုၚ်ဒပ်ပၞာန်ရောၚ်။
၂၅။ အရေဝ်ဘာသာမွဲမွဲ လိက်ပတ်ဘာသာမွဲမွဲ၊ ဟွံဒှ်အထံက်အပၚ် ကဵုပရေၚ်ဂယိုၚ်လမျီုမ္ဂး မၞိဟ်တအ်ဟွံစွံၚုဟ်မး၊ ဟွံကတ်ဗ္တောန် စကာအောန်ကၠုၚ်တုဲ၊ အရေဝ်လိက်ပတ် ဘာသာဂှ် ဗၠိုက်တၞီစှ်ေအာတွဵုရ။
၂၆။ ညးမဂွံလဝ်အဝဵုတအ် တီလဝ်ပရောဒဒှ်ဏအ်တုဲ ကၟာတ်ဒၞါလဝ် အရေဝ်လိက်ပတ် ဂကူကောန်ဍုၚ် အရၚ်တအ် ညံၚ်ဟွံဂွံစကာအာပ္ဍဲရုၚ် အပ္ဍဲသၞောဝ်တအ်ဂှ် သွက်ဂွံၚိတ်ကဠက် ဂကူကောန်ဍုၚ်အရၚ်တအ်ရ။
၂၇၊ ၚဴမွဲမဟွံဒှ်ကၠေၚ် ပလေၚ်မွဲမဟွံဒှ်ကွာၚ် ဟီုကၠာလေဝ်၊ ဂကူညးတၞဟ်မွဲ စိုပ်ကၠုၚ်ကွာန်ဌာန်ဒေသဇကု ဍေံဟွံဟီု အရေဝ်ဇကု ဇကုမၞိဟ်ဂမၠိုၚ်ဗက်ဟီုမံၚ် အရေဝ်ဍေံဂှ် စိုတ်ဓာတ်ဆာန်ဂကူဇကုဂှ် ဟွံသဝ်အာနူဍေံဏီဟာ။
၂၈။ မၞိဟ်ကၠုၚ်ပၠံၚ်တိဍာ်ဂကူဇကု ကၠုၚ်ၚိတ်ကဠက်မံၚ် ဂကူဇကုဂှ် စွံစိုတ်သၠဲသၠဲဒုၚ်လဝ်တဲမ္ဂး မၞးဂှ်ဒှ်မၞိဟ်ဆာန်ဂကူဟွံသေၚ် ဒှ်မၞိဟ်ဒုၚ်စကာသၞ ဗပေၚ်ပၟိက်သၞ ဒှ်မၞိဟ်ကဠက်ဂကူဇကုကီုရ။
၂၉။ ဂကူမွဲမွဲ မိက်ဂွံဒက်ပ္တိန် ကၟိန်ဍုၚ်ဗၠးၜး သွက်ဂကူဇကုမ္ဂး မ္ၚးနူဌာန်ဒတန်ဇုဇဗဴလ ဂကူဇကုတုဲ ဒၞဲါဒေသတၞဟ်ဒက်ပ္တန် ဟွံလောဲရ။
၃၀။ ပ္ဍဲလိုက်ဏအ် ဒြပ်ရတ်ၚုဟ်မး ဇၞော်နူကၟိန်ဍုၚ်ဗၠးၜးဂှ်ဟၟဲရ၊ ဟိုတ်နူၚုဟ်မးဇၞော်ဂၠိုၚ်ဟေၚ်ရ မၞိဟ်တအ်ဒုၚ်သၠာဲမံၚ်ကဵု ဆီပဠက်လမျီုဗွဲမဂၠိုၚ်ဏီရ။
၃၁။ ဆာန်ဂကူမန်ဍာံမ္ဂး မဇဂကူမန် ညံၚ်ဟွံဂွံကၠေံကၠက်အာဂှ် ဒးထိၚ်ဒဝ်အာရောၚ်။
၃၂။ မဇဂကူမန် ညံၚ်ဟွံဂွံကၠေံကၠက်အာဂှ် ပရေၚ်ဂကူမန် မန်တအ်ဒးဖန်ဖက် ကေတ်တ်ရ။
၃၃။ မဇဂကူမန် ညံၚ်ဂွံတန်ကြန်အာမာန် ဍုၚ်မန်ဗၠးၜးဂှ် ပိုဲဒးဒက်ပတိုန်အာရောၚ်။
၃၄။ မိက်ဂွံတီအာဲ ဒးဂၠာဲရံၚ်ဝၚ်အတိက် ဝၚ်အတိက်ဟွံရံၚ် ဆီပြံၚ်ဒှ်ဍိက်။ (ကျာ်ဇၞော်ဘာဒေါဝ်ကွာန်တံၚ်ပြၚ်)
၃၅။ မိက်ဂွံကဵုကောန်ဂကူမန်ဗၠးၜးမ္ဂး၊ အလုံကောန်ဂကူမန်တအ် စိုတ်ဓါတ် ဆာန်ဂကူ ညံၚ်သ္ဂောံသၠုၚ် ညံၚ်သ္ဂောံမြဟ်မြဴကၠုၚ်ဂှ် ဒးကၠောန်ကၠာ အိုတ်ရောၚ်၊ စိုတ်ဓါတ်ဆာန်ဂကူ သၠုၚ်မံၚ်ဟေၚ် ဒုၚ်ဒဒိုက် ဒုၚ်ဂိ ဒုၚ်ကဵုမာန် စိုတ်ဓါတ်ဆာန်ဂကူမြဟ်မြဴဟေၚ် ဒုၚ်ထံၚ် ဒုၚ်ချိုတ် သွက်ဂကူမာန်ရောၚ်။
၃၆။ မၞိက်ကၠောန်မံၚ်ကမၠောန် ပရေၚ်ဂကူတအ်ဂှ် ၜိုန်ရယောၚ်ယာ နွံကၠာလေဝ်။ ဆဵုဂဗဂၠိုၚ်ကၠုၚ်မ္ဂး ကၠောန်ဒး အံၚ်ဇၞးမာန်ရောၚ်။ မၞိဟ်ဟီုကေတ် သၟးသၟးတအ်ဂှ် အခိၚ်လဵုလေဝ် အံၚ်ဇၞးမာန် ဟွံသေၚ်၊ ဟိုတ်ဂှ်တုဲ မၞိဟ်ဗီုလဵု ဒးထိုၚ်သးထေက်သ္ၚဳဂၠိပ်ညိ။
၃၇။ မၞိဟ်မွဲမွဲ ပူဂဵုဆာန်ဂကူသေၚ်၊ ဟွံသေၚ်ဂှ် က္လၚ်ကေတ်အရေဝ်သၟးဟွံတီ၊ ဒးရံၚ်လ္တူကမၠောန် ပွညးတအ်ရောၚ်။
၃၈။ ဒုၚ်ယၟုကၠောန်သွက်ဂကူဂးတုဲ၊ ရေက်ကးပ္တိတ်မံၚ်ပရဲ လ္တူကမၠောန်ဂကူမ္ဂး ပရေံနူဟွံကၠောၚ်ပရေၚ်ဂကူဏီုရ။
၃၉။ ဂကူဟွံမိက်ဒုၚ်သ္ပဍိက် ညးတၞဟ်တအ်ဂှ်၊ ညးတၞဟ်လေဝ် ဟွံမိက်သ္ပဍိက်ရ၊ ဟိုတ်ဍေံဂှ် ဖဵုဂုဏ်ညးဟၟဲ ဒှ်အန္တရာဲကုညးတုဲ ညးဟွံမိက်သ္ပရောၚ်။
၄၀။ ကံကုသဵုဂကူမွဲမွဲဂှ် နွံလ္တူပရေၚ်လွဳပရာ ကေုာံ ပရေၚ်ညဳသာ ပ္ဍဲဂကူဂှ်ဟေၚ်ရ။
၄၁။ ဂကူဟၟဲကဵုဍုၚ် စရာဲဂွံဇၞော်သၠုၚ်ပြာကတ် ဗီုညးတၞဟ်ဂှ် ဒှ်ဟွံမာန်။
၄၂။ ဂကူဟၟဲကဵုအခေါၚ် ပရေၚ်ဂကူဇကု ဇကုဖန်သ္ဂေံတန်ကြန်အာဍာ်ဇမၠိၚ်ဂှ် ဒှ်ဟွံမာန်။
၄၃။ ဂကူဟၟဲကဵုဒပ်ပၞာန် ညးသ္ပမာန်အဲဍဵုဍိုက် မဒးဗၠိုက်တၞီအာ ပြဟ်ဟ်မာန်ဏောၚ်။
၄၄။ လ္ၚတ်ဝၚ်ဂကူ သွက်ဂွံကြီုကြဴမံၚ်ဟွံသေၚ်၊ ညံၚ်သ္ဂောံစိုပ်တဲဇကု ဇကုဒးပြုပြေၚ်။
၄၅။ ယွံမန်ဆာန်ဂကူ ဆာန်ဍုၚ်တအ်အဴ သွက်ပုၚ်မွဲဗုၚ်လ္ပဒုၚ်သ္ပဍိက်ပၠက် ညးမပလက်ဇကူဇကုညိ၊ ပိုဲဒုၚ်သ္ပဍိက်မ္ဂး ဂကူညးတၞဟ်တအ် ဇြဟတ်ဇၞော်သၠုၚ်တုဲ ပိုဲဒးဒုၚ်ပ္ဍဵုပ္ဍိုက် ဂကူပိုဲလေဝ်ဗၠိုက်တၞီ ကၠေံအာမာန်ရောၚ်။
၄၆။ ညးပၠံၚ်ကေတ်ဍုၚ်ပိုဲဒးဒုၚ်ဂစိုတ် ချိုတ်ကဵုလက်ကိုဋ် ဖအိုတ်ကၠုၚ်မံၚ်လမျီု က္လေၚ်ရံၚ်ချပ်ဗစာ နကဵုမတ်ပညာညိ။ ပိုဲဂကူမန် ယဝ်ကၠောန်သွက်သၞ ဒးဒုၚ်သ္ပတဝ်မုဲ ပတုဲဖဵုသွက်သၞမ္ဂး က္ဍဟ်မၞးဂှ် ဒှ်က္ဍဟ်ၚုဲရောၚ်။
၄၇။ ညးလွဳလဝ်ကၠိက် ပၟိက်ညးစဖျုန် မွဲတ္ၚဲညးဍုန်စပၠန်ရောၚ်၊ လ္ပသၠောၚ်မံၚ် ပ္ဍဲဘဝဍိက် တိက်ချပ်ဗစာရံၚ် ဇြိုဟ်ဟ်နက်က်ညိ မိမအ္စာကဵုလဝ်ပညာ သွက်ဂွံပၠေၚ်ပလက်ဂကူဇကုရဟာ။
ညးမချူ...ၜိုပ်ဍာဲ နာဲအံင်သာန် (ဓရီု) ၁၁:၂၃၊ ၅ အံက်တဝ်ဗါ ၂၀၂၁ (+0630)